کۆنگرەو ١٢ـەمینو پەکەکەی جە ٥-٧و ئایارینە بەسەرکۊتەیی جە هەرێمەکاو پارېزنای مەدیاینە ئەنجام دریاو چنەشەنە قەرارو دمایئاردەی بە ڕێبازو چەکڎاری دریا. جە کۆنگرەکەنە قسەۍ دماینەو کۆنگرەکەی جە لایەنو ئەندامو کۆمیتەو ڕاوەبەری پەکەکەی موراڎ قەرەیلانیۆ کریا. قەرەیلان ئاماژەش پانەی دا پارتو کرێکارا کوردەسانی (پەکەکە) حەقیقەتا و حەقیقەتیچ گلێرگەن.
تەمامو قسەکۍ موراڎ قەرەیلانی پی جۊرەنۍ:
کۆنگرەو ١٢ـەمینو پەکەکەی جە تاریخو ئەوەکۊشایمانە پېسە قولەپۊپێوە بە سەرکۊتەی دمایش پنە ئاما. ئی کۆنگرە بە ڕەنج، کۊشش، بانگەواز و ئاماڎەکاری ڕابەر ئاپۆی ئاما ئاراوە. پەی ئانەیچ جارێوەتەر بەنامۍ گرڎو هەڤاڵا و نوێنەراوە سڵام جە ڕابەر ئاپۆی مکەرمۍ. جە کۆنگرەکەنە دیسان دیدگاکۍ ڕابەر ئاپۆی قوڵبیەیۊش وەش کەرڎ. ئینۍ گرڎ پاسشا کەرڎ جە کۆنگرەکەمانە جە هێڵۊو ڕابەر ئاپۆینە وردبیەیۆ، قوڵیەتی و گفتوگۆی دۊڵەمەڼ بێنە ئاراوە. سەرو ئی بنەمایۍ، گفتوگۆکۍ ڕۊشنۍ و قیمەت دارۍ بێنۍ. ڕاسا پەیلوای جیاواز بۍ، هەروێش ئانە سرووشتو جمېیەرێوە دیموکراتیکیا، بەڵام ڕۆشنیەتی بۍ. سەرو ئا بنەمایە بە سەرکۊتەی دمایش پنە ئاما. بەشەکەی تەرو کۆنگرەکەیچ جە قەندیلنە بەهەمان شێوە بە سەرکۊتەیی درێژەش هەن، هەڵای زانیاریما سەرش نییا، کە بەتەمامی پنە ئامان یان نا، ڕەنگە دمایش ئاما بۆ. ئاڎیچ سەرکۊتەن. ئی کۆنگرە سەرو بنەماو داواو ڕابەر ئاپۆی پەی ئانەی پەنەوازیەکا پرۆسەکەی بڕەخسنۆ، بە دەرفەتەکاو ۋەردەسیماوە بیناما. بە گرڎیی هەلومەرجی گونجیا پەی کۆنگرەی نەڕەخسیا. دلۍ بەردەوامی هرووژمەکا دۊڵەتینە ئی کۆنگرەما بینا. پەی ئانەیچ ڕاوجاو ئەمنی ۋێما گێرتەنە ۋەر.
قەرارو هۊرشێونایۆ پەکەکەی، پەکەکێوە کە جە دڵو گەلەکەیمانە، جە دڵو وەشەسیایا و دۆسامانە دەلاقێوەش کەردەنۆ، یاگێوە تایبەتو ۋێش هەنە. جە دڵو گرڎ هەڤاڵێچەنە پی جۊرەنە. هۊرشێونایۆ پەکەکەی قەرارێوە ئاسان نیا، وەڵۍ گرڎ چێوێنە ئیرادێوەش گەرەکا. ڕابەر ئاپۆ ئی ئیرادەشە ئارڎ ئاراوە. کۆنگرەیچ بە هەڵوێسو ۋێشۆ ئیرادەش نیشانە دا. ئی قەرار و ئیرادە بیەیە ڕابەر ئاپۆ ئەرێش کەرد و قەرارو هۊرشێونایۆیش بە فەرمی کەرد. هەرپاسە قەرارو دماییئاردەی بە ستراتیجو جەنگی چەکڎاری ئاسان نەبۍ. بەتایبەت پەی ئێمە، ئێمە پېسە هەڤاڵا ئێگەی، چن هەڤاڵێوە جە جبەرۆ ئامێنۍ، هەڤاڵا تەریچ بە قورسی ئینۍ دلۍ کۊششی چەکڎارینە. فەرمانداری مکەرا، ڕاوەبەری جەنگی مکەرا. هەڤاڵا چۍ بڕۍ قسێشا کەرڎۍ. جە گەرمەو جەنگیوە ئامێنۍ پۍ وۍ. وە ڕۊشنکەردەیۊیشا دا. ۋەرو ئی مەڵامەتا گلېرۊبیەو هەڤاڵا حازری ئی قەرارە قەرارێوە ئاسان نەبۍ پەیما. چونکی ئێمە پېسە هەپەگەی، یەژا ستاری درێژکراوۍ نەریتو هەرەکە (HRK) و ئارگەکە (ARGK)ینمۍ. تاریخما هەن. تاریخێوە ٤١ ساڵەما هەن. وە بە ئاسانی ئی تاریخەما بنیاڎ نەنیان. بە ئەوەکۊشایۍ پەڕ جە ڕەنج و ۋنی ڕەخسیان. ئی تاریخە بە پیتەی ئاڵتونیە جە تاریخو گەلو کوردەسانینە نویسیانۆ. بە ۋنی نەخشیان.بە جەنگ و مڎرامانی داستان ئاسا پێکئاما. چی جەنگەنە تا ئیساتۍ نزیکەو ٣٥ هەزارا گەشمەرڎۍ کادر، جەنگەوانۍ و میلیتانېما دێنۍ. نزیکەو ١٠ هەزار گەشمەرڎۍ وڵاتپارێزنێما دێنۍ. بە گرڎی ٤٥ هەزارۍ. ڕاسی نزیکەو ٥٠ هەزار گەشمەرڎێما هەنۍ. چا گەشمەرڎا ٨٩ هەڤاڵێشا ئەندامۍ کۆمیتەو ناوەندی پەکەکەینۍ. یانی پەکەکە پی جۊرە بە ڕاوەبەراشۆ وەڵێش گێرت و جەنگش کەرڎ. ئی جەنگە پی جۊرە ڕاوەبەر کریا. جارێوەتەر گرڎو ئی گەشمەرڎە قارەماناما بە ڕێز و پنەزانایۆ یاڎۍ مکەرمېوە. بۆ هەمیشە ڕابەرێما با. گەشمەرڎەکېما تاجەو ئی جمېیەرەینە، ئی تەڤگەرە تەڤگەرو گەشمەرڎان. پەکەکە پارتو گەشمەرڎان. ئیساتۍ پەکەکە هۊرشێویاوە، تەڤگەرو ئی کەسا مەنۊوە، ئاپۆگەری تەڤگەرو گەشمەرڎان.
هەڤاڵا ئێژای، مزانا چی ڕوۆ، جە ڕوو قەرارو دمایئاردەی ستراتیجو چەکڎارییوە گفتوگۆش سەر کریا. چونکی قەرارێوە ئاسان نەبۍ، بەڕاسی سەخت بۍ. چونکی بە ئیساتێچۆ جە بوارو جەنگی چەکڎارینە، جە بوارو جەنگی شۆرشگێڵنینە ئیرادەما هەن. یانی ئیرادەو سەرکۊتەیما هەن. هەر کادرێوە ئی تەڤگەریە، سەروازێوە ڕابەر ئاپۆین، فیدایێوە ڕابەر ئاپۆین. ویرما کەردۆ، مادام ڕابەر ئاپۆ پاسە پاگیرا، بە بڕیاراو پرۆژێوە تازە پێشکەش مکەرۆ، هەنگامېوە تازۍ ڕاوەبەر مکەرۆ، کەواتە چێوۍ هەن. هەوڵما دا قەرارو کۆنگرەی، جە دلېنە هەوڵدای ئاما ئاراوە چانەی بیاومېنە و سەرو ئا بنەمایۍ جمێوە. هەروێش جە گرڎو هەڤاڵانە پاسە وەڵێکۊتەیۍ وەش بی. چونکی دۊڵەتو تورکیایچ بانگەوازێوەش کەرد، بەڵام تەنیا قسۍ بێنۍ. حیچ چێوۍ پراکتیکی بەرنەکۊت. بیێبایچ چێوۍ فرە گولانۍ بیێنۍ. هەڵبەتە چێوی کۆنکرێتی، کە بانۍ بە یاگۍ باوەڕی، ئینسان واچۆ ڕاسا جە دۊڵەتو تورکینە فاڕیایۍ هەن، حیچ هەنگامېوە پراکتیکیەی پا جۊرە نەنریێنە. پەی ئانەیچ هەڤاڵا نیگەرانی و گومانەشا هەنە. سەرو ئا بنەمایۍ پەیلوای جیاواز ئاما ئاراوە و گفتوگۆکریا. وە هەڤاڵا بە خاسش نمەزانا چی کاتەنە هەمان هەنگامە بنریۆ، تاوەکو ئا کاتەی جە لایەنو دۊڵەتو تورکیوە هەنگامەی کۆنکرێتیە نەنریۆ، پی جۊرە کۆکۍ نیەنۍ چانەی هەنگامە بنریۆ. هەڤاڵا گۊششا جە نامە و پەیامو ڕابەر ئاپۆی گێرت. پۊکەی جە ئاستێوە دیاریکریانە قەناعەتش وەشکەرڎ. سەرو ئا بنەمایۍ سەرو ئەساسو ڕەئیەو فرەینەی قەرار دریا. قەرارو دمایئاردەی بە ستراتیجو جەنگی چەکڎاری پی جۊرە ئاما ئاراوە.
