هامسەرۆکەو لقو ئامەدی ئۆهەدە گیزەم میرانە جە کۆنگرەو سەندیکاو پارێزنەرانە قسێش کەردۍ و باسش چانەی کەرد کە دەسەڵاتداری فاڕیان پەی شێوێوە فاشیستیانەی. گیزەم میرانە ناڕەزایەیش ۋەرا ۋەر بە گۆشەگیری ئیمراڵیچ نیشانەدا.
کۆنگرەو ٤٩ەمینو سەندیکاو پارێزنەرا ئامەدی سەرسەعبو ئارۆی دەسش بە هەرمانەکاش کەرد و تا سەوای بەردەوام بۆنە و ئارۆ مەدالیا دریا پا پارێزنەرا کە ٢٥ ساڵێن بەردەوامێنێ جە هەرمانەو پارێزنەرایەتی و یۆ چانیشایچ مەدالیاش پێشکەش کریا سەلاحەدین دەمیرتاش، هامسەرۆکی وەڵینو هەدەپەی بۍ، کە جە هەمان کاتەنە ئەندامو سەندیکاو پارێزنەران.
هامسەرۆکەو لقو ئامەدی کۆمەڵەو مافناسا پەی ئازادی (ئۆهەدە) گیزەم میرانە قسێش کەردۍ و باسش چانەیە کەرد کە دەسەڵاتدارا یاسا پێسەو ئامرازێوە فشاری بەکارمارا و حکومەت فاڕیان پەی رژێمێوە ستەمکاری کە فشار وزۆنە سەرو گلێرکەی. حیچ مافێوە بە ڕسمی نمەشناسۆ. وێرانکەردەی و کاولکاری جە شارەکانە هەڵای ویرما نەشییەنۆ. گرد ڕوێ ژەنێ کوشیا. دەسەڵاتو دادوەری یاوان ئاستێوە کە گلێرگەی ئەشکەنجە مڎۆ".
جە بەشێوە تەرو قسەکاشەنە گیزەم میرانە باسش جە فشارەکا سەرو زینانیا کەرد و چا چوارچێوەنە ئاماژەش بە گۆشەگیری رەهاو ئیمراڵی کەرڎو و واتش، "ئێژایا عەبدوڵا ئۆجالان، حامیلی یەڵدرم، عومەر خەیری کۆنار و وەیسی ئاکتاش جە زینانو ئیمراڵینە رووبەڕووو گۆشەگیری رەهای بیێنێ. ٤٣ مانگێن حیچ هەواڵێوەشا نمەزانیۆ. حیچ چێوە نییا رەوایەتی بە گۆشەگیری سەرو ئۆجالانی بڎۆ. پیمەرو هەڵوێسی و مامەڵەو دەسەڵاتداری جە تورکیانە ۋەرا ۋەر بە پرسو کوردی، شێوازو نزیکایەتیشا ۋەرا ۋەر بە ئیمراڵی. داوا مکەرمێ کە یاسا و دەستور هەرمانەشا پنە بکریۆ و مافە دەستورییەکۍ بەرەسمی بشناسیا".
دماو قسەکا ئۆهەدە گیزەمۍ، ژەنە پارێزنەرێ لوێ سەرو مەنەسەیو دروشمەکۍ "ژەنێ، ژیوای، ئازادیی" و "کوشتەو ژەنا سیاسیا"شا واتۆ.
کۆنگرەکە بە پێشکەش کەردەو وتارا بەردەواما.
