ماوەو دووۍ مانگانە ئێراننە ٤٦ ژەنۍ و کناچۍ کوشیێنێ
بە پاو ڕاپۆرتەو نوژنهای، بەینوو مانگەو کانوونوو دووەمی و شوباتینە ٣٤ ژەنۍ و کناچۍ ئێراننە کوشیێنێ. 12 ژەنۍ و کناچێش بەگوماناوی مەردێنێ.
ئێرانەنە کوشتەی ژەنا و مەردەی گوماناویی ژەنا ڕۆ بەڕۆ دماو فرەبۆ، بۆنەو سیاسەتوو حکومەتیوە. بە پاو ئا ڕێژەیەیە کە نوژنهای وەڵا کەردەنۆ، بەینوو مانگەکاو کانوونوو دووەمی و شوباتینە ٤٦ حاڵەتۍ کوشتەی و مەردەی گوماناوی ئێراننە ڕووەشا دان.
ئاماروو تندوتیژی مانگەو کانوونوو دووەمی و شوباتی پێسنەن؛
* ٢ کانوونوو دووەمینە؛ شاروو مەرەندینە ٢ ژەنۍ گەنجۍ مڕافانیا و کوشیا، ژەنێوە ٦٥ ساڵەی ئەرەنیشتۍ تارانی بۆنەو دزییەی کەلوپەلوو مۆبیلیاتیوە پاسەوانوو بینێکۍ کوشتە و یوە گەنجەیچ تاراننە کوڕەکەیش کوشتە. ژەنێوە شاروو ئەردەبیلیچ بنەیانەکەیش کوشتە.
* ٢٢ کانوونوو دووەمی؛ شیرازنە ژەنێوەگەنجە براڵەکەیش کوشتە.
* ڕۆو ٢٣ کانوونوو دووەمی کناچێوە ١٦ ساڵە بە نامۍ شیرینێوە بە گوماناوی مەشهەدنە مەردە، هەرپاسە پردیس کەریمییەی ١٤ ساڵەو سنەی بە گوماناوی مەردە. هەروی بە 'وێکوشتەی' مەردەیشا تۆمار کریان.
*ڕۆو ٢٤ کانوونوو دووەمی، ئەداو ٢ زارۆڵا، کە ٣٢ ساڵۍ بۍ بە نامۍ ئەفشان فەتحیانۍ بە گوماناوی مەردە.
*ڕۆو ٢٥ی کانوونوو دووەمی، کناچێوە ١٧ ساڵە بە نامۍ فەرزانە قادری ئەقدەمۍ خەڵکوو دەگاو مەشکانوو سەر بە شاروو پیرانشاری، بەگوماناوی مەردە. کە مەردەکەیش بە 'وێکوشی' تۆمار کریان. ژەنێوە گەنجەی ٢٥ ساڵە بە نامۍ فایزەی کە شاروو کۆڤاروو سەر بە پارێزگاو فارسینە بێ، پیاجیابیەوەکەیش کوشتە.
*ڕۆو ٢٦وو ڕابەندان، کناچێوە ١٥ ساڵە نامێش هاوژین مستەفاپوورە بۍ و خەڵکوو مەهابادی بۍ بەگوماناوی مەردە.
*ڕۆو ٢٩ کانوونوو دووەمی، کناچێوە ٩ ساڵە، کە شناسنامەکەش نمەزانیۆن شاروو یەزدینە زڕئەدێکێش کوشتە.
*ڕۆو ٣٠ کانوونوو دووەمی، وانیارێوە پۆلوو یەکی بە نامۍ فاتمەی خەڵکوو کەرەجی هامسێوەشا کوشتە.
*ڕۆو 1 شوبات، ژەنێوە تەمەن مردێ، نامێش گۆلی یاقووبییە بۍ و کناچێوە گولانێش بە نامۍ ڕازیە شەبانیانۍ یانەکەکشانە دەگاو ئەلکابادینە بۆروکاردنە، لوڕستانە نەشناسێوە کوشتێ. ژنێوە ٢٧ ساڵەیچ بە نامۍ زەهرا نازاریانێوە زیندانوو سێبزێوەرینە ورواسیا.
*ڕۆو ٥ شوباتی، ژەنێوی ٣٠ ساڵە و ئەدێوی ٦٠ ساڵە یانەو وێشانە تاراننە نەشناسی کوشتێ.
*ڕۆو ٦ شوباتی، جەنازەو ژەنێوی گەنجۍ ٢٢ ساڵۍ بەنداوو قاراقاچینە شاروو سەمیرەموو سەر بە پارێزگاو ئیسفەهانینە وێزیاوە. هەڵای حیچ زانیاریێوەش سەر نیا کە چەنی مەردێنە و شناسنامەکەش ئاشکرا نیا. شاروو گەرمسارینە ژەنێوی٦٠ ساڵە کە هەڵای شناسنامەکەش ڕۆشن نەبیەنۆ کوڕەکەیش کوشتە. ژەنێوی گەنجەی٣٠ ساڵە تاراننە هەڵا شناسنامەکەش ئاشکرا نیا، سەروو پردێوی وێش وزۆرە وارو مرۆ. ژەنێوی ٤٥ ساڵە کە شاروو بۆروجردینە پارێزگاو لۆرستانینە مژیوۆ، کوڕەزاو پیاکەیش کوشتە.
* ٧ شوباتینە؛ ژەنێوی گەنجە ئەندیمشکنە سەیارەکەشنە پۆلیسی کوشتە، کناچێوە ١٦ ساڵە بە نامۍ نارین یوسفێوە خەڵکوو دەگاو بانیلاوانوو جوانڕۆی، بە گوماناوی مەردە.
* ١١ شوباتینە؛ ژەنێوی ئەفغانییەی ١٨ ساڵە بە نامۍ زەینەب م.، کە شاروو مەشهەدینە ژیوێ،مێردەکەیش کوشتە.
*١٢ شوباتی؛ ژەنێوی گەنجە و مێردەکەش و وارەزێوەش شاروو چواربازاڕوو سەر بە کەرماشان-شابادینە (وەرنیشتوو ئیسلام ئاباد) نەشناسێوە کوشتێ. جەنازەو ژەنێوی گەنجۍ ٣٥ ساڵۍ نامێش ڕوقییە کەلهوڕییە و خەڵکوو پیرانشاری بێ، بەنداووو سیلوەینینە وێزیاوە. کناچێوە ١٣ ساڵە نامێش هۆنیا بەهرامییەو خەڵکوو سەقزی بێ، بەگوماناوی مەردە. ژەنێوی گەنجەی ئەرەنیشتۍ تەورێزی مێردەکەیش کوشتە.
* ١٣و شوباتینە؛ تاراننە، ژەنێوی ٢٤ ساڵە نامێش سەمیرە بۍ مێردەکەیش کوشتە.
* ١٥و شوباتینە؛ ژەنێوی ٤٢ ساڵە نامێش مریەمە بۍ و تاراننە بێ، دەزگیرانەکەیش کوشتە، ژەنە زیندانیێوە کە هەڵای شناسنامەکەش دیار نییا، کە حوکموو ئێعدامی دریێبێ، بەگوماناوی زیندانوو تارانینە مەردە. ژەنێوی ٤٠ ساڵە بە نامۍ گوڵاڵە کەریمییەو خەڵکوو دیواندەرەی بەگوماناوی مەردێنە. تاراننە ژەنێوی٤٠ ساڵە بە نامۍ فەتانەیۆ دەسگیرانەکەیش کوشتە. ژەنێوی ٥٣ ساڵە نامێش مەهنازە بۍ و تاران بەمەردەی وێزیاوە، زانیا کە چێوە بەنرخەکێش دزیێنێ. ژەنێوی گەنجە نامێش شوهرە بۍ و تاراننە بێ، نەشناسێوە کوشتە.
* ١٨و شوباتینە؛ شاروو فەریابوو سەر بە پارێزگاو کرمانینە، پیاێوی٢٥ ساڵە، ئەداش و ٢ واڵێش و ژەنەو براکەیش و ٢ کناچۍ و ٤ کوڕەزێش کوشتێ، کە گردیوە١٢ کەسۍ بێنێ، جەنازەو ژەنێوی گەنجۍ کە بە ماددەی سۆچنەر کوشیێبۍ سەروو ڕاو وارامینیوە وێزیاوە.
* ١٩ شوباتدا؛ ژەنێوی گەنجە کاشاننە مێردەجیابیەوەکەیش کوشتە.