سەرو ئی بنەمایۍ کۆنگرەو ١٢ـەمینو پەکەکەی بی بە دما کۆنگرەو پەکەکەی. پەکەکە خۆبەخۆ سەرو بنەماو ئا پەنەوازیا ڕابەر ئاپۆ باسش کەردێنۍ، گفتوگۆش کەرد، چی سەردەمە تاریخیەنە بە قەرارێوە چامنە تاریخی، بە ئازایی و ئیرادۆ ۋێش هۊرشێونۊوە. قەرارو ئینەیش دا. هەرپاسە دمایش بە ڕێبازو چەکڎاری ئارڎ کە تا ئیساتۍ ڕاوەبەرش کەرڎەن، پڕۊوە پەی ڕێبازی سیاسی، یاسای و دیموکراتیکی. ئینۍ گرڎ قەرارۍ فرە بنەڕەتیێنۍ پەیما. ڕەنگە جە جبەرو ئێمۆ بڕۍ کەسۍ واچێنۍ با پەکەکە قەرار بڎۆ، زوو ئەرەیاۋنۊش. بە تایبەت فرێوە جە ۋەرپەرسا دۊڵەتو تورکی پی جۊرە قسۍ کەرێنۍ. مەگەر ئینە ئاسانا؟ ئەر ئاسان بۆ، شمەیچ بەیدۍ قەرار دەیدۍ! ئی تەڤگەرە ماوەو ٥٢ ساڵان سەرو بنجێوە ۋێش ڕاوەبەر مکەرۆ. وە بە چەک وەرگیری جە ۋێش مکەرۆ، جە هەر یاگێوە ئی وڵاتەینە بە چەک ۋێش پارێزنۆ. سەرو چەکی قەسەمش واردەن. قەسەم موەرۆ. بەچەک مردان، چی؟ ئینا چێرو جەنگینە. هەروێش جە قەرارەکەیچەنە گفتگۆش کریا. هەروێش پەکەکە پەی وەشی چەکش هۊرنەگېرتەن. ئی گەلە ئینا مەترسینە. بیەو گەلی ئینا چێرو تەرسێنە. کەسانێوە کە داواو بیەی گەلی و ئازادی گەلی مکەرا ڕوبەڕوو بۊمبوارانی باوە. دلېنە بریا. چی مەگەر ئی گرڎ کۆمکووژیۍ چی وەشۍ بیۍ؟ چی ئاڼنە کوشتەی بکەر نادیارۍ وەشۍ بیۍ؟ یەک؛ پەی ئانەی چی وڵاتەنە واچۆ ئینسانێوە ئازادەنا، کوردێوە ئازادەنا، ئەر کوردیچ نەبۆ، هەروێش هەڤاڵی غەیرە کوردما هەن، ئانە یاگۍ فەخریمانە، ئازادی گەلێوەم گەرەکا کە سەرکوت مکریۆ، دژو قڕکەردەی کوردینا، یۆ پاسە واچۆ دلېشەنە بەرۆ. ناچارا بەچەک پارێزنای جە ۋێش بکەرۆ. چی مەگەر تا ئیساتۍ بەچەک ۋێش نەپارېزنان. پی مەڵامەتاوە ئی قەرارە قەرارێوە ئاسایی نییا. جە چوارچێوەو ڕانومایی، دیدگاکاو ڕابەر ئاپۆینە بە سەختی قەرارەکە دریا. وە بە کۆدەنگی قەرارەکە دریا. سەرو هێڵۊو ڕابەر ئاپۆی، ئی بنیاڎنیایە جە یەکڕیزینە ڕۊشنا. ئینە گرنگتەرین چێوا. سەرو هێڵۊو دڵسۆزبیەی بە ڕابەر ئاپۆی گرڎ یەکڕیزێنمۍ. بەڵام ڕەنگە بڕۍ هەڤاڵۍ نیگەرانیشا بیەبۆ، گومانەکۍ فرۍ با. پەی ئانەیچ بێگومان بڕۍ نەرمیما جە قەرارەکەیمانە ئەرمانان.
