ئەنڎامەو فەرمانڎەیی گرڎی یەپەژەی، رۆهێلات عەفرینە، جە ساڵیاڎوو گەشمەرڎەبیەو بێریتانېنە (گوڵناز کاراتاش)ېنە، کە ساڵەو ١٩٩٢ ۋەران ۋەروو پەدەکەی و دەوڵەتوو تورکی ئەرەگیرینە تەسلیمبیەیش قبوڵ نەکەرڎ و چالاکیېوە فیداییانەش کەرڎ، جە هەمان وەختەنە بیە بە سەرمەشقە پۍ بە سوپا بیەو ژەنا ئازاڎیی، پۍ ANF ی قسېش کەرڎۍ.

 رۆهێلات عەفرینە دەسنیشانش کەرڎ کە، یەپەژە خەتەو مدرامانوو ۋېش سەروو میراتوو بێریتانۍ وەشکەرڎەن و واتش: "ئێمە ٣١ مین ساڵیاڎوو بە سوپابیەی ژەنا ئازاڎیی جە گرڎوو ژەنا ۋەرکەوتوو میامینی و جەهانی پیرۆز کەرمۍ. سوپاو ژەنا کە جە ۋیەرڎەو ئارۊنە نوێنەرایەتی ئیراڎەو ئازاڎیی ژەنا کەرۊ، بێگۆمان جە ئاینڎەیچەنە نوێنەرایەتی ئازاڎیی ژەنا کەرۊ. وەختۍ تەماشەو تاریخوو مرۆڤایەتی کەرمۍ جە ۋەران ۋەروو گلېرگەی، ئیراڎەو گلېرگەی، کولتوور و ئشناسنامەو ژەنۍ هجومېوە فرە کریان سەرشا. فرېوە جە تەڤگەرەکا ژەنا و فرېوە جە ژەنا ۋەران ۋەر بە دەسەلاڎداری پیای جە جەهانەنە سەرهۊردایشا کەرڎ. ئی عەقڵیەتە کە ۋېش هەنش هەمیشە بە ژەنېش واتەن، 'تۆ ئیراڎە نیەنی، تۆ حیچە نیەنی، تۆ هینەو ۋېت نیەنی'. ۋەران ۋەروو ئینەینە ