هامسەرۆکۊو تەڤ-دەمی ڕەمزییە محەمەدە پەی ئاژانسوو هەواڵوو فوراتی قسێش کەردۍ و ئاماژەش پانەیە دا کە ڕابەر ئاپۆ جە پڕۆسێوە فرە هەستیارەنە بانگەوازێوە تاریخیش کەرد، ڕەمزییە سەرنجش وست سەرو گرنگی ئی بانگەوازیە.

ڕەمزیە محەمەدە ئاماژەش پانەیە دا ئینە جاری یووەم نییا جە لایەنو ڕابەر ئاپۆی و پەکەکەیۆ بانگەوازو چارەسەری مکریۆ و واتش: "جە ساڵانی ۋېیەردەنە چڼین جارۍ ڕابەر ئاپۆ و پەکەکە هێڵۊو چارەسەریشا پێشکەش کەرڎەن. بانگەوازەکەو ڕابەر ئاپۆی پەی ئاشتیی و دیموکراسی تەنیا پەی گەلوو کوردی نییا، ئینە چارەسەری پرسو کورد و تورکین. ئەر بەرژەوندی گەلا ۋەروچەما گیریۆ، کێشەکۍ چارەسەرۍ با".

ڕەمزیە جە بەردەوامی قسەکاشەنە ئاماژەش پانەیچ دا بانگەوازو ئاشتیی پەی بنیاڎنیای ئاشتیی و مردنای ئەرەگیریا و پی جۆرە بەردەوامە بیە: "ئی بانگەوازو ئاشتیی و دیموکراسییە چنی ۋێش ئاشتیی دلۍ گلېرگەینە بنیاڎ منیۆ، ئەرەگیری مردنۆنە و گلېرگە مافو ۋێش بە دەس مارۆ، متاوا کلتوور و شناسنامەو ۋێشا بە دەس بارا. گەلوو کوردی پەنەوازا جە جەهانەنە داراو ئیرادەی بۆ، ۋەرو ئانەی لایەزال سیاسەتو قڕکەردەی سەرو گەلوو کوردیرە بملۆڕاوە. جە ۋەرا ۋەرو ئی پڕۆسەینە گرڎ کەسۍ ۋەرپەرسا".

واتیچش: "ئی بانگەوازو ئاشتییە کە جە ساڵەکا ۋېیەردەی و ئیساتێچەنە جە لایەنو ڕابەر ئاپۆیۆ مکریۆ، گرڎ کاتۍ یەک لایەنە مەنۆ. دۊڵەتو تورکی ۋەرپرسیاری نمەگېرۊنە ئەستۆ. ۋەرو ئانەی سیستەمو دۊڵەت نەتەوەی گەرکشا سیستەمەکە بە شکڵ و ۋێش بلۊڕاوە، بەڵام پڕۆژەو ڕابەر ئاپۆی جە دلېینەنە هۊرگێرۆ، کاتێ گەل بیەی و ئیرادەش جە پڕۆژێوەنە موینۆ، بەرەو ئا پڕۆژەیە ملۆ.

جە ۋەرا ۋەرو بانگەوازو ئاشتیی و دیموکراسی ڕابەر ئاپۆینە، دۆڵەتو تورکی چڼین ۋەرپرسیاریێش هەنۍ. بانگەواز کریا و پەی چارەسەریچ ڕابەر ئاپۆ چڼین خاڵۍ گرنگێش وستۍ ڕووە. پڕۆسەکە دەسش پنەکەرد، مشۊم هەنگام بنریۆ. یۆ چا هەنگاما؛ مشۊم ڕابەر ئاپۆ بتاوۆ چنی گلېرگەی گفتوگۆ بکەرۆ، دۊڵەتو تورکیچ جەنگ مردنۆ. مشۊم دۊڵەتو تورکی هەنگامەی جدیە و گرنگە بنیۆ".