پەژاک سەبارەت بە ورچنیەیەکاو هیزی و بایکۊتکەرڎەی خەڵکی ئەرەیاوناش، "ئی شکسە پەڕئاوڕووشییەیە پەی ڕژێمی مزانیێوەن پەی بەرەو ئازاڎیوازا. ئی حیماسە سەروبەندوو وەهارینە تۊمار کریا، هێماو گەشیایۊی و سەوزتەربییەی ساڵەو وەرڎەمیمانە".
هیزی ورچنیەیەکاو ئەنجوومەنوو شوراو ئیسلامی و ئەنجوومەنوو شارەزایا ئێراننە کریا، کە لاو خەڵکی و فرەو کۊڕ و لایەنەکاوە دلێنە و بەرۊ بایکۊت کریابێ. بەپاو ئامار و زانیارییەکا بەرکەوت کەمتەرین ڕێژەو دەنگدەرا لوێ سەروو سندوقەکاو دەنگدای و کاریگەریی بایکۊتی بەڕۊشنی بەرکەوت.
سەبارەت بە ورچنیەیەکەی و ئەنجامەکاو بایکۊتوو پڕۊسەکەی لاو خەڵکیوە، پارتوو ژیوای ئازاڎوو کوردستانی (پەژاک) جە ئەرەیاوناێونە شرۊڤەو ئا بابەتەیشە کەرڎەن.
ئەرەیاونایەکەو پەژاکی ئینەنە:
پەی ڕای گردینی؛
شانۊگەریی ورچنیەی کریا و خەڵکوو ئێرانی مۊرەو ڕەتکەرڎەیۊش وەنەو یەخێ سیستمێوە دا کە جگە جە نەهامەتی و دژواری و تەنگوچەڵەمەی هیچی تەرش پەیشا نەبێ پەنە. بەشداریی کەموو خەڵکی جە ورچنیەینە بەرش وست، کە خەڵک نەک حەر دەسشا جە ناڕەزایەتیبەروستەینە دژ بە سیستمی بەرنەوستەن، بەڵکوم گرد دەرچێوە پەی نیشانەدای ناڕەزایەتییشا بەکار مارا. گرووپێوە یەکجار گولانە کە بەدڵنیاییوە جە ڕاو ڕاکارەکاو کۊماری ئیسلامییوە پەلکێشوو سەروو سندوقەکاو دەنگدانی کریان، ئادیچ نەتاواشا هیچشا سەروو دۊخوو بایکۊتی بۊ. سیستم دەسەودامانوو ڕاکارەکاو واوەی ڕەوایەتیدای بە وێش بییەن، بەڵام خەڵکیچ بە دژکرڎەوەو بەشدارینەکەرڎەی جە ورچنیەی، ڕەوایەتییشا وەنەو سیستمی ساناوە. ئی سیستمە بە کرڎەوە نادیموکراتی، دژە ئازاڎی، دژە ژەن و دژە خەڵکوو وێش کارنامێوە سیاو و تاریکش پەی وێش تۊمار کەرڎەن و سەرجەموو پەیوەندییەکاش بە گلێرگەو گەلی (گلێرگەو ئەخلاقی- سیاسی) پڕچنان. خەڵکیچ بە پەنابەرڎەی پەی ئا ڕاکارا هەنێ دەسشاوە ڕووبەڕووێ بیێوە و گردوو شانۊگەرییەکەی فاڕا پەی داستان و حیماسێوە دژوو سیستمی. سەرباروو ئانەیە ڕژێموو کۊماری ئیسلامی بە وەروەڵایی سەرجەموو کەرەستەکاو وەرڎەسیش بەکارش ئاردێ و سەرەڕاو شانۊگەری کە بەگردیوە ئەنجامێوە گاڵتەجاڕانەشا وەنە کەوتۊ، ئاستوو بەشداری جە ورچنیەیەکەینە بە جۊرێوە کەما کە مەگەر تەنیا دەزگاو دروا و چەواشەکاریی پڕوپاگەندەیشا لافێ "بەشداری"ی بدا وەنە و وێشا بڕواش پەنە کەرا! گەلاو ئێرانی، ژەنی و گەنجێ جە ڕاو بایکۊتیوە نیشانەشا دا کە پێسە چەنی جە حیماسەی شۊڕشگێڵنانەو "ژەنی، ژیوای، ئازاڎی"ینە سەرجەموو پەیوەندییەکاشا چەنی ڕژێمی پڕچنێ، بەرڎەوامێنێ جە پاگێرتەیرەی سەروو هەڵوێستەکاشا و ئیرادێوە پتەوشا هەن تا ئی وەربەسە تارێخییە ویەرنا. ئا بابەتە ئاماژەپەنەکریا هێماو ئانەیەنە کە خەڵک یاواینەی قووڵشا جە سیاسەتی و هەرمانوکاروو وەڵاتەکەیشا هەن هۊشیاریی سیاسییشا ئینا ئاستێوەنە، کە بارەتەقاو فرتوفێڵەکاو دەسەڵاتی بۊ و بتاوۊ ویەرنۊش. ئینەیچ مایێ دڵوەشیین. گلێرگەی هۊشیار و ڕێکوزیێکێ متاوا سیاسەتی ڕاست کەرا و دلێ وێشانە کۊشەرێ سیاسیێ هەقەتینێ پەروەرڎە کەرا و ڕێکوزیا و ئەرەمەرزیایەکاو وێش بنیاد بنیۊ.
گلێرگە و گەلی هۊشیار، دژە ژەعر گردوو پاوانوازی، نادادپەروەری، ڕەگەزپەرسی و ستەم و نادادیین. ئی گەلە هۊشیارەنە، کە سەرباروو گردوو قوربانیدایەکا، دەزگاو ستەمی و خراپەکارییش لەرنانۊ و قۊناغە هەستیارەکاو تاریخینە حیماسە ئاسا وانەی تارێخییش بە گرد لایێ واتەنۊ. یادەوەری و هۊشمەندیی گردین پی جۊرە ئازاڎیوازا و یەکسانوازا وەش بییەن و ئینە ڕەوتێوەن، کە هیچ هێزێوە ستەمکار و فریودەر نمەتاوۊن دلێشنە بەرۊن. تا ئا وەختە ئی پێکئاما و چوارچوەو گلێرگەیە بە زیندەیی مەنۊوە، فریو و چەواشەکاری هیچ بەرهەمێوەش مەبۊ. تۊموو ستەمی دەشتەو هۊشیاری و ئازاڎیوازیی گلێرگەینە هیچ بەختێوەش پەی سەوزبییەی و زیای درێژخواینی نییا. سروشتوو گلێرگەی هۊشیار ڕا پانەیە مەدۊ.ئینە هەمان ئا دۊخەنە کە مایێ دڵوەشی و شادیین و مشۊم بە مەبارەک بنریۊرە.
بێگومان تووشوو چندین ئاریشەی کۊمەڵایەتینێ، بەدڵنیاییوە بەشێوە جە گلێرگەی ڕووەو ناچارییوە یا ناهۊشیاریوە و جە ڕووەو بەرژەوەندیوازی و گەندەڵییوە دەسشا چەنی ڕژێموو ئێرانی تێکەڵ کەرڎەن. بەڵام ڕێژێوە یەکجار کەموو ئی چینەیە ورچنیەی ئی دمایەینە وینیا. پەناو ئی بابەتانە، بڕێ پەرسێ ناوچەگەرایانێ، کێوەڵێکێ ساختەی ئیتنیکی و خێڵەکی و دەسە و تاقمگەری ئا ڕایێنێ، کە ڕژێمی قۊستێنێوە تا بازاڕوو ورچنیەی ڕاشاوە گەرم کەرۊ و دلێ هەرماننامەیشنە بنویسۊشۊ و پێسە بڕێوە ئامار و ژمارا پەی بەرژەوەندییش بەکارشا بارۊ، بەڵام ڕێژەی ئاماژەپەنەکرا یەکجار کەم بییەن و بابەتەکە لاو گرد لاێوە ڕۊشن و ئاشکران. بەدڵنیاییوە پێسە ڕژێم وێچش بانگەشەکانە باسش کەرد، کە ئی ورچنیەیە ڕیفراندۊما، خەڵک بە حیماسێوە ڕیفراندۊم ئاساوە هەمان ئا "نا"شا بە کۊماری ئیسلامی وات، کە سەرەوردای و شۊڕشوو "ژەنی، ژیوای، ئازاڎی"ی پەنەشا واتەبێ. ئی ورچنیەیە شانۊگەری و نمایشێوەن بییەن بە فرسەتێ تا خەڵکوو سەرتاسەروو وەڵاتەکەی جارێوە تەر داواکارییە ڕەواکاشا بە جۊرێو جە جۊرەکا بوزا ڕووە.
بەشدارینەکەرڎەیی خەڵکی سەرتاسەروو کوردستانی و یاگە پەراوێزەکاو ئێرانینە بەرش وست کە فرتوفێڵێ و ڕاکارەکاو فشاری و زۊرەزمێ نەتاوانش خەڵکی جە داواکاریەکاشا پەشیمان کەرۊوە. ئینە ڕیفراندۊمێوەن کە بە بێدەنگی و نەلای پەی سەروو سندوقەکاو دەنگدای کریان، هەمان وەختەنە وەفاداریێوەن پانیشا، کە ڕاو ئامانجە ئازاڎیوازانەکاشانە مەردێنێ. خەڵک ئامادێ نەبێنێ دەسشا بە ونەو کەسانێوە کە پەیشا گیانشا بەخت کەرڎەن، سوورێ کەرا و بە پەنجێوە جە ونێ ورکێشیێ بەڵگەو پەشتیوانی جە ڕژێمی مۊرە کەرا. ئی شکستە پەرجە ئاوڕووشییەیەو ڕژێمی مشۊم پێسەو مزانیێوە بۊ پەی بەرەو ئازاڎیوازی. مانگەشەوە سەروێرەگا دیارەنە و ساڵەی پەڕ پیت و بەرەکەتە وەهارەکەشۊ. ئی حیماسە کە سەروبەندوو وەهاروو ئێساڵینە، نیشانێ گەشیایۊ و سەوزبییەی ساڵەکێن. بەهومێدوو دماییئامای سەرجەموو ستەمەکا و یاوای وەهاروو گەلا وەڵاتەکەمانە.
بژیوۊ گلێرگەی بەئاگا و هۊشیار!
نمەمرا ئانێ کە ڕاو ئامانجە گردینییەکانە وێشا بەخت کەرد!
یا سەرکەوتەی یا سەرکەوتەی!".
