نەخشەڕاکە بە ٥٨ دەنگۍ بەڵێ، ٧ دەنگۍ نەخێر، دەنگێوە بێلایەن پەسینیا. دوروستەیۆ هامسەرۆکو شارەوانی وانی عەبدوڵا زەیدان و زینانیکەردەی سەرۆکو شارەوانی ئیستەنبوڵی ئەکرەم ئیمام ئۆ‌غلوی تەوەری سەرەکی نەخشەڕاکۍ بێنۍ.

نەخشەڕاکە جە لایەنو ڕاپۆرتدەرا دەڤید ئەرای (سویسرا، ILDG) و بریۆنی ڕودکین (شانشینی یۆگێرتەی، SOC/G/PD)ۆ ئاماڎە کریا و پەسینیا. جە نەخشەڕاکېنە ڕەخنە جە تورکیای گیریا ۋەروئانەی چا بەها دیموکراسییا دوورکۊتەنۆ کە جە جاڕنامەو ڕیکیاڤیکی ٢٠٢٣ ێنە قەولش پنە دابۍ.

جە نەخشەڕاکەنە ئامان کە ئی ئاژە پاسشە کەرڎەن جیای ئا کەسا کە جە لایەنو ٤ ملیۆن ئینساناوە هۊرچنیێنۍ، کەسانۍ تەرۍ دەسنیشانکریێنۍ پەی ڕاوەبەردەی.

جە نەخشەڕاکەنە چنی دوروستەیۆ زەیدانی جە مەنسەبەکەیش، بە تنی ڕەخنە جە زینانیکەردەی ئیمام ئۆغڵوی و ١٠٦ کەسا تەری گیریان. ئاماژە پانەی کریان کە وەڵتەر سەرۆک شارەوانیەکۍ ناوچەکا شیشلی و بەیلکدوزی ئیستەنبوڵی و بەشێوە جە ۋەرپەرسا کارتالی و ئەتاشەهیری باڵبەسۍ کریێبێنۍ. جە نەخشەڕاکەنە ئامان کە ئیمام ئۆغڵو کاندیدێوە بەهێز بیەن جە هۊرچنیەکا سەرۆکایەتینە، پۊکەی زینانیکەردەی ئاڎیی هەنگامېوە سیاسیە بیێنە.

هەرپاسە ئاماژە پانەی کریان، کە ئازادی گلېرۊبیەی و ڕابەربڕیەی جە تورکیانە بەشێوێوە جدی ئاستەنگ مکریۆ.

داواکارییەکۍ جە تورکیانە

جە نەخشەڕاکەنە ئی داواکاریۍ جە تورکیای کریێنۍ:

_ پېسە ئانەی ۋەرا ۋەر بە زەیدانی و ئیمام ئۆغلوی کریان، دمایی بە نیایرەو قەیومی جە شارەوانییەکانە باردۍ.

- کۊسپەکۍ ۋەردەمو ئازادی گلېرۊبیەی و ڕابەربڕیەی لابریا.

- دمایئارڎەی بە فشاری دادوەری سەرو ڕامېیاریمەدارا ئۆپۆزسیۆنی جە ڕاو تۆمەتەو سووکایەتیکەردەی یان تیرۆریوە.

- بەپاو قەرارەکا دادگاو مافو مرۆڤوو ئۊروپای، سەرۆک شارەوانییە زینانیکریێکۍ ئازاڎۍ بکریا.

قەرارو کیاستەی شاندی

کۆنگرە دماو پەسینای نەخشەڕاو قەرارەکەی ئەرەیاۋناش پەی شۊنیرەلوای پەی قەیرانەو دیموکراسی دلېینەی جە تورکیانە جەماوۍ کوڵەنە شاندێوە مکیانۆ پەی تورکیای. پلانە چامنێنە شاندەکە چنی سەرۆک شارەوانییە زینانیکریایەکا پېسە زەیدانی و ئیمام ئۆغلوی کۊبۆوە.