فیدراسیۆنوو جڤاکە کوردسانییەکا ئەڵمانیا (کۆن_مەد) بە ئەرەیاوناێوە نویسیا سپاسوو بەشداراو کۆبییەیۆکەو ١٧ ی شوباتوو کۆڵنیش کەرد و واتش: "ڕاپیمای ١٧ شوباتوو کۆڵنی، تارێخش نویستۆ! سەدان هەزار کەسێ واتشا "ڕابەر ئاپۆ ئیرادەو ئێمەن".

ئەرەیاونایەکەنە ئاماژە پانەیە کریان، مدرامانوو ١٧ شوباتی بە هەمان ڕۆحوو ١٩٩٩ وەش بییەن و سەدان هەزار کەسێ ئەورووپانە واتشا "مەتاودێ ڕوەکەیما تاریک کەردێ".

کۆن-مەد واتش گەل و ژەنی و گەنجێ وەڵاتپارێزنێ  ئەڵمانیانە چند هەفتێوە کە سەفەربەرێ بێنێ و خەباتێوە گرنگشا کەرد و جوابێوە گونجیاو پیلانگێڵنییشا داوە.

کۆن-مەد ماچۆ: "ژەنی و گەنجێ گردوو هێزوو وێشا پەی ڕاپیمای ١٧ شوباتی سەفەربەر کەرد، بیێ بە ڕەنجدەرێ شکۆمەندێ ئی سەرکەوتەیە گەورەیە. وەڵێ ڕاپیمایەکەینە سەرێ گردوو یاگەکاو گلێرگەی و یانا کریا. گەلەکەما بە کۆبییەیۆ گەلی چند یاگێوەنە نیشتێرە و پەی ڕاپیمای تارێخیی١٧ شوباتی سەفەربەرێ بیێ.  

ئەنتەرناسیۆنالیستێ و دۆسێ و شۆڕشگێڵنێ و دیموکراتیکێ و ڕۆشنویرێ چی هەڵمەتێنە ڕەنجێوە کی گەورەشا دا و بە بەشداریێوە گەورە بەشدارییشا ڕاپیمایەکەنە کەرد. پەشتگیرییشا وەنەو ڕابەر ئاپۆی کەرد و ئەوەخوایشا کەردۆ پاڵوو کۆشیای ئازادی کوردیوە مردا".

کۆن-مەد ماچۆ دووەڕوویی کۆنسەو ئەورووپای و سی پی تی وەراوەروو گۆشەگیری بەرکەوت، داواشا وەنە کریا دەس چی هەڵوێستەیە وەراوەروو گەلوو کوردیوە ورگێرا و بە پاو پیمەرە دیموکراسییەکا و مافەکاو ئینسانی جووڵیاوە.

درێژەنە ماچۆ: "سەدان هەزار کەسێ جە ڕاو ڕاپیمای کۆڵنیوە واتشاوە "ڕابەر ئاپۆ ئیرادەو ئێمەن، دەمودەس ئازادیی جەستەییش گەرەکمانە". چی قۆناغەنە و  ١٧ شوباتی بەدماوە کۆشیای گرد یاگێوە جڤاکیرە وەڵا بیەنۆ. پا گێرمێرە سەروو ئا هەڵوێستەیە کۆڵننە نیشانەما دا، بیاونمێش ئاستێ تەر و گلێرگەییش کەرمێ".

ئاخرۆ ماچۆ: "سپاسوو گردوو ڕاوەبەراو فیدراسیۆنەکەیما کەرمێ، بەتایبەت گردوو مەجلیسەکاما، کە پەی ڕاپیمای ١٧ شوباتی سەفەربەرێ بێنێ، هەرپاسە گردوو ئا ئەو پێکئامایا کە مەیدانەکانە بە دیسپلینۆ خەبات و خزمەتشا کەرد".