بەرکۊت جە جەنگەکەو ئی دماییەو بەینوو پەدەکەی و سوپاو عێراقینە جە قەرەچوخ، ئەنڎامێوە میتیچ کە جلۍ چەکڎارا پەدەکەیش وەرەنە بیېنۍ کوشیان، فەرمانڎېوە پێشمەرگەیچ ماچۊ: حزوروو هێزی تورکی جە قەرەچوخەنە جە گوومانۍ بەرشیەن.
چەکڎارەکۍ پەدەکەی جە کەش و قەرچوخی بە تایبەتی دماو ئامای داعشی جە ساڵەو ٢٠١٥یۊ کە ئی هەرێمەشا رادەس و داعشی کەرڎ و دماو ئانەی کە گەریلاکاو هەپەگەی و یەژاستاری، ئەرەنیشتا کەمپوو گەشمەرڎە ڕۆستەم جودی (مەخمور)ی و هێزەکا پێشمەرگەی ۋۍ بەخش و سنوروو قەرەچوخی داعششا ماڕا، پەدەکە جارێوەتەر ئاماوە و حۊڵشدا ئا یاگۍ کە ڕادەس و داعشیش کەرڎېبېنۍ و بڕەمابۍ، بەڵام جە لایەن و گەریلاکا و پێشمەرگە ۋۍ بەخشەکاوە ڕزگار کریېبێنۍ، سەرجەنۆ هۊرشا گېرۊوە، بەڵام کە نەتاواش، ئی جارە چا بەشەو کەش و قەرەچوخینە کە بنەشا وستېبۍ بەردەوام بە فیتوو دەوڵەتوو تورکی ئەرەگیری دژوو گەریلاکا و خەڵکی مەڎەنی کەمپەکەی دوژمنایەتیش کەرڎ.
جە ٢٠١٥ حەتا ئیسە بە دەیان جارۍ فرۆکە جەنگیەکۍ و فرۆکە بێفرۆکەوانەکۍ دەوڵەتوو تورکیای ئەرەگیری بۆردومانوو کەمپەکەیشا کەرڎەن کە دەیان هاموڵاتیۍ مەڎەنیۍ بیېنۍ بە قوربانی. چی ماوە دماینەنە پەدەکە کە جە چەمساخی ۋېش پۍ تورکیای ئەرەگیری حیچ سنوورێوە مەشناسۊ بەردەوام بیەو گەریلاکا هەپەگەی و یەژاستاری کە پۍ پارېزنای خەڵکوو کەمپەکەی بە ڕسمی چا بېنۍ پېسە بەهانېوە پۍ رەوایی نیشاندای هجومەکا دەوڵەتوو تورکیای ئەرەگیری نیشانە مڎۊ.
چن ڕوۍ چېوەڵتەر فەرماندەیی قەرارگەو ناوەنڎی گەلی ئەرەیاۋناش، کە ئاڎۍ ئەرکوو ۋېشا جابەجۍ کەرڎەن و هێزەکا ۋېشا چا کیشناوە. دماو ئی ئەرەیاۋنایە دلۍ چەکڎارا پەدەکەی و سوپاو عێراقینە کە سەروو ئا سەنگەرا کە گەریلاشا چنە کیشیابېوە، جەنگ ئاما ئاراوە.
چا جەنگەنە بە پاو بڕۍ بانگەشا، ٣ چەکڎارۍ کوشیېنۍ کە پەدەکە تەنیا نامۍ دووۍ کەساش ئاشکرا کەرڎ و ئانەو یەرەمیشا شارتشۊ. هەر بە پاو ئی بانگەشەیە مەڵامەتوو ئاشکرا نەکرڎەی نامۍ یەرەمۍ پۍ ئانەی گېڵۊوە کە ئا کەسە بە جلۍ چەکڎارەکا پەدەکەیۊ چا بنەش وستېنە ئەنڎاموو میتی بیەن. حەرپاسە بەپاو ئەرەیاۋناکەی نامۍ ئی ئەنڎامەو میت و تورکی، کە دلۍ چەکڎارەکا پەدەکەینە بیەن ئەحمەڎ حسێن بیەن، جە عەسڵەنە نامېش یاڤوز ئەردەما.
جە هەمان بانگەشەنە ئامان، کە ڕۊو ٢٢ۍ ئی مانگۍ جەنازەو ئی سیخوڕەو میتی بە ترۊمبېل فاڕیانۊ پۍ هۊلېری و چایچۊ بریان پۍ دهۆکی. جە دهۆکیچۊ بە هڵیکۆپتەر بریانۊ پۍ تورکیای.
