ناوەنڎو یاۋنەری هێزەکا سوریای دیموکراتیک (قەسەدە)ی بە ئەرەیاۋنېوە پەشڕاسش کەرڎۊ کە هێزەکۍ کۆماندۆو ئاڎیشا چالاکیېوەشا جە مەنتیقەو دەشیشی سەر بە شارو شەدادیی پانیشتوو حەسەکەی ئەنجامدان.

قەسەدە باسش چانەی کەرڎەن کە ئاڎۍ دوۋۍ چەتېشا گېرتێنۍ و چەتېوە تەریچ کە تەقەش ۋنەکەرڎېنۍ، جە ئاکامو وەرپەرچدایۊ هێزەکاشانە کوشیان.

جە یاۋنەریەکەو قەسەدەینە ئامان کە ئا گروپە چەتە جە سنوورو عێراقی و مەنتیقەکا چېرو دەسەڵاتو ئەرەگیری دەوڵەتو تورکیایوە پڕېنێوە پۍ ئانەی هێزەکا قەسەدەی و ئا مەڎەنیۍ کە دامودەزگاکا ۋېڕاوەبەرینە هەرمانە کەرا کەرانە ئامانج و ئەمنیەت و مەنتیقەکەی تېکبڎا.

قەسەدە تەئکیدش کەرڎۊ کە وەردەوامۍ با جە هەرمانەکاشا پۍ دلېنەبەرڎەو شانە نهێنییەکا چەتەکا داعشی.

هـ. ش