بۆنەو نزیکبیەیۆ ١١ەمین ساڵەو فەرمانەو ٣ې ئابو ٢٠١٤ کە دژو گلېرگەو ئێزدییەکا شەنگالی جە لایەنو داعشیوە ئەنجام دریا، تاژێ بە فەرمی نامەش پەی ١٩وڵات و ئەرەمەرزیایا کیاست کە تا ئیساتې فەرمان (کۆمەڵکوژی)ـی ٣ې ئابو ٢٠١٤یشا بە جینۆساید نەشناسان.

سەرەتاو نامەکەینە ئامان: "ماوەو ١١ ساڵا سەرو فەرمانەو ٣ې ئابو ٢٠١٤یرە موېیەرۆ کە چەتەکې داعشی دژ بە گلېرگەو ئێزدی شەنگالەنە کەردشا، گلېرگەو ئێزدی ۋەرو چەما دنیێوە ٧٤ـەمین فەرمانەش سەرەرە سەپیا، چی فەرمانەنە هەزاران ئێزدیې کوشیې، بە دیل گیریې و یانەو مەنزڵو ۋێشانە بەرې کریې، فرەو قوربانیا فەرمانەکەی ژەنی و زاوڵې بێنې. هەڵای جە لایەنو چەتەکاو داعشیوە بە دیل گیریێنې و چارەنوویسو سەڎان کەسا تەریچ نادیارا."

'١٤ وڵاتې فەرمانەکەشا پېسە قڕکەردەی ئشناسان'

جە درێژەو بانگەوازیەکەینە ئامان: " ماوەو ١١ساڵی ۋېیەردەینە ١٤ وڵاتې بە فەرمی، کۊمکوشی ٣ې ئابو ٢٠١٤ یشا دژو گلېرگەو ئێزدیی بە جینۆساید ئشناسان، کە جە لایەنو چەتەکا داعشیوە ئەنجام دریا. ئێمە پېسە جمېیەرو ئازادیی ژەنا ئێزدی دۆسیێوە فراوانما سەرو فەرمانەو ٣ې ئابو ٢٠١٤ ئاماڎە کەرڎەن، ئی دۆسیە بەڵگە و زانیاری گرنگ و ئیسپاتکەرش ئینا دلێنە کە جە فەرمانەو ٣ې ئابو ٢٠١٤ینە جە دژو گلېرگەو ئێزدی شەنگالی ئەنجامدریان، وزمێش ڕووە کە ئینە قڕکەردەین. پۊکەی داواتا ۋنە مکەرمې ئەرک و ۋەرپرسیاری ئینسانی ۋێتا جابەجێ بکەردې و ئا فەرمانې بە قڕکەردەی بشناسدې."

'ژەنی پەی پارېزنای و ۋەرگێرتەی جە هرووژمەکا ۋێشا بە ڕێکوستەی مکەرا'

جە دمادمایی نامەکەینە سەرنج وزیان سەرو ڕێکوستەبیەو ژەنا گلېرگەو ئێزدی و ئامان: "ئێمە پېسە ژەنا ئێزدی بەنامې ئەنجومەنو ژەنا ئێزدیۆ جە ساڵۊو ٢٠١٥ یۆ پەی وەرگێرتەی جە قڕکەردەی ژەنا و گلېرگەکەیما، دماو فەرمانەو ٢٠١٤ ۋێما بەڕێکوستەی کەرڎەن. ئێمە پېسە جوابێوە پەی قرکەردەی ژەنا و گلېرگەی ئێزدی ڕێکوزیایما ئەرەمەرزنانو ۋێما قەوەت کەرڎەن. ساڵۊو ٢٠١٦ بە بینای کۆنگرەی، جمېیەرو ئازادیی ژەنا ئێزدی (تاژێ)ما ئەرەمەرزنارە. تا ئیساتې ئێمە پېسە ژەنا ئێزدی شەنگالی درێژە بە چالاکییەکاما مڎەیمې."

نامې ئا وڵات و ئەرەمەرزیایا نامەکەشا پەی لوان:

- سەرۆکایەتی ئەفریقاو پانیشتی

- پرۆتۆکۆڵو مەراسیمو دۊڵەتو ئیتاڵیای

- نووسینگەو سەرۆککوماری و پەیوەندییە دیپلۆماسییە گرڎینیەکا بولگاریای

- نووسینگەو سەرۆککۆمارو سلۆڤاکیای

- سەرۆکو سلۆڤینیای

وەزارەتو جبەرو فەرەنسای

- سەرۆککۆمارو فینلاندی

- سەرۆککۆمارو قوبرسی

- سەرۆککۆمارو کرواتیای

- وەزارەتو جبەرو ماڵتای

- وەزارەتو جبەر و بازرگانی هەنگاریای

- سەرۆککۆمارو نەمسای

- سەرۆککۆمارو یۆنانی

- سەرۆکو حکومەتو ئیسپانیای

- وەزارەتو جبەرو چینی

- نووسینگەو سەرۆککۆمارو هیندستانی

- سەرۆککۆمارو عەرەبی میسری

- ئېژا ئانتۆنیۆ گۆتێرێس سکرتێرو گرڎیی نەتەوە یۊگێرتەکا

- سەرۆککۆمارو لاتیڤیای