پاریسنە کۆنفرانسوو کۆشیای دژوو ڕەگەزپەرسی
کۆنفرانسێوە بە نامێ "کۆشیای دژوو ڕەگەزپەرسی" پاریسنە، پەی ڕاگێری جە ڕەگەزپەرسی گردوو بوارەکاو ژیواینە، قەرارێ ڕادیکاڵێ دریێ.
پاریسوو پایتەختوو فەرەنساینە لاو تەڤگەروو ژەناو کوردوو فەرەنسایۆ (تەژەکە-فە) بە ناموونیشانوو "کۆشیای دژوو ڕەگەزپەرسی" کۆنفرانسێوە کریا.
ئەنداماو ئەکادیمیاو ژەنۆلۆژی نەجیبە قەرەداغییە، یاسەمین عەدنانە، ئەندامەو تەڤگەروو ژەنە کورداو ئەورووپای گۆنول کایا بەشدارێ بێنێ، جە کەسێتیی گەشمەردە ئەڤین گۆیێنە یاڎوو گردوو ژەنە مدرامانکەرا کریاوە.
کۆنفرانسەکە بە یەرێ بەشێ کریا، دلێشنە ئەوەخوای کریاوە قسەکێ ڕابەروو گەلوو کوردی عەبدوڵڵا ئۆجالانی "بێ ئازاڎیی ژەنێ، جڤاک ئازاڎ مەبۆ" بناغەو کۆشیایی ژەنەو کوردی ئازاڎی و ئامانج و ستراتیژی بنەڕەتیی ژەنان.
هەرپاسە جەخت کریاوە، پێویسا ژەنی چێروو چەترەو ژەنۆلۆژیینە کوێ باوە و کۆشیایی هامبەش کەرا دژوو سیستموو نەتەوە-دەوڵەتی، کە سەروو بناغەو دەسەڵاتوو تاتەسالاریی ئەرەمەرزیان.
ئەنجامنامەو کۆنفرانسەکەینە چند قەرارێوە گرنگێ دریێ پێسە:
- ئەوەخوای کریاوە، مشۆم دژوو ڕەگەزپەرسیی جڤاکی، دیدگاو ژەنێ ئازاڎێ سەروو بناغەو فەلسەفەو ڕابەر ئاپۆی و ئایدۆلۆژیای ئازاڎوو ژەنێ مەرزیۆرە، پێسە چەنی ڕابەر ئاپۆ ئەوەخوایش کەردەنۆ، مشۆم "سیستمەکەما سەروو بناغەو خزمەتوو هەمان ژیوای ئازاڎیوە مەرزیۆرە و بە ڕەنگوو ژەنە ئازاڎا و پیای ئازاڎی و پەیوەندیی ئازاڎی مەرزیۆرە، مشۆم گرد لایێ سەروو بناغەو پارادایموو ڕابەرێتی بەشداریی پەروەردەی تاکەکەسی و بەکۆمەڵی با.
- تا چاندوو پێوەژیوای ئازاڎی بێ دی، پێویسا مۆدێرنیتەی سەرمایەداری یا مۆدێلوو نەریتوو پیای فیداڵی و ژەنی کلاسیکی ویەرنیۆ و شناسنامەو ژەنێ ئازاڎێ، کە لکی دریان بە شۆڕشوو ژەناوە گلێرگەنە چەسپنیۆ.
- گرنگتەرین تایبەتمەندیی سیستموو کۆنفیدراڵی دیموکراتیما ئانەنە، کە سیستموو نوێنەرایەتیی یەکسانی و هامسەرۆکایەتییش هەن. وەراوەروو ئا یاواینەی و ڕابازاوە کە ڕێکوستەی پێسە فۆڕمێوە موینا، ئیرادەو هامسەرۆکەکا نادیدە گێرا، قەرارەکا پەشتگۆش وزا و پێسە ئانەی تەنیا جابەجاکارێ با ویناش، پێویسا کۆشیایی چالاکانە کریۆ.
- سەروو بناغەو پیمەرەکاو ئایدۆلۆژیاو ڕزگاریی ژەنێ، کەردەی کۆشیایێوە چالاکی و قەوەتی.
- پا هۆشیارییە کە "بنەماکاو ئازاڎی سەروو بناغەو پارادایموو دیموکراتیکی و ئیکۆلۆژیکی و ئازاڎیی ژەنا ڕێک وزیان"، کۆشیای ڕەگەزی بە بەقەوەتتەرین شێوە دژوو پیمەر و پەیلوایە نەریتییەکا گرد بوارێوەنە کریۆ.
- کۆشیای چالاکانە دژوو ئا یاواینەی و ڕابازا، کە ئەوەکۆڵیای ژەنا بەپێویس نمەوینان، یانێ هەمیشە هەوڵێ مدا وزاشا بنەو دەسیشا، هەردەم ئەنجامی نەرێیی مدا پاڵوو ئەوەکۆڵیایەکاو ژەنا.
- دژوو ئا ڕەگەزپەرسییە کە مەیدانەکاو کۆشیای مەیا وەرۆ، کۆشیایێوە ڕەگەزیی ڕادیکاڵ گرد بوارێوەنە کریۆ دژوو هەڵوێستەکاو تاتەسالاری و نەریتپارێزنی و دەسەڵاتوازی.
- کۆشیای چالاکانە دژوو زوانی ڕەگەزپەرسانە و پیایانەی ژیوای جڤاکیینە.
- تندوتیژیی پیایا، کە جە ئەنجاموو کۆچبەری و وێرانکەردەی ئیکۆلۆژی و قەیرانە جڤاکییەکانە ڕووە مدۆ، هەرپاسە ئا وێرانکارییە کە بۆنەو هجوومە ئایینپەرسی و ڕەگەزپەرسییەکاوە تووشوو جڤاکی بۆ، پێویسا گفتوگۆش سەر کریۆ و چارەسەرەکێ دیاریێ کریا.
- سیاسەتێوە وەڵاکەردەیۆ جڤاکی-چاندی و فاڕیایواز بە بناغە بگیریۆ، کە بە بەقەوەتی پەرسە جڤاکییەکا مەیدانوو چاپەمەنیینە بەروزۆ، ڕا بە جڤاکی نیشانە بدۆ، ئیرادەو چارەسەرکەردەی بەروزۆ و کۆشیای دژوو ڕەگەزپەرسی کەرۆ بە چەقوو هەرمانێش.
-خەباتە چاندی و هونەرییەکێ، کە دەوری یەکلاییکەرەوەشا هەن، جە وەرگێریی ڕەگەزپەرسیینە، پێویسا بە ئامانجوو بنیاتنیای ئێستاتیکاو ژەنێ، فاڕیای پەیوەندی و شێوازوو ژیوای ژەنێ و پیای، بەروستەی ئەخلاقی ئازاڎی، بلا ڕاوە".