ڕابەر ئاپۆ ماچۆ ئی سەردەمە سەردەمو تازە بیەیۆین. ئا کاتە پەنەوازا هەڤاڵا گرڎ پی جۊرە هۊرسەنگنایش پەی بکەرا. چی ماوەنە وێتا تازە بکەردێوە. پەی جابەجێکەردەی سیاسەتو دیموکراسی، دور جە بەکاربەردەی چەکی، ئەوەکۊشای زیاتەر پەنەوازا. ٢٤سەعاتۍ هەرمانکەردەیش گەرەکا. ئەر پی جۊرە هەڵسوکەوت بکەرمۍ، ئەوەکۊشای گەلەکەیما پەی ئازادی متاوۆ جە ئایندەنە ئەنجام بەدەس بارۊ. واچدۍ جەنگی چەکڎاری دمایش ئاما، ئا کاتە ئیتر ئارامی ئامان. نا پاسە نییا. هەڵای سەختی و زەحمەتی فرە ئینا ۋەردەممانە و هەڵای پەنەوازیما بە واوەی بنیاڎنیایۆ و بەڕێکوستە کەردەی هەن. پەنەوازا بە ئەوەکۊشای زیاتەری هەن. ئەوەکۊشای ئاپۆیی دمایش نامان. ئاپۆیی بیەی ڕۆحێوەن، هەمڕایەتیێوەن، ڕێبازێوە ژیۋای، یەکسانی و ئازادییا. ئینۍ بەشێوەنۍ جە هەست و ڕۆحو ئێمە، چنەما جیۍ نمەباوە. سەرەتا پەنەوازا ۋێتا بنیاڎ بنیەیدێوە، جە کەسایەتی ۋێتانە ۋەرپرسیاری هۊرگېردۍ، جە ۋەرا ۋەرو بەهاکانە ۋەرپرسیارۍ بیدۍ. ئی سەردەمە ۋەرپرسیاری زیاتەرش گەرەکا. سەرو ڕێبازو گەشمەرڎە قارەمانەکاما چنی بەردەوام بی؟ پېسە هەڤاڵا مزانا ئی کۆنگرەما سەرو ڕۆحو هەڤاڵا گەشمەرڎەی فوئاد-عەلی حەیدەر قەیتانی و ڕەزا ئاڵتونی بە ئەنجام یاونا. بە ڕۆحو گەشمەرڎا، ئی دووە گەشمەرڎەما، پېسە ئەرەمەرزنەرا پەکەکەی گرڎو گەشمەرڎا ئێمە نوێنەرایەتی مکەرا، گەشمەرڎۍ گۊرۍ ئی دماییەینۍ. پی جۊرە بە ڕۆحو ئاڎیشاوە ئی کۆنگرەما ڕاوەبەر کەرڎ. ئێمە قەناعەتما چامنەن ئەر ئاڎۍ چنیما بیێنۍ ، زیاتەر و عالتەر جە سەرۆکی یاوێنێنە و ئێمەیچ یاونێنێنە. هامکات جە کاتێنە کە کۆنگرەکە کەم کەم دەس بە هەرمانەکاش کەرۍ ، ٢-٣ ڕوۍ وەڵۍ کۆنگرەکەی، هەواڵو گەشمەرڎەبیەو ئاشتی و دیموکراسی، ئێژا سری سورەیا ئۆندەریما لا یاوا. ١٨ ڕوۍ جە خەسەخانەنە چېرو چەمڎاری چڕینە بۍ، مڎرامان کەرۍ و گەلو کوردی، گەلو تورکی و گرڎو چین و توێژەکا تورکیای دەورشەرە یۊشا گېرت. ئاشکرا بی کە ئاڎ نوێنەرایەتی گرڎ لایۍ مکەرۆ. ئەندامو شاندو ئیمرالی و هەمڕاو ڕابەر ئاپۆیا. پا بۊنۆ جە خەسەخانەنە گلېرۊبیەی لواڕاوە. دماتەر دماو گەشمەرڎەبیەیچش بەهەمان شێوە بەردەوام بۍ. هەرپاسە ئی کۆنگرە بە ڕۆحو سری سورەیا ئۆندەریوە بینیا. جوابۍ بۍ پەی ئەوەکۊشایەکاش پەی ئاشتی. هەرپاسە قەرارەکۍ ئی کۆنگرەیە، جە کەسایەتی سری سورەیا ئۆندەرینە، پەی گرڎو دۆسا و هەڤاڵا ئاشتیوازی جوابێوە تاریخیا. جە ۋەرا ۋەرو کۊششەکاشەنە پەی ئاشتی ئا چێوۍ کە ڕابەر ئاپۆ و پەکەکە گەرەکشانە، جە ڕاو ئی کۆنگرەیۆ ئەنجامدریا.
هەڤاڵا ئێژای هەنگامەکۍ ڕابەر ئاپۆی بەرەو وەڵۍ ملا و کۆنگرەیچ بەڕەسمی لواڕاوە، نەک هەر پەی کوردەسانی، ڕاسا جە سەرەتانە جە جوگرافیاو کوردەسانینە ئەرەمەرزیا و ئی دەرفەتەیچە دەرفەتێوە تازە پەی هەر چوار پارچەو کوردەسانی ڕەخسنۆ. ئامانجش بنیاڎنیای وەڵێکۊتەیۍ گۊرەو ئەوەکۊشای ئازادی ئی گەلەینە. بەڵام پەی گرڎو ناوچەکەیچ دەورو ۋێش بۆ. هامکات جە چوارچێوەو پارادایمو مۆدێرنیتەی دێموکراتیکی ڕابەر ئاپۆینە دەورێوە جەهانیچش هەن. یانی ئینە بە ماناو لواین بەرەو سەردەمێوە تازەی. ئی هەنگامۍ هەنگامېوەنە بەرەو قۆناغێوە تازەی و سەردەمێوە تازەی. هەرپاسە جە ۋەرا ۋەرو مودێڕنیتەی سەرمایەدارینە، ستراتیجو مۆدێرنیتەی دیموکراتیکی ڕۊشن مکەرۊوە. سەرو بنەماو نەتەوەی دیمۆکراتیکی، سۆسیالیستی دێموکراتیکی کۆمەڵایەتی، سەرهۊردایۍ تاریخیا. پۊکەی ئی قەرارۍ نەک تەنیا پەی گەلەکەیما و گەلو کوردەسانی بەڵکو گرڎو گەلا تەری و کرێکارا جەهانیچ جە ۋێش گێرۊوە. پۊکەی گەرەکمانە جە تورکیا و کوردەسان و گرڎو ناوچەکا جەهانیچەنە سیستەمێوە تازە وەڵۍ گنۆ، سیستەمو سۆسیالیزمو دیموکراتیکی وەڵۍ گنا. سەرو ئی بنەمایۍ ئەوەکۊشای بکەردۍ. لایەنەکۍ سوسیالیست و ئەنتەر ناسیوناڵیستی پا جۊرە زیاتەر ئینۍ وەڵێوە.
