گلێرگەو ژەنە ئازاداو وەرکەوتوو کوردستانی (کژار) جگە جە شەرمەزارکەرڎەی کوشتەی ئارمیتا گراوەندۍ، داواش جە گرد لێوە کەرڎە، کە وەراوەروو تاوانەکاو دەوڵەتوو ئێرانیوە بێدەنگۍ نەبا.
ئارمیتا گراوەندە کناچە کورڎەی ١٧ ساڵە، کە ئەرەنیشتۍ تارانی بۍ، ڕۊو یەکوو تشرینوو یوەم/ ئۊکتۊبەری دلۍ میترۊو شارەکەینە بە بەهانۍ ئانەیۊ حیجابش نەکەرڎەن هێزەکاو دەوڵەتی هجوومشا کەرد سەرش و کەوتە دۊخوو کۊمایۊ و دماو ٢٨ ڕوا مەنەیۊ خەسەخانەو فەجروو تارانینە، ڕۊو شەممەی ٢٨وو ئی مانگۍ هەواڵوو مەرڎەیش وەڵا بیۊ.
چا بارەوە ئەرەیاوناێوەنە کژار ئا تاوانەو دەوڵەتوو ئێرانیش بەتندی شەرمەزار کەرڎەن و داواش کەرڎێنە گرد لێوە وەراوەر پا تاوانا بەیاوە دەنگ و جەختش کەرڎەنۊ، کە تا ژەنی ئازادۍ نەبا، گلێرگە ئازاد مەبۊ، پەوکای داواو درێژەدای بە کۊشیایش کەرڎێنە پەی ئازادی.
گردوو ئەرەیاونیاکەو گلێرگەو ژەنە ئازاداو وەرکەوتوو کوردستانی (کژار) پێسنەن:
"وەراوەروو هجوومە بێباکانەکاو ڕژێموو پیاسالاریی ئێرانینە مەبۊ بێدەنگۍ بیمێ"
جە ئەوەڵ ساڵیادوو شۊڕشوو ژەنی، ژیوای، ئازادیینە وەرکەوتوو کوردستانی و ئێراننە، جارێوە تەر تاراننە، کناچێوە گەنجە ٩و ڕەزبەروو ١٤٠٢ (١وو ئۊکتۊبەروو ٢٠٢٣) لاو هێزەکاو ڕژێموو پیاسالاریی ئێرانیوە هجوومش کریا سەر. کناچێوە کە نامێش ئارمیتا گراوەندە بۍ، عومرش ١٧ ساڵۍ بۍ، کە دماو ٢٨ ڕوا مەنەیۊ دۊخوو کۊماینە، مەرڎە. مەرڎەی ئارمیتا گراوەندۍ و ژینا ئەمینیۍ و گەشمەرڎای تەروو سەرەورڎای ژەنی، ژیوای، ئازادی تاوانێوە کوشتەین کە لاو دەوڵەتیوە کریان و بەروزوو لاوازی و هیچیی و سیاسەتوو پیاسەنتەریی ڕژێموو فاشیستوو ئێرانین.
ڕژێموو فاشیستوو ئێرانی، سەروو بنەماو پیاسالاری ئەرەمەرزیان. مەژگێوە ڕێزا و ڕەگەزگەراو دەسەڵاتی، بە درێژایی ساڵە وەڵینەکا بەتایبەتی چی ساڵێنە، بە هجووم و پەلامارەکاش دژوو گەلا سەرتاسەروو ئێرانینە، سیاسەتوو پیاسەنتەریی وێش نیشانە دان. دەسەڵاتێوە کە دژەژن و دژەگلێرگەن، ڕژێمێوەن کە تەنیا و تەنیا دیوارێوەش پێسە لەمپەر، سەرکوت، سووکایەتی و سانسۊروو وەرڎەموو گلێرگەی ورچنیەن و وەراوەروو داواکارییەکاو گەلانە، تەنیا جوابەکەش زیندان، قەنارەدای و کوشتەین. وەلۍ وەراوەروو سەرجەموو ئی هجوومانە تەماموو کۊمەڵاو خەڵکی و گلێرگەی، بەتایبەتی ژەنی و گەنجۍ هەرگیز بێدەنگۍ نەبیۍ. خاس نیشانەشا دا کە ئی ڕژێمە حیچ ڕەوایەتیێوەش نییا. وەروو ئانەی ڕژێمێوە دژەژەنی پێسە ڕژێموو ئێرانی، نەک حەر نمەتاوۊ جوابوو داواکارییەکاو ژەنا بدۊوە، بەڵکوم پەی سەرکوتکەرڎەیشا پەنا پەی گرد ڕاوشۊنێوە بەرۊ. هامشانوو گەشەو کۊشیای ژەنا، ڕژێم بە چندین شێوازۍ هەوڵۍ هەقسانایۊینە بۍ. ئاماروو وێکوشتەی حەفتە وەڵینەکانە و کوشتەی ئارمیتۍ بە دەسوو دەوڵەتی، نموونەی وەرەچەموو ئی پەلامارانە. ڕژێم ئینا هەوڵێنە، کە جە ڕاو ورکێشیای تندوتیژیوە بە نامۍ و پێناسەی جیاجیا و هەمان وەختنە بە سانسۊر و پەرڎەپۊشکەرڎەی تاوانەکاش، دۊخەکەی پەی وەڵۍ شۊڕشوو ژەنی، ژیوای، ئازادی گێڵنۊوە و وێش بە باڵادەس و قەوەت نیشانە بدۊ. ئینەیچە ئینا وەختێوەنە لاوازی و هیچیی ڕژێمی وەراوەروو داواکارییەکاو ژنا و گەنجاوە، لاو گرد لێوە ڕۊشن و ئاشکران.
چێگەوە ئێمە پێسە گلێرگەو ژەنە ئازاداو وەرکەوتوو کوردستانی (کژار) کوشتەی ئارمیتا گراوەندۍ بە دەسوو دەوڵەت بەتندی شەرمەزار کەرمۍ و داوا وەنەو گلێرگەی ئازادیوازوو ئێرانی کەرمۍ، کە وەراوەروو ئی تاوانەینە بێدەنگۍ نەبا. داواکاریی گەلا بە سەرمەشقایەتیی ژەنا و گەنجا، جارێوە تەر ئانەش نیشانە دا، کە تا ئا وەختە ژەنی ئازادۍ نەبا، گلێرگەیچ ئازاد مەبۊ. پی ئاراستە درێژەدای بە کۊشیای، بۊ بە قۊرتێوە و وەربەسێوە وەرڎەموو ڕژێموو دیکتاتۊریی ئێرانینە و ڕا پەی یاوای بە ئازادی وەش کەرۊ.
