جە ١٤و نیسانوو ٢٠٢٢ێنە سپاو ئەرەگیرەو تورکی، هجوومش کەرد سەروو مەنتێقەکاو زاپی و مێتینا و ئاڤاشینی جە سنوورەکاو پانیشتوو کورڎسانینە، مدرامانوو گەریلاکاو هەپەگەی و یەژاستاری  دژوو ئا هجووما درێژەش هەن، وەلێم جارێوە تەر بەر کەوت، کە پەدەکە هامکاریی ئەرەگیرا کەرۊ.

ماوەى ویەرڎەنە هێزەکاو پەدەکەی ڕاو یاونای هامکاریی لۊجستییشا جە گەریلاکاو هەپەگەی و یەژاستاری بڕیێبۍ، جە چنڎ شۊنێوەنە دەورەو گەریلاکاشا دا و ڕاگێرییشا جە دەورگێڵنای گەریلاکا کەرد، بۊسەو گەریلاکاشا گێرت و ڕاشا پەی زرەپۊشەکاو سەروازاو تورکی وەشە کەرڎە.

هەپەگە چا بارۊ زانیاریێوە گرنگش وەڵا کەرڎۊ ماچۊ: هێزەکاو پەدەکەی ئی جارە لوۍ دلی سپاو تورکی ئەرەگیری، جە تەپوو هەکارینە بە کامێرە تۊمارما کەرد، کە چەنی پەدەکە خزمەتوو سوپاو تورکی کەرۊ.

ئاماژە پانەیچ کریان، پەدەکە مانگەو تەمووزیوە لوان پەی ئا مەنتێقەیە پەی ئانەی هامکاریی سوپاو تورکیای کەرۊ، ئینەیچ مانگەو ئابینە زیاڎش کەرد وەڵتەرێنە هێزەکاو پەدەکەی بە سەیارەی زرەپۊشۊ جەچوارگۊشەو "تێپ ئۊرتی میتینا"ینە ڕا و بارەگا و پەناگەشا وەش کەرڎەبۍ، ئینجا مانگەو ئابینە سوپاو تورکی ڕاو بەینوو یاگەکاو  مدرامانوو "تەپوو هەکاری و تەپوو ئامێدی"یش وەشە کەرڎە.

هەواڵەکەو هەپەگەینە باس چانەیە کریان: ئا خزمەتە کە پەدەکە کەرڎەنش و کەرۊش بە سوپاو ئەرەگیرەو تورکی، نەتاوانش ڕا جە مدرامانوو هێزەکاو گەریلای گێرۊ، گەریلاکاو هەپەگەی و یەژاستاری کە پایزنە چنڎین ئۊپەراسیۊنۍ شۊڕشگێڵنانێشا دژوو ئەرەگیرا کەردۍ، حەرپاسە جە 26-27وو تشرینوو دووەموو ٢٠٢٢ێنە گورزۍ قورسشا وەنەو سوپای تورکیای دا، ناستشا مەنتێقەکەنە مەناوە.

حەرپاسە هەپەگە ئانەیچش وستەن ڕووە، وەختێوە سوپاو ئەرەگیرەو تورکی تەپوو هەکاری-نە مەنۊ، هێزەکاو پەدەکەی بە هامکاریی سوپاو تورکی لوۍ، وەڵتەر سوپاو تورکی ئەرەگیری خەیاڵشا بۍ چی تەپەنە مەناوە وەلۍ نەتاواشا، هێزەکاو پەدەکەی سەروو ئی تەپیوە بنکەی سەربازییشا مەرزنارە، وەروو ئانەی گەریلا هجووم نەکەرۊ سەروو تەپوو هەکاری، حەرپاسە هێزەکاو گەریلای جە یەرۍ بنکانە عەلەمەو حوکمەتوو هەرێموو کورڎسانیشا یەرۍ تەپانە چا یاگانە ور گێرتۊ.

هاموەخت پەی پارێزنای سوپاو تورکی دژوو چالاکیی گەریلاکا، عەلەمەو حوکمەتوو هەرێموو کورڎسانیشا جە بارەگای سەربازیی سەروو تەپوو سێداریوە بەرزە کەرڎۊ، کە ملۊ سەروو تەپوو هەکاری، هەپەگە ماچۊ: ئێمە ئینەما بە کامێرە تۊمار کەرڎەن، وەلۍ حیچ زانیاریێوە ڕۊشن نەوزیان دەسۍ، کە چە هێزێوە چی بنکەنە بیێنۍ.

ئیساتۍ بنکەو هێزەکاو پەدەکەی سەروو کەشەکاو ئامێدیوە هەن، وەڵتەر ئی یاگۍ جەنگی قورسشا چەنە کریان، ئینە جگە ئانەی عەلەمەو حوکمەتوو هەرێموو کورڎسانی سەروو پایگاکاو سوپاو تورکی ئەرەگیریوە هەنە، کانوونی یوەمی ویەرڎەنە سوپاو تورکی هێزەکاو وێش چا یاگێنە کێشنێوە، کە نامێش "مەیدانوو کۊماندۊی" بۍ و دماتەر فاڕیایۍ چانەش کەرد.

تەپوو هەکاریی نزیکەو ١٥ کیلۊمەترا جە سنووروو تورکیای و عێراقیوە دوورا و بەرزتەرین شۊنەو ئامێدیینە، پەوکای دەورێوە ستراتیجییش هەن، تەپوو هەکاری پا ڕاێرە کە پەدەکەی وەشە کەردێنە، بە خەتەی سنووریێوە بەسیێنۊ، پی نۊعە سوپاو تورکی تانکۍ و زرەپۊشۍ و کەلوپەلە سەروازییەکاو وێش یاونۊ تەپوو هەکاری.

س.ز