پارێزنەر مسەفا نیلی پارێزنەرو نێرگس محەمەدیۍ جە پەلیانەو ۋێشەنە جە تۆڕەو ئێکسینە جە بارەو دماین ئاژەو نێرگس محەمەدیۍ زینانیەی سیاسیێوە زانیاری تازەش وەڵا کەرڎۆ.

مسەفا نیلی ئەرەیاۋنانش کە دماو ئانەی نەشتەرگەری پزیشکی پەی نێرگس محەمەدیۍ کریان، جارێوەتەر گێڵنێنەشاوە پەی گێرتەخانەو ئېۋینی: "بە مەڵامەتو نۆعیەتو نەشتەرگەری و یاگۍ زامەکەیشۆ، دکتۆرەکۍ پێشنیارشا کەرڎەن کە پەی ماوەو یەرۍ مانگا چېرو چەمڎارینە بۆ."

مسەفا نیلی ئاماژەش پانەیچ دان کە نێرگس محەمەدیە دماو نەشتەرگەری پەی ماوەو حەفتێوە جە خەسەخانەنە مەنێبێوە.

نیلی ئانەیچش ئەرەیاۋنان، کە بە مەڵامەتو ئاژەو تەندروسی نێرگسێوە و پێشنیارو دکتۆرەکاوە داواو ئیجازەی و مردنای سزاکێش جە دادگانە کەرڎەن.

یاگۍ ئاماژەیەنە کە دووۍ حەفتۍ چێوەڵی پارێزنەر مسەفا نیلی ئەرەیاۋنابێش، به پاو ئەنجامو وشکنایە سەرەتاییەکا گومانو تووشبیەی  بە چێرپەنجەی جە نێرگس محەمەدیۍ کریان.

چالاکەو مافەکا مرۆڤی نێرگس محەمەدییە کە خەڵاتو نۆبڵیش پەی ئاشتی هۆرگێرتەن جە ماوەو ٢٠ساڵی ۋېیەردەینە زیاڎ جە ١٠ ساڵا جە ژیۋایش زینانەنە بەردەن سەر.