کۆمیتەو پەیوەندییەکاو بەروو پەکەکەی ئەرەیاوناێوەش وەڵا و کەردۆ و واتش، پەدەکە وەراوەروو بەرژەوەندییەکاو گەلوو کوردینە هەڵوێستێوی خیانەتکارانە نیشانە مدۆ و داواش وەنەو گرد کەردە، کە دژوو خیانەتی و داردەسەیی پەدەکەی یۆی بگێرا.
ئەرەیاونایەکەو کۆمیتەو پەیوەندییەکاو بەروو پەکەکەی ئینەنە:
"پەدەکە پیلانگێڵی، پڕوپاگەندە و چەپەڵتەرین پلانەکاش موزۆنە وەڵێ و بەئاشکرا وەراوەروو بەرژەوەندییەکاو گەلوو کوردینە خیانەت مکەرۆ. ڕژێموو ئاکەپە-مەهەپەی فاشیستی سەروو گەلوو کوردیوە قڕکەردەی مارۆ ئاراوە. بە زۆر خەڵکی کۆچبەر مکەرا و سەروو مەبارەکتەرین بەهاکاو گەلوو کوردی جەنازەو گەشمەردا و قەبرسانەکاوە کردەوەی بێئەخلاقی و نائینسانانە مکەرۆ. پەدەکە چەنی ڕژێمێوی پاسە چارەنویسوو وێش لکی دان و دژوو گەریلاکاو ئازادیی کوردستانی جەنگ مکەرۆ، یانێ کەوتەن دۆخێوی پاسنە ماڵیارە جە کەسایەتی. بەدڵنیاییوە ئانە کە دەوڵەتوو تورکی داگیرکەری و قڕکەری پەی پانیشتوو کوردستانی پەلکێش مکەرۆ و ڕا وەردەموو لکناینە مکەرۆوە خودوو پەدەکەیا. گردوو کردەوەکاو پێسەو تاڵانکاریی ژیوگەو کوردستانی، کۆچبەرکەردەی گەلی بەزۆر و وێرانکەردەی و خاپوورکەردەی دەگایەکا ئەنجاموو کۆنسێپتوو هامکاری و داردەسەیی پەدەکەی و دەوڵەتوو تورکییا.
پەدەکە نەک حەر جە ڕووەو سەروازییوە چەنی دەوڵەتوو تورکی ئینا هامکاریینە، هەرپاسە ڕەوایەتی بە هجوومەکاو دەوڵەتوو تورکی پەی لکنای و داگیرکەردەی پانیشتوو کوردستانی مدۆ و بێ ئانەیە شەرم جە وێش بکەرۆ، هەوڵێوی فرێش وستێنێ هەرمانە و فرەو لایاوە دیدار مکەرۆ و گردوو دەرفەتە دیپلۆماتیکەکاو وێش چا چوارچوەنە بەکارمارۆ.
پەدەکە بە پڕوپاگەندەی درۆیینە و ساختەکارانە، هەوڵێ مدۆ، کە نامێ پەکەکەی بزڕنۆ، پەرسەکێ بفارۆ و تاوانەکاش بشارۆوە. گەلەکەما فرە خاس مزانۆ، کە پەکەکە جمیەرێوی کۆمەڵایەتیی دیموکراتیکی ئیکۆلۆژیک و ئازادیوازەن. هەمان وەختەنە گەلەکەما ڕاسیی ئەقڵیەتی پیاسالاری، دژبەروو ژەنا و دوژمنایەتیی ئیکۆلۆژیک و ژیوگەی پەدەکەیچ خاس مزانۆ. هەرپاسە پەدەکە هەڵای بێ ئانەیە شەرم بکەرۆ و رووسیاو بۆ، پەکەکە پێسەو وەرپەرسوو ئایرکەوتەیوەکا هەولێری و کەرکوکی نیشانە مدۆ. بەڵام بە بەڵگەی حاشاورنەگیر سەلەمیابێ، کە ئایرەکێ ئاماژەنێ کە میتی و پاراستنی کەردێنێوە. دەوڵەتی تورکی داگیرکەر گرد ڕوێ دەگا و دارستانەکاو پانیشتوو کوردستانی بۆردومانێ مکەرۆ و مسۆچنۆسا، هامبەشوو ئا تاوانایچە خودوو پەدەکەیا.
ئەنجومەنوو ئاسایشی بە نامێ ئەنجومەنوو ئاسایشوو هەرێموو کوردستانین، کە ڕاسیینە تەنیا ئەنجومەنوو ئاسایشوو بنەیانەو بارزانییا، بە شێویوی مەبەسدار و نامەردانە، پەکەکە هەوڵێ کوشتەی وەرپرسوو پەدەکەی ئەکرەم ساڵحیوە بە وەرپەرس نامێ مبەرۆ. ئێمە بەڕۆشنی ئەرەیاونمێش، کە ئێمە ئا تۆمەتبارکەردەیا بێبنەما و ناڕەوایا ڕەت مکەرمێوە. دماو ئا ئەرەیاونایەو پەدەکەیە ئاندە هەڕەشێ وەنەو ڕاوەبەرایەتیما کریێنێ، کۆگەو پانیشتوو کوردستانینە بۆ با بۆ، هەر ڕووەداێوە پەی هامڕاێوەما بێ ئاراوە، بەدڵنیاییوە دەینش ئینا ملوو پەدەکەیوە.
گەلەکەما ئانەیە خاس مزانۆ، کە بڕێ یاگی پانیشتوو کوردستانینە وەختی جیاجیانە بە دەسوو میتی و پاراستنیوە چندین شۆڕشگێڵنێ و وەڵاتپارێزنێ تیرۆرێ کریێ. گەلوو کوردی واوەی خاس مزانۆ، کە بکوشاو ئا تاوانا بە پەشتیوانیی پاراستنی ورئامێنێ و لوێنێ هەولێر. فرە ئاشکران، کە وەرپەرساو ئا تاوانا پاراستنا.
گەلوو کوردی بە قۆناغێوی تارێخی و گرنگەرە مویەرۆ. مشۆم گردوو گەلی وەڵاتپارێزنی، ڕۆشنویر، ئەکادیمیسیانێ، حزب و ڕێکوزیایەکاو کوردستانی دژوو خەتەو خیانەتی و داردەسەیی پەدەکەی بە خەتێ وەڵاتپارێزنییوە پێوەسێ با. پێوەس پانەیوە مشۆم گەلەکەما بزانۆ، کە تەنیا پێسە پارێزگاریی جە بییەی، ئازادی و دەسکەوتەکاو گەلەکەیما مکریۆ".
