جە چوارچێوەو گلېرۊبیەکاو گەلینە دماو بانگەوازەکەو ڕابەر ئاپۆی جە دێرسیمنە کۊبیەیۆ "ئاشتی و گلېرگەو دیموکراتیکی ئەنجامدریا".

جە گلېرۊبیەکەینە هامسەرۆکۊو گرڎی دەبەپەی چیدەم کلیچگون ئوچارە ئەرەیاۋناش پەنەوازا گرڎ کەسۍ دژو قڕکەردەی سەرو عەلەوییەکا جە سوریانە دەنگ هۊربڕانە.

چیدەم کلیچگون ئوچارە سەرنجش وست سەرو بانگەوازەکەو ڕابەر ئاپۆی، واتش: " جە بانگەوازو ئاشتینە جیای چەکی سەرنج وزیۆ سەرو دیموکراسی، جیای نەژاڎپەرسی سەرنج وزیۆ سەرو گلېرگەو دیموکراتیکی، جیای سیاسەتو نکۆڵی دۊڵەتی سەرنج وزیۆ سەرو سیاسەتو دیموکراتیکی. چی سەردەمەنە پەنەوازما بە دیموکراتیکبیەیێن گرڎو گەل و باوەڕیەکا بە زۋانو ئەڎاو ۋێشا قسۍ بکەرا، بە ئاشکرا پەیلوایشا بەربڕا، پەنەوازا خاوەنداری بەهێز جە دیموکراسی بکەرا".

چیدەم کلیچگون ئوچارە پەی ئانەی بانگەوازەکەو ڕابەر ئاپۆی جابەجێ بکریۆ، پەنەوازا دۊڵەت و دەسەڵات هەنگامە بنیا، پەی چارەسەری پرسو کوردی دەس جە سیاسەتو نکۆڵی هۊرگێردۍ، واتش: "مشۊم هەموارو یاسایی و دادوەری بکەرا. پۊکەی بانگەوازەکەو ئېژا ئۆجالانی پەی ئاڎیشایچ پیمەرێوە یەکلاکەرەوەن. لایەنێوە قسۍ ۋێش کەرڎە و بانگەوازۍ تاریخیش کەرڎ. ئی بانگەوازە تاریخیە سنوورەکۍ تورکیایش ۋېیەرنۍ. پۊکەی مشۊم دەسەڵات و دۊڵەت و گرڎو پارتەکا پەرلەمانی قسۍ ۋێشا بکەرا".

چیدەم کلیچگون ئوچارە جە دماینە واتش: "بانگەوازەکەو ئېژا ئۆجالانی پەی گرڎو گەلا و پارتە سیاسییەکا و لایەنە کۆمەڵایەتییەکا بۍ. پەنەوازا چی پرۆسەنە گرڎما دەسوەڵێوستەی بکەرمۍ، تەنیا پەی دەسەڵاتی جیا نەمەنۆ و مشۊم گرڎما ۋەرپرسیاری ۋێما جابەجێ بکەرمۍ".

گلېرۊبیەکەی دوور جە چەمۍ میدیاکا بەردەوام بی.