بە پاو چنڎ سەرچەمێوە، هیزی یەکشەممە لانوو كەمی بە گازی ژەعراوی هجووم کریان سەروو زیاڎتەر جە٨٠ مەکتەبا و وەرمگا "بەشە ناوخۊیی"ی كناچا  سەرتاسەروو ئێرانی و وەرکەوتوو كوردسانینە و ئەنجاموو ئا پەلامارایچنە، تەنیا هیزی زیاڎتەر جە هەزار تەلەبۍ كناچۍ یاویێنۍ خەسەخانەکا و چارەسەرشا پەی کریان.

حەر هیزی، دژوو ئا پەلامارا بنەیانەو تەلەبا چنڎ شارێوەنە کوۍ بیۍ و ناڕەزایەتییشا بەر وست، كە فرەو شۊنەکانە، هێزەكاو دەسەڵاتی هجوومشا کەرد سەروو بنەیانەکا.

ئارۊ دووشەممەیچ  شارەکاو سنە، تیکابی و نەغەدەو وەرکەوتوو کورڎسانینە بە گازی ژەعراوی پەلامارەو چنڎ مەکتەبۍ کناچا دریا.

پەلامارەو سەروو مەکتەبوو کناچا ماوەو نزیكەو یەرۍ مانگان دەسش پەنە کەرڎەن و سەرباروو ئا ماوە فرەیە، وەرپەرساو دەوڵەتی بە مەبەسوو دماییئارڎەی پا پەلامارا، حیچ هەنگامێوەشا نەنیێنە و قسۍ چەپەوانقسۍ چەپەوانۍ و دژ بەیۊیۍ چا بارەوە کەرا بەتایبەت پا سەروو ئانەیۊ گێرارە، كە دەسوو دوژمنا بە مەبەسوو نیایۊ گێچەڵی ئینا پەشتیشاوە.

وەراوەرنە چالاکۍ و وەرهەڵێسکارۍ ئێرانی ئاماژە پانەیا کەرا، پەلامارەکۍ تۊڵەسانایۊن جە ژەنا، چونکای دژایەتی وەڵێوەبییەی سەروردای ژەنی، ژیوای، ئازاڎیین، ئینە جگە جانەی بڕۍ ماچا، لایەنە تنڎڕەوەكاو سەر بە دەسەڵاتی، كە دژوو وانای کناچانۍ ئینۍ پەشتەو ئا پەلامارە ڕێکوزیایاوە.

حەر سەبارەت پا پەلامارە ژەعراوییا، كۊردیناسیۊنوو گلێرگەو جەواناو وەرکەوتوو كوردسان -كەجەرە جە ئەرەیاوناێنە باسش چانەیە کەرڎەن، "ژەعراویكەرڎەی تەلەبە کناچا، كە بە درووشموو ژەنی ژیوای ئازاڎی، دژوو فاشیزمی و ئەرەگیرکاری ئینا قولۍ مدرامانینە، هامشێوەو ئا پەلامارانە، كە بە چەكی كیمیاوی کریۊ سەروو گەریلاكاو كوردسانی جە زاپ، ئاڤاشین و مەتینانە، چونكوم ژەعراویکەرڎەی و بە كارئاورڎەی حەرنۊعە چەكێوە دژە ئینسانی و دلێچشنە كیمیایی، كولتوورێوە فاشیستانە و پیاسالارانەن، كە بە هیتلێری و سەدامی دەسش پەنە کەرڎەن و بە ئەردۊغانی و خامنەیی بە ڕا و ڕێبازی چەپەڵێوە مەمرڎۊ".

كەجەرە داواش جە تەلەبا، گەنجا و بنەیانەو تەلەبا كەرڎەن، كە  دژوو ئا پەلامارا بێدەنگۍ نەبا و بە یۊگێرتەیی بلا سەروو جادەی و سەرەوردای دەس پەنە کەرا.

س.ز