سەڎان کەسۍ بۊنەو ساڵیاڎوو پیلانگێڵنیی میان نەتەوەیی ١٥ و شوبات و سەروو ڕابەروو گەلوو کوردی عەبدوڵا ئۆجالانی جە لەندەنەنە کوۍ بیێوە و ڕاپیمایۍ درێژشا کەرد، واتشا: "جەهانوو بێ عەبدوڵا ئۆجالانی سەرتارە وڕنمۍ".
بۊنەو پیلانگێڵنیی میان نەتەوەیی ١٥ و شوبات و سەروو سەروو ڕابەروو گەلوو کوردی عەبدوڵا ئۆجالانی سەڎان کەسۍ ۋەروودەموو یۊبڕو داڵستۆنینە جە لەندەن و پایتەختوو بەریتانیای کوۍ بیێوە. ئەنتەرناسیۆنالیستۍ و نوێنەروو ڕێکوزیا دیموکراتیکەکایچ بەشدارۍ چالاکییەکەی بێنۍ.
جەماوەرەکە ئاڵا و وێنۍ ڕابەروو گەلوو کوردی عەبدوڵا ئۆجالانیشا بەرزکەردێوە و درووشمەکا "مرۆ پیلانگێڵنی، مرۆ فاشیزم" و "بژیۋۆ سەرۆک ئاپۆ" و "بێ سەرۆکی ژیۋای مەبۆ" و "بژیۋۆ مدرامانوو زینڎان"یاشا بەرزکەردۍ، نەشیدەو نەتەوەیی کوردی واچێنێوە. دماو دەیەقێوە ڕێزگرتەی جە گەشمەرڎا، دەموو نەشیدەکاوە دەربارەو ڕابەروو گەلوو کوردی عەبدوڵا ئۆجالانی و مدرامانوو گەریلای، ڕیزوو هۊرپڕایشا بەست.
ئەنداماو تەڤگەروو گەنجا شۆڕشگێڵنوو بەریتانیای کە ٣ ڕوێن مانیشا جە واردەی گێرتەن، بەشدارۍ چالاکییەکەی بێنۍ.
هامسەرۆکاو مەجلیسوو گەلوو کوردی بەریتانیانە، سایت سوروج و ئاسۆ کەمالی قسێشا کەردۍ و پیلانگێڵنیی میان نەتەوەیشا شەرمەزار کەرد، سڵامشا جە هەڵمەتەو ئازاڎیی کەرد و واتشا: "گەل حیچ وەخت ڕا بە پیلانگێڵنا و ڕژێموو فاشیستی و ئەرەگیری تورکی مەڎۆ. ئی گەلە تا ئازاڎیی جەسڎەیی ڕابەر ئاپۆی بەدەس نارۆ، جە کۆڵانە و مێڎان و کەش و شارەکانە مدرامان و کۊشیای کەرۆ".
هاموڵاتیا دەوروبەری پێشوازیێوە گەرمشا جە ڕاپیماکەی کەرد، چالاکا بەدرێژایی ڕاپیماکەی درووشمێشا بەرزکەردێوە و جە مێڎانوو مانۆر هاوسینە چالاکی ئەرەنیشتەیشا ئەنجامدا و پۍ ماوێوە ئاماو لوای جاڎەکەیشا بەست.
دماتەر جەماوەر لووۍ پۍ هەرێمو هارینگەی کە کوردسانیۍ چنەشەنە ئەرەنیشتێنۍ و ڕاپیمایشا کەرد، ڕاپیماکەی ۋەروودەم و ناوەنڎوو گلێرگەو کوردینە جە لەندەن دمایش ئاما و چا کۊبیەیۆ گەلی ئەنجامدریا.