غازی فەیسەڵ، فەرمانڎەی ۋۍ بەخشوو پێشمەرگەی جە مەحاڵەو قەرەچوخینە سەبارەڎ بە مەڵامەت و کردەوەکا پەدەکەی چی مەحاڵېنە و بیەو میتوو تورکی دلېشانە پۍ ئاژانسەکەیما دووا و ئانەش وست ڕووە، کە بە ئاشکرا بەرگنۊ کە چەکڎارەکۍ پەدەکەی چنی بە فیتوو دەوڵەتوو ئەرەگیری تورکیای جە هەرێمەکەنە دەور گېڵنۊ.
غازی فەیسەڵ پاسە باسش کەرڎ:
'ئێمە جە چن ساڵی ۋیەرڎەنە گومانەما جە حزوروو میتوو تورکی بیەن سەروو کەش و قەرەچوخیۊ و چنڎین بەڵگۍ هەنۍ؛
یۋەم: جە کەمتەرین ماوەنە و کەمتەرین وەختەنە فڕۆکەو درۆنۍ تورکیای مەیانە سەروو کەمپوو گەشمەرڎە ڕۆستەم جودی و بۆردوومان کەرا و سەروو کەش و قەرەچوخیۊ گومۍ با.
دووەم: پارتی و بارزانی بەحیچ جۊرۍ قبوڵش مەکەرا هێزەکۍ ئێمە و حەتا ئەرەنیشتۍ مەنتیقەکەیچ بلانە سەروو کەش و قەرەچوخی و چنڎین لیوۍ تێکەڵېما هەنۍ نمازا بلا سەروو کەش و قەرەچوخی و تەنیا هێزوو پارتی و بارزانی یەکەو هەشتایش ئینا چنە. ئێمە ۋەروو چەما گرڎوو دنیېوە شش ساڵېن هێزێوە ۋېبەخشی سەرکەوتەما جە کادر و پێشمەرگە و جوتیارا مەنتیقەکەی وەش کەرڎەن و چنڎین پەلامارۍ داعشیما دلېنەبەرڎېنۍ و چنڎین بنکە و بارەگۍ داعشیما گېرتېنۍ، بەڵام پارتی نمازۊ بلمۍ سەروو کەش و قەرەچوخی.
جوتیارا و ئاژەڵدارا مەنتیقەکەی بژێوی ژیۋایشا کەش و قەرەچوخینە بیەن، بەڵام پارتی قبوڵش نەبیەن بلا سەروو کەشەکەی؛ پۍ گېڵای وسەیرانوو وەهارانیچ پارتی و بارزانی قبوڵشا نیا حیچ گەنجێوە بلۊ سەروو کەش و قەرەچوغی، تەنیا پێشمەرگۍ پارتی و کارمەنڎا کارگەو چیمەنتۆ و کاری ئازاڎېنۍ بلانۍ کەش و قەرەچوخی، بەڵام پۍ ماباقی گرڎ قەڎەغەن کە ئەرەنیشتۍ ڕەسەنوو مەنتیقەکەینۍ و مەتاوا بلا پۍ قەرەچوخی.
حەرپاسە چنڎین جارۍ قافڵە و کەژاوەو ترۊمبېلۍ جام سیاوۍ مەیا سەروو ئا کەشیە و بەنامۍ کۆمپانیاو نەوتۍ و فەرمانڎۍ سەروازیۊ، ئانېچ گومانەشا ناستېنۊ کە میت ئینا سەروو کەش و قەرەچوخیۊ.
پۊکەی ئی خاڵۍ کە سەرۊ باسما کەرڎۍ گرڎ بەڵگېنۍ سەروو بیەو هێزە ئەمنی و سەروازییەکا تورکیای و ئێمە پېسە یۊبیەی نیشتیمانی چېگە بە دمایچۊ مەتاومۍ دلۍ حکومەتێوە و وەزارەتێوەنە بیمۍ کە نەتاوا پێشمەرگۍ و کادرېما بەشدارۍ کاراشا بۊ جە پارېزنای و خزمەتوو هەرێموو کوردسانینە. پۊکەی بێجگە چا دەیان سەروازگا و هەرێمی و دەیان کۆمپانیۍ بەنامۍ نادیاریۊ، تورکیا خەریکا کۆنتڕۆڵوو تەماموو گرڎوو هەرێمی کەرۊ و تەنیا پارتەکەو بارزانی کارئاسانی پۍ تورکیای کەرۊ و کابینەو نۆی بەکارمارۊ پۍ ئارڎەو هێزی زیاتەروو تورکیای. جە دما دمایچەنە بیەو هێزی تورکی جە قەرەچوخنە جە گومانۍ بەرشیەن.'
