شاروو کۆڵن و ئەڵمانیاینە بە چالاکیێوە سەرنج وزیا سەروو زینڎانیا نەوەشی و داواو ئازاڎیی جەستەیی ڕابەروو گەلو کوردی عەبدوڵا ئۆجالانی کریا.

جە چالاکییەکەنە بەنامۍ پلاتفۆرموو دەنگوو زینڎانیا (تەسەپە)یۆ قسۍ کریۍ و ئاماژە پانەی کریا جە تورکیانە زیاتەر جە هەزار و ٥٠٠ زینڎانیا نەوەشی هەنۍ و ئازاڎۍ مەکریا، بڕێچشا وەختۍ ئازاڎۍ مکریا کە مزانیۆ نزیک بە مەردەینۍ، دماو چن حەفتێوە یان چن مانگێوە جە ئازاڎبیەیشا گیان جە دەس مڎا.

حەرپاسە سەرنج وزیا سەروو گۆشەگیری و پڕچنای پەیوەندی زینڎانیا بە ئامانجوو نامۆی کەردەیشا جە ئشناسنامە و کەسایەتیشا، تەئکید کریاوە کە گۆشەگیری سەروو ڕابەروو گەلو کوردی عەبدوڵا ئۆجالانی چن ئانڎە زیاتەرا.

حەرپاسە ئاماژەکریا پانەی جە دۆزو کۆبانێنە ٤٠٧ ساڵۍ سزاو زینڎانی سەپیان و وچیا: "دۆزو کۆبانێ پەی ئێمە بانگەوازوو گۆرەکەردەی کۆشیای یۆگێرتەین دژوو فاشیزمی".

هامسەرۆکایەتی مەدکۆمی ئاماژەش پانەی کەرد گۆشەگیری سەروو ڕابەروو گەلو کوردی عەبدوڵا ئۆجالانی سیاسەتوو قڕکەردەی و پاکتاوین پەی سەرو چوار پارچەو کوردەسانی و تورکیای.

نوێنەروو زۆرای ئاماژەش کەرد بە هجووم و فشارەکا سەرو گەلو کوردی و تەڤگەروو ئازاڎیی کوردی، حەرپاسە مدرامانوو کوردا ۋەرا ۋەر بە فشار و هجوومەکا، واتش: "جە تورکیا و جە گرڎ شۊنێوەنە جەنگ دژوو فاشیزمی ئەرەیاۋنمۍ، پەی ئازاڎکەردەی ۋێما و ڕزگارکەردەی گرڎوو مرۆڤایەتی جە کۆتوبەندی".

چالاکییەکە بە درووشـمەکا "با زینڎانیا نەوەشی ئازاڎۍ بکریا" و "ئازاڎیی پەی زینڎانیا سیاسی" و "ئازاڎیی پەی زینڎانیا کۆبانێ و گەزی و ١ و ئایاری" دمایش ئاما.