ئارۊ شانڎو ھۊرچنیاو پەدەکەی و یەنەکەی جە بارەو پەرسو ھۊرچنېاکا ھەرێمو کورڎسانېۊ کۊبېێۋەو دماتەر ئەرەیاۋنێۋە ھامبەششا ۋەڵاو کەرڎۊو چنەشەنە ئاماژەشا پانەی کەرڎ کە ئەنەیاۋایشا سەبارەڎ بە ھەموارەو یاساو ھورچنیای و وستەیۊ ھەرمانەو کۊمسېۊنو ھۊرچنیاکاو ڕاپەرسیۊ ھەن.

جە ئەرەیاۋناکەنە ئامان؛ جە گلێرۊبیەیۍ ئەرێنېەنە ئەنەیاۋایۍ ھامبەشما بۍ پۍ پەرسو ھەموارەو یاساو ھۊرچنیاکاو وستەیۊ ھەرمانەو کۊمسېۊنو ھۊرچنېای و ڕاپەرسی، پۍ ئا مەبەسیچە نوێنەرۍ ھەرڎویلای  جە پەرلەمانو کورڎسانی دەس بە ھەنگامە یاساییەکا مکەرا.

حەرپاسە ئاماژەیچشا پانەی کەرڎەن، کە پەیلواو پارتەکا تەریچ ۋەروچەما گێرانۍ و پێکئامێکێچ تێبېنیەکێشا ھورگېریانۍ سەبارەڎ بە نوێنەرەکاشا.

زاناو مەڵا خالیڎی سەرۊکو فراکسیۊنو پەدەکەی جە پەرلەمانو کورڎسانی و زیاد جەبار سەرۊکو فراکسېۊنو یەنەکەی جە پەرلەمانو کورڎسانی کۊنگرێۋە ڕۊنامەوانی ھامبەششا جە بارەو گلێرۊبېۊکەو ئارۊیشاۋە ئەنجامداو پەدەکە ماچۊ:'' چنی یەنەکەی ئەنەیاۋای عالما ھەن، خاڵە ھامبەشەکێما فرەتەرۍ بیێنۍ".

سەرۊکو فراکسېۊنو پەدەکەی ئانەیچش ۋات؛ چنی یەنەکەی ھامڕێنمۍ کە پەنەوازەن ڕێز جە ئېراڎەو پێکئاماکا گېریۊنە.

زیاڎ جەبار سەرۊکو فراکسېۊنو یەنەکەی ئەرەیاۋناش؛ ئەنەیاۋایۍ فرە عالما چنی پەدەکەی ھەن و گلێرۊبیەکێچما ۋەردەوامۍ با.

ھ.ش