فەرشاد گردکانە وەرزشەوانو کوردی، کە جە پاڵەوانیەتی وەرنیشتو ئۆروپاینە پەی وەرزشو هونەرە وەرگیرییەکا جۆجیتسۆی دووێ مەدالیۍ ئاڵتونیێ و برۆنزێش بەدەسئاوردێ، هەرڎووە مەدالیێکێش پێشکەش بە وەریشە مورادیۍ و پەخشان عەزیزیۍ کەردێ.
پاڵەوانێتیەکە جە بروکسێلو پایتەختو بەلجیکاینە لواڕاوە، فەڕشاد گردکانە تاواش جە کێشو ٩١ کیلۆگرامینە مەدالیای ئاڵتونی و برۆنزی بەدەسبارۆ و دماو هۆرگێرتەی مەدالیاکا بە زاراوەو کەلهوڕی پەیامێوە ڤیدیۆییش وەڵاکەردۆ و مەدالیاکێش پێشکەش بە وەریشە مورادیۍ و پەخشان عەزیزیۍ کەردێ کە سزاو جەقەنارەدایشا سەرەرە سەپیان.
فەرشاد گردکانە سەرەڕاو بەربڕییەی ناڕەزایۍ تنی وەرا وەر بە بەرکەردەو سزاو جەقەنارەداینە سەرو مورادیۍ و عەزیزیێرە پەشتیوانی وێش پەی زینانیا دۆسیەو ئێکباتانی بەربڕی، کە بە مەڵامەتو بەشداری کەردەیشا جە وێنیشانداکا سەرهۆردای ژەنی، ژیوای، ئازادینە رووبەڕوو گیرتەی و سزای قورسی بیێوە.
ئا وەرزشکارە کوردە کە خەڵکو کرماشانیا، وەڵتەریچ مەدالیێکێش پێشکەش بە خەڵکو بەلوچستانی کەردێبێنێ، هەرپاسە جە رەوتو سەرهۆردای "ژەنی، ژیوای، ئازادی"نە پێسەو وەرزشەوانێوە خاوەن هەڵوێسی بەردەوام پەشتیوانی چا سەهوردایا کەرێ.