مشۊم گەلەکەما گەلی ئێژاو کوردەسانی چانەی بیاوانە کە ڕابەر ئاپۆ ئی هەنگامە تاریخیۍ پەی سەروستەی ئەوەکۊشای ئازادیی گەلو کوردی ئاراسە مکەرۊ. ڕابەر ئاپۆ عەیامێوەن باسو چێشی کەرۍ؟ واچۍ: "من ئەوەکۊشو پەی گەلو کوردی ستاتۆیۍ وەش بکەرو جە تورکیا و جە گرڎو هەرێمەکەینە" پۊکەی گەلەکەما و گەلو کوردی بەتایبەتی مشۊم ئی ڕێبازەو ڕابەر ئاپۆی بە هێزۆ خاوەنداریش چنە بکەرا. جە گرڎو بەشەکا کوردەسانینە گنۊنە جابەجێ کەردەیۆ. ئینەیچ بە بەڕێکوزیایی بیەی کریۆ. پۊکەی مشۊم ۋێتا بە ڕێکوستەی بکەردۍ و ڕا پەی گلېرگێوە دیموکراتیکی پی جۊرەیە وەش بکریۆ. مشۊم کۊششەکا سەرو ئا بنەمایۍ بەرەو وەڵۍ بەردۍ. پۊکەی گەرەکمانە پا قەرارە تاریخیا کە جە کۊنگرەکەمانە گیریێنۍ، فرە بە عالی بیمۍ بە جوابێوە پەی ئەڎایا گەشمەرڎا و هەڵسەو چەماشا پەی ئەڎایا کوردەسانی گرڎو گەشمەرڎاما. ئێمە گەشمەرڎێما دێنۍ بەڵام ئانۍ ئێمەکە مەنێنێوە نوێنەرایەتی گەشمەرڎا مکەرا. پۊکەی مشۊم ئەڎاکێما ئینەی بزانا. هیواڎارێنمۍ قەولێوە کە بە گەشمەرڎە قارەمانەکاما دان بەدیش بارمۍ و بەرەو سەرکۊتەیش بەرمۍ، ئینە داوا و ئامانجو ڕابەر ئاپۆی و قەرارەکا کۆنگرەکەیمانە. پۊکەی گرڎو ئانیشا کە داکۆکی جە دادپەروەری، ماف و دیموکراسی مکەرا، سەرو بنەماو ئازادی ژەنۍ بنیاڎنیای گلېرگەو سوسیالیست دیمۆکراتیکی، قەرارەکا کۆنگرەکەیما دەرفەتێوە گۊرە مڕەخسنۆ و ڕا مکەرۆوە. ئێمەیچ سەرو هێڵیۊو ڕابەر ئاپۆی و جە چوارچێوەو قۆناغەی تازێنە، ۋێما بە ۋەرپرسیار موینمۍ و دەور گێڵنمۍ. بانگەوازیما پەی گرڎو هەڤاڵا ئینەنە.
بێگومان وەڵۍ گرڎ چێوێنە ئێمە هەڤاڵانێوە کە چی کۆنگرەنە بەشدارۍ بێنمۍ، ئانە بزانیۆ کە ئینە کۆنگرێوە تاریخیا. فرێوە جە هەڤاڵا باسشا کەرد. کۆنگرێوە ئاسایی نەبۍ. گرڎ هەڤاڵێوە کە چی کۆنگرەنە بەشدارۍ بێنۍ، ئینە پەی ئاڎیشا پېسەنە شانسێوە. ئی کۆنگرەیە دمایی بە سەردەمېوە مارۆ و سەردەمێوە تەر مکەرۊوە. پۊکەی هەر هەڤاڵێوە که بەشدارو کۆنگرەکەی بیەبۆ پەی ئاڎیی شانسێوەن و پیرۆزا. پەنەوازا ماناو ئانەی بزانمۍ. پۊکەی وەڵۍ گرڎ کەسێنە هەڤاڵانێوە کە ئاماڎۍ کۆنگرەکەی با ۋێشا جە ۋەرا ۋەرو ئی هەنگامۍ ڕابەر ئاپۆینە بە ۋەرپەرس بزانا و بە گرڎو هێز و هەرەکەتیشاوە بەشداری سەردەمی تازەی بکەرا، بەشداری هەنگامەو ئازادیی بکەرا. پۊکەی سەرو ئی بنەمایە ماچمۍ سوسیالیزمو دۊڵەت نەتەوەی تێکمشۊ و سۆسیالیزمو گلېرگەی دێموکراتیکی سەرگنۆ. مشۊم ئێمە پی ڕۆحۆ، پی هەڵوێسۆ جمێوە. ئەر پی جۊرە ئەوەکۊشای بکەرمۍ، پەیلوایما چامنەن کە هەڤاڵەکېما سەرۍ گنا و گرڎما سەرۍ گنمۍ. سەرو هێڵۊو ڕابەر ئاپۆی، چی کاتە هەستیارە تاریخیەنە ئەنجامی گۊرە بەدەس مارمۍ، سەرو ئی بنەمایۍ سەرکۊتەی پەی گرڎو هەڤاڵا موازونە.
بژیۋۆ بژیۋۆ ڕابەر ئاپۊ