سەرۆکو پەرلەمانی نوعمان کورتولموش چنی سەرنوویسەرو چن دەزگێوە ئەرەیاۋنای کۆ بیۆ.

جە جوابو پرسیارێوەنە دەربارەو بانگەوازەکەو ڕابەر ئاپۆی، واتش: "هیواڎارەنا سیاسەت سەرو هێڵێوە هامبەشی و ماقووڵی مەنۊوە، مشۊم گرڎ کەسۍ ۋەرپرسیاری ۋێش جابەجێ بکەرۆ پەی دماییئارڎەی بە کێشەکا".

کورتولموش ئەرەیاۋناش ئی پرۆسە ئیسفاڎە بە تەمامو تورکیای مېیاونۆ.

پەرلەمان ۋەرپرسیاری ۋێش جابەجێ مکەرۆ

کورتولموش ئەرەیاۋناش شاندو ئیمراڵی دەم پارتی بەردەواما جە گلېرۊبیەیش چنی پارتەکا، پەرلەمان یاگۍ چارەسەرکەردەی گرڎو پرسەکان، واتش: "پرسەکە بە هەڵوێسی هامبەشو پارتە سیاسییەکا پەرلەمانی چارەسەر مەبۆ. هەروەخت پەنەواز بۆ، دەورو ۋێما گێڵنمۍ و هەنگامەی ڕۊشنە و جددیە منیەیمۍ. پەرلەمان ۋەرپرسیاری ۋێش جابەجێ مکەرۆ".

"دەستوور و پرۆسەو ئیمراڵی، دووۍ چێوۍ جیاوازێنۍ"

کورتولموش ئەرەیاۋناش شۊنیرە لوایەکۍ دەربارەو دەستووری، پەیوەندیش بە پرۆسەو ئیمراڵییوە نییا، واتش: "وەڵۍ ئانەینە هەنگامەی یووەمەو پرۆسەو ئیمراڵی بنریۆ، ساڵێ یا ساڵ و نیمێوە چێوەڵی، جە یووەم ڕۊو ٢٨ ەمین خولو پەرلەمانیوە دەسما پی مژاریە کەرڎ. پۊکەی ئی دووە مژارە جیاوازێنۍ و نمەبۆ تێکەڵ بە یۊی بکریا".