کۆمیتەو ئەرەیاۋنای پەژاکی سەبارەت بە هرووژمەکەو دەوڵەتو تورکی ئەرەگیری کە جە ڕاو درۆنیوە نزیک بە سەیسایەقی ئەنجامش دا و پا مەڵامەتۆ دووۍ رۆنامەنوویسۍ بە نامەکا هێرۆ بەهادینی و گوڵستان تارۍ گەشمەرڎۍ بیۍ ئەرەیاۋنێوەش وەڵاکەردۆ کە ئینە دەقەکەشا:

" دەوڵەتی ئەرەگیرکەرو توركی و پەدەكە دوژمنۍ ئەرەیاۋنای ئازاڎینۍ"

دەوڵەتو توركی بەشێوێوە وەحشیانە و نامرۆڤانە و فاشیستیانە پەلامارەو گرڎ قیمەت و بەها كۆمەڵایەتیەكا گەلەكەیما جە گرڎوو بەشەکا کورڎەسانینە مڎۆ و سڵ جە هیچ یاسا و رێسا و بەهێوە ئینسانی نمەکەرۆوە. ئا دەوڵەتە ئەرەگیرە سەرەمڕە، بەشە و رۆ جە ئاسمان و زەمینۆ پەلامارەو گەریلاكا ئازاڎیی کورڎەسانی، جەنگەوانا ئازاڎیی ۋەرنیشتوو کورڎەسانی و یەكینەكاو پارېزنای ئێزیدیا شەنگالی مڎۆ و جە سەرنیشتوو کورڎەسانی بە هرووژم کەردەی سەرو شارەوانیەكا و چێر پا وستەی ئیرادەو گەلی و بەهرووژمکەردەی سەرو چاند و كلتوری كوردی و پرەنسیپ و نۆرمە دیموكراتیەكا گەلەكەیما گەرەکشا گەلوو كورڎی ملكەچ بە سیاسەتە شۆڤینی و دژە مرۆڤیەكا ۋێش و جە ئەرەکۊشای و ۋێراگری پەی بەدەسئاوردەی مافە رەواكاش پەشیمان بکەرۆ.

جە پانیشتوو کورڎەسانیچەنە جە ڕاو بنەیانەو بارزانی و چەمڎاری و چەمساغی تۆڕێوە ئیستخباراتی و بەكرێگرتەی چېرو چەمڎاری میتی و پاراستنینە جە لێوە دەسشا بەهەڵمەتێوە گۆرۍ ئەرەگیرکاری خاكو پانیشتوو کورڎەسانی کەردەن و جە لێوەتەرۆ جە ڕاو ئا سیخور و نۆكەر و جاشاوە كەسایەتی سیاسی، ئازاڎیواز، نەتەوەیی، دیموكرات و وڵاتپارێزن و رۆنامەوانۍ و شۆڕشگێڵنۍ تیرۆر مکەرا و جە ئاستی مېیاننەتەوەیی و دەوڵەتینە هەوڵمڎۆ چنی دەوڵەتا ئەرەگیرکەرو سەرو کورڎەسانی رێككەوتننامە مېیاندەوڵەتیەكا دژ بەگەلەكەیما زیڼە بكەراوە پەی ئانەیچ ڕووانە مەنتیقە کەشیەکا شارباژێری مکەرۆ ئامانجو بوردومانوو فڕۆکە جەنگیەکاو دەوڵەتو فاشیستی تورکیای.

چا هرووژم و پەلامارا دەوڵەتو توركی ئەرەگیرکەرینە پەی سەرو دەسكۆتەکا گەلەكەیما بە پاو بەڵگەکا ئاشکرا مبۆ کە پەدەكە بیەن بە كەوا سورو ۋەر لەشكرو جەندەرمی توركی و چامساخی و هامكاری راسەوخۆو ئا دەوڵەتە شۆڤینی و دیكتاتۆر و هامپەیمانەو داعشی مکەرۆ و ئاسانكاری پەی بەئامانجگرتەی گەریلاكاو ئازاڎیی کورڎەسانی و جەنگەوانا ئازاڎیی و گەلەكەیما جە شەنگال و پانیشتوو کورڎەسانینە و تەنانەت کەسانۍ ئازاڎیواز و نیشتمانپەروەری مکەرۆ. بەهەمانشێوە بیەن بە داردەسێوە دەسو ئا دەوڵەتە ملهۆر و چەتوونەیۆ پەی دەسسەرەرەگێرتەی خاك و ئاو و هەوا و سروشتوو کورڎەسانی. تەنانەت پانەیچۆ نەمردان ئیساتۍ جەرێككەوتەیە مېیاندەوڵەتیەكانە دژ بەگەلەكەیما بیەن بە هامبەشێوە حەقەتینەو دەوڵەتو توركی و جە لێوەتەریچۆ خزمەتکارو  بە کرێگرتەو رژێمو ئەرەگیرکەرو ئێرانی. ئینەیچ ملۆنە چوارچێوەو خیانەتی نەتەوەیی و نیشتیمانی و هیچ بەهانۍ و چنەوییەردەیێش پەی نییا.

دەوڵەتو تورکی ئەرەگیری بەمەڵامەتوو ئانەی ئەرەیاۋنکارا ئەرەیاۋنای ئازاڎیی بەشێوێوە ۋێبەخشانە و فیدایانە جە ۋەرا ۋەر بەهەوڵە ئەرەگیرکاری و قیزەونەكاشەنە مرداوە و سیاسەتی ئەرەگیری و قڕکەردەی و كۆمكوژی سەرو گەلوو كوردی ریسوا و پووچ مکەراوە، مکەرۆ ئامانجو هرووژمە نامرۆڤانە و وەحشیانەكاش. گەرەکشا شکسەکاش جە بەرەکاو جەنگینە پانەی پەردەپۆش بکەرۆ.

بەئامانجگێرتەی رۆنامەوانا ئازاڎیی كردەوێوە نامرۆڤانە و بێ ئەخلاقانەن كە دژ بە گرڎ پیمەر و پرەنسیپە مېیاندەوڵەتی و بنەماكا مافو مرۆڤیا، پۊکەی پېسە كۆمیتەو ئەرەیاۋنای پارتو ژیۋای ئازاڎیی کورڎەسانی"پەژاك" هرووژم و پەلامارەو دەوڵەتو توركی، ئا هێزە بەکرێگرتەیە کە بە تیرۆر و كۆشتەی رۆڵەكا گەلەكەیما شاگەشكە مبۆ و گنۆ وەڵۍ میتو توركی و رۆنامەوانا "گۆڵستان تارا و هێرۆ بەهادین"ۍ مکەرۆ ئامانج، بە تنی ریسوا و شەرمەزار مکەرمۍ و یاڎو دووۍ هەڤاڵا رۆنامەوانا ئازاڎی بەرز ڕاگێرمۍ و پەرسە و سەرەوەشی ۋێما ئاراسەو کەس و کار و گرڎوو هەڤاڵا و هەمڕایا ئەرەیاۋنای ئازاڎیی مکەرمۍ و هیواو زوو خاسبیەیۆیچ پەی زامڎارکا موازمۍ.

ئی كردەوەو دەوڵەتو توركی جاری یووەم و دما جاریچش نمەبۆ، جە ٤ ئۆكتۆبەرو ٢٠٢٢، ئەندامەو ژنۆلۆژی و ئاكادیمسیانە و رۆنامەنوویسە"ناگەهان ئاكارسل"بەمەڵامەتو هرووژمێوە چەكڎاریۆ تیرۆرە كریا. 

جە هەمانکاتەنە ٢٠و نۆڤەمبەرو ٢٠٢٢ جە دێرکەنە هەواڵسازو ئاژانسوو هاواری"ئیسلام عەبدوڵڵا"ش گەشمەرڎە کەرد. ڕۊو ٢٤ و اوتی ٢٠٢٣ خەباتكاراو ژەن تیڤیش جە مابەینو قامیشلۆی و عامۆداینە کریۍ ئامانج و چا"نەجمەدین فیصل حاجی"گەشمەرڎەبی. هامکات جە ٨ و جولای ٢٠٢٤ ینە فرۆكە جەنگیەکۍ دەوڵەتو توركی کۆششکارو رادوێن و چرا ئێف ئیمی"مراد میرزا ئیبراهیم"شا گەشمەرڎە و مەدیا حەسەن و خەلەف خدریچ زامڎارۍ کەردۍ و جە دلېینەو توركیای و سەرنیشتوو کورڎەسانینە بەسەڎان رۆنامەوانۍ و ئەرەیاۋنکارۍ ئازاڎێشا کونجو زیڼانەكانە تنۍ کەردێنۍ و ڕووانە پەلامارەو رۆنامەوانا ئازاڎیی مڎا. ئی هرووژمۍ نیشانەش مڎا كە دەوڵەتو توركی ئەرەگیری و پەدەكە چن جە رۆنامەوانا و ئەرەیاۋنای ئازاڎی متەرسا، چونكی عال مزانا كە تەنیا ئەرەیاۋنێوە و ئەرەیاۋنکارۍ متاوۆ پەردە سەرو سیاسەتە قیزەون و چەپەڵەكاشا و ئا كردەوا کە دژ بە گلېرگەی مکەراشا هۊرشا ماڵۆ ئا ئەرەیاۋنێ و ئەرەیاۋنکارۍ كە بەدڵ و گیان پەی ئازاڎیی گەلی و مرۆڤایەتی خەبات مکەرا.

ئەرەیاۋنای ئازاڎ یۆ جە کۆڵەکە بنەڕەتیەكاو گلێرگەی ئازاڎییا

مشۆم دەوڵەتو توركی و هێزە نۆكەر و چەمساخەكێش عال بزانا كە هیچ فشار و هەڕەشێوە نمەتاوۆ رۆنامەوانا جە ڕای راسی و حەقیقەتی پاشگەز و بێدەنگ بکەرۆ؛ چونكی ئارۆنامەوان و ئەرەیاۋنکارۍ عال مزانا كە ئازاڎیی ئەرەیاۋنای یۆن جە کۆڵەکە سەرەكیەكاو گلېرگێوە دیموكراتیكی و ئازاڎیی. هەرمانەو ئەرەیاۋنای ئازاڎیی، هوشیاركەردەیۆ و رۆشن کەردەیۆ گەلین جە ۋەرا ۋەرو دەس سەرەرەگېرتەی مافی و ئازاڎیەكانە و مردایۆن دژ بە ئەرەگیریەکا. ۋەرو ئانەینە كە دەسەڵاتدارە شۆڤینیەكۍ هەمیشە ئەرەیاۋنای ئازاڎی مکەرا ئامانج و گەرەکشانە لاواز و بێ ئیراڎەشا بكەرا، بەڵام مشۆم هەم دەوڵەتو ئەرەگیرو توركی و هەم گرڎوو ئەرەگیرا سەرو کورڎەسانی و نۆكەرا و بەکرێگرتا و داردەسا ئا ئەرەگیرا عال بزانا كە گێڵایما شۆنەو حەقیقەتی و راسیرە قەوەتتەر و بەگوڕتەر بەردەوام مبۆ و هیچ هرووژم و فشارێوە نمەتاوۆ جە خەبات و ۋێڕاگری و گێڵایما پەی ژیۋایۍ ئازاڎی سەردێما بکەرۆوە.

بەئامانجگېرتەی رۆنامەوانا"گۆڵستان تارا و هێرۆ بەهادین"ۍ ۋەرو ئانەی بۍ كە حەقەتینەکا فاڕێنێوە پەی گەلەكەیما و رای گرڎی مېیاننەتەوەیی، ۋەرو ئانەیچ کریۍ ئامانج و گەشمەرڎۍ کریۍ. پۊکەی گەلەکەما ئا دووە هەڤاڵۍ و هامکات هەڤاڵی وەڵین و ئەرەیاۋنای بە گەشمەرڎۍ ئەرەیاۋنای ئازاڎیی بە نامۍ مکەرۆ. چون هەر یۆ چا هەڤاڵا بەشێوێوە فیدایانە و جە وەختوو جابەجێکەردەی هەرمان و كارو ئەرەیاۋناینە تیرۆرۍ و گەشمەرڎۍ کریێنۍ. پەی ئانەیچ داوا جە گرڎوو میدیاکارا و بە تایبەت کەسانی خاوەن بە ویژدانو گەلەکەیما مکەرمۍ کە خاوەنداریەتی جە ڕاو ڕێبازو گەشمەرڎە گوڵستان تارۍ و هێرۆ بەهادینۍ بکەرا و درێژەپنەدەرۍ خەباتو گەشمەرڎا ئەرەیاۋنای با و تا یاوای بەهیوا و مەرامەکا گەشمەرڎا برەو بە ئەرەکۊشای كۆمەڵایەتی، ئەرەیاۋنای ئازاڎی و شۆڕشگێڵنانەی بڎا. چون ئانە تەنیا ڕانە کە سەرکۆتەی ئازاڎیی و دیموکراسی مسۆگەر مکەرۆ."