گەریلاکاو یەژاستاری یادوو گەشمەرڎە گوڵناز کاراتاش (بێریتان هێڤی)یۍ یوە جە فەرماندە سەرمەشقەکاو پەکەکەیشا بەرز ئرمانا. جە ساڵەو ١٩٩٢ هێزە دارڎەسەکۍ پانیشتوو کوردستانی دژوو جمیەروو ئازادیی کوردی دەسشا بە جەنگێوە چەپەڵی کەرد. فەرماندە بێریتانە، کە دژوو خیانەتی مدرامانی گەورەش کەرد، تا وێش نەدۊ دەسوو هێزە دارڎەسەکاوە جە ٢٥وو تشرینوو یوەموو ١٩٩٢ وێش وستەرە وار کەشوو لێلیکانیوە. دماو چالاکیەکەو گەشمەرڎە بێریتانۍ، دلۍ جمیەروو ئازادیی کوردینە بناغەو سوپابییەی ژەنا نریارە.  

گەریلا ئارین مەروانە ئەوەڵوو قسەکاشنە  باسش سەروو کاریگەریی چالاکیی گەشمەرڎە بێریتانۍ پێسە کەرد: "من فەرماندە بێریتان هێڤیۍ جە ٣١ەمین ساڵیادوو گەشمەرڎەبییەیشنە بە ڕێز و پەنەزانایۊ یاد کەرووە. پێسە  مزانییۊ فەرماندە بێریتانە یوە جە یوەمین فەرماندەکاو ئێمەی ژەنانە، کە دلۍ جمیەروو ئازادیینە دا کۊشیێنە. هامڕا بێریتانە سەرباروو گردوو هجوومەکاو دوژمنی چۊکێش نەدێرە و حەرگیز خیانەت و تەسلیمبییەیش قبووڵ نەکەرد. هامڕا بێریتانە بە مدرامان، چالاکی، هەڵوێست و کۊشیایش کاریگەریی گەورەش نیارە. تا نەگنۊ دەسوو دوژمنی ئەوەڵ چەکەکەیش ماڕۊ و دماتەر کەشیوە وێش وزۊرە وار. دماو ئا چالاکییە گەورە و کاریگەرەیە  قەراروو ئەرەمەرزنای سوپاو ژەنا دریا. جە سایۍ هامڕا بێریتانێوە ئاستوو کۊشیای ژەنا زیاتەر بەرز بییەنۊ. هەمان وەختنە مدرامانوو ژەنا جە هامڕا زیلانێوە تا هامڕا ڤیانە یاوا خاڵێوە گەورەتەرە. ئێمە سەروو بنەماو کۊشیای و مدرامانوو بێریتانەکا، زیلانەکا و ڤیانەکا کۊشییەیمۍ. جمیەروو ژەنا و ڕێکوزیایەکاو ژەنا ڕۊ دماو ڕۊی دوای شار و کەشەکانە گەورەتەرۍ با.  ئیتر ژەنی دژوو گرد نۊعە هجوومەکا مرڎاوە و وێشا پارێزنا.

گەریلا جە سەنگەرەکاو جەنگی و تونێلەکانە  بەرڎەاوم دژو دوژمنی مدرامان کەرا. بەتایبەتی گەریلا ژەنەکۍ بە چالاکیی کاریگەر و بەئەنجام خەریکێنۍ. پێسە ھامڕا سارا و ڕوکنۍ کە بە چالاکییە گیانبازییەکەیشا دوژمنشا شۊک کەرڎ. کۊشیۍ و مدرامانوو ئارۊیشا سەروو بنەماو ئا بەهایا، کە ئا هامڕا گەشمەرڎا خولقنا، بە ئەنجام میاوۊ. پێسە گەریلێوە یەژا ستاری، سەروو ڕا و ڕێبازوو هامڕا بێریتانۍ ملوو ڕاوە. هەلومەرجەکۍ حەرچندە دژوارۍ با، پێویسا گەنجۍ بەشدارۍ دلۍ  ڕیزەکاو جمیەروو ئازادیی با.پێسە متاومۍ هەقەو هامڕایاما وەنەو دوژمنی کەرمێوە و وەرمەکاشا بارمۍ دی. ڕابەر ئاپۊ ورسەنگنایەکاشنە ماچۊ ، 'ئەگەر پەی ژەنۍ تەنیا یەک ژیوای بۊ، ئانە ژیواێوە ئازادانەن' پێسە ژەنە گەریلاکا، ئێمەیچ ئانەیە بە بنەما گێرمێ".

ھامڕا بێریتانە فەرماندێوە سەرمەشقە بۍ
ڕاپەڕین زنارە، گەریلێوە تەرەو یەژاستاری واتش،  ئارۊ بەرەکاو جەنگینە بە ڕۊحوو مدرامانوو بێریتانێوە  دژوو هجوومەکاو دەوڵەتوو تورکی گژیا و واتش: "وەڵۍ گرڎ چێوێنە بە ڕێز و پەنەزانایۊ جە کەسایەتیی ھامڕا بێریتانێنە یادوو سەرجەموو گەشمەرڎەکا کەرمێوە. ھامڕا بێریتانە یوە جە فەرماندە گەورە و سەرمەشقەکامانە. هامڕا بێریتانە بە چالاکییە مەزنەکەیش دەورێوە گەورەش جە بونیادنیای سوپاو ژەنە ئازادانە بۍ. پێسە ڕاویارە و ڕاو  دا هامڕا بێریتانۍ، سەروو ئا خەتێوە مدرامان کەرمۍ کە جیاش ئاستە. هامڕا بێریتانە دژوو خیانەتی و هامکاری، مدرامانش ورچنی و پێسە گەریلاکاو یەژاستاری ئامانجەکاو  گەشمەرڎاما مارمۍ دی."