فەرماندەو گرڎیی هێزەکاو سوریای دیموکراتیکی (قەسەدە)ی مەزڵوم عەبدی و سەرۆکو دەسەو تەحریر ئەلشامی (هەتەشە) محەمەد جۆلانی (ئەحمەد شەرع) کە پېسە سەرۆکو کاتی سوریای ئەرەیاۋېیان، کوۍ بیێوە.

جە ئەنجامو گلېرۊبیەکەینە، مەزڵوم عەبدی و جۆلانی سەرو ئی خاڵا ڕێکێکۊتێنۍ:

١- مسۆگەرکەردەی مافو گرڎو سوورییەکا پەی نوێنەرایەتی و بەشداریکەردەی جە پرۆسەو سیاسی  و ئەرەمەرزیاکا دۊڵەتی سەرو بنەماو چنەئامایی، بەبێ گۊشدای بە پاشخانی ئایینی و نەتەوەیی.

٢- گلېرگەو کوردی، گلېرگێوە ڕەسەنو دۊڵەتو سوریایا و دۊڵەتو سوریای هاموڵاتیبیەی و گرڎو مافە دەستوورییەکا کوردی مسۆگەر مکەرۆ.

٣-  ئایێربەس جە سەرانسەرو سوریاینە ئەرەیاۋیۆ.

٤- تێکەڵکەردەی گرڎو ئەرەمەرزیا مەدەنی و سەروازییەکا سەرنیشتوو ۋەرکۊتوو سوریای چنی ئیدارەو دۊڵەتوو سوریای، چانیشا دەروازە سنوورییەکۍ و فڕگەخانەکۍ و کێڵگە نەوتی و گازییەکۍ.

٥- ئا سوریۍ جە ماواو ۋێشانە ئاوارۍ کریێنۍ، گێڵاوە پەی دەگا و شارەکا ۋێشا و جە لایەنو دۊڵەتو سوریایۆ پارێزیانە.

٦- هەماهەنگی چنی دۊڵەتو سوریای جە وەرنگاربیەیۆ ئەوەمەڼنەکا ئەسەدی و گرڎو مەترسییەکا سەرو ئەمنیەت و یۊبیەی سوریای.

٧- قسۍ قیناویۍ و هەوڵدای پەی وەڵا کەردەیۆ ناتەبایی و بانگەوازو بەش بەش بیەی دلۍ گرڎو پێکئامایەکا گلېرگەو سوریاینە، ڕەڎ مکریۆوە.

٨- لوجنەکۍ جابەجێکەردەی، هەرمانە مکەرا پەی ئانەی تا ئاخرو ئێساڵی دلېینەو ڕێککەوتەکەی جابەجێ بکریۆ.