جەدەکە-فەرەنسا، ناو-بەل و گلێرگەو ئازاڎیی نەمسای داواشا ۋنەو گەلی کەرڎە کە ٢١و ئەیلولینە بەشداری ٣٢ەمین فێستیڤاڵی مېیاننەتەوەیی کولتوری کوردی بکەرا جە فرانکفۆرتو ئەڵمانیاینە و خاوەنداری جە کولتورو گەلوو کوردی بکەرا.
جەبارەو بانگەوازکەرڎەی پەی بەشداربیەی جە فیستیڤاڵەکەی هەریۆ جە هامسەرۆکا گلێرگەو دیموکراتیکی کورڎەسانیا جە بەلجیکا (ناو-بەل)، گلێرگەو دیموکراتیکی کورڎەسانیا جە فەرەنسا (جەکەدەکە-فەرەنسا)ی و گلێرگەو ئازاڎیی نەمسای پەی ئاژانسیما قسێشا کەرڎۍ.
تۆری ئوراک هامسەرۆکو ناو- بەلجیکای باسش چانەیە کەرڎ کە جە فرەو شارەکا بەلجیکاینە ئاماڎەکاری کریان پەی بەشداربیەی جە فێستیڤاڵەکەینە بە تەرخانکەردەی ترۆمبێلی و واتش: "ئی فێستیڤاڵە پەی مەراسیمو ئازاڎی ڕابەر ئاپۆیا و پەنەوازا بە بەشداربیەیما گۆرەتەرش بکەرمۍ. داوا جە گلێرگەو کورڎەسانیا بەلجیکای مکەرمۍ: بەیدۍ دژوو سیاسەتو قڕکەردەی سەرو گەلوو کوردی و پەی ئازاڎیی ڕابەر ئاپۆی و شکۆو ۋێما بەشدارۍ فیستیڤاڵی مېیاننەتەوەیی کولتوری کوردا بیمۍ."
'پەی خاوەنداریکەرڎەی زۋان، کولتوری و ڕابەریما بەشداری جە فیستیڤاڵەکەینە بکەردۍ'
هەر جە بارەو بەشداربیەی جە فیستیڤاڵەکەینە خانێ ئاکدۆغانە هامسەرۆکەو جەدەکە-فەرەنسای جە شارەکا فەرەنسایۆ بەشداری فیستیڤاڵەکەی مکەرا و واتش: "جە ئیساتێنە کولتور و زۋانو کوردا ئینا چێرو هەڕەشۍ سیاسەتو قڕکەردەینە. پەنەوازا بە بەشداربیەی جە فیستیڤاڵەکەنە خاوەنداری جە کولتور، زۋان و ڕابەریما بیمۍ. پۊکەی بە ئامانجو ماڕای گۆشەگیری سەرو ڕابەر ئاپۆی بە گرڎو ئاوەزیماوە داواو بەشداربیەی جە فیستیڤاڵەکەینە مکەرمۍ."
سەبارەت بە فیستیڤاڵەکەی و ئاماڎەکارییەکا جە نەمسانە پەی بەشداربیەی جە فیستیڤاڵەکەینە، ئەحمەد زیرەک هامسەرۆکو گلێرگەو ئازادی نەمسای واتش: "تا ئیساتۍ زیاڎ جە ٢٠٠ کەسا ئەرەیاۋنانشا کە بەشداری فێستیڤاڵەکەی مکەرا، ئێمەیچ بە ئاماڎەکەرڎەی ترۆمبێلی ئینایمۍ ئاماڎەکاریینە پەی بەشداربیەی فرەتەرین کورڎەسانیا جە فیستیڤاڵەکنە."
هامسەرۆکەو گلێرگەو دیموکراتیکی کوردی جە هۆڵەندا (دەم-نید) بێریڤان لاچینە ئەرەیاۋناش جە فرەو شارەکا هۆڵەندایۆ بە ترۆمبێل گنمۍ ڕا پەی ئاماڎەبیەی جە فیستیڤاڵەکەینە.
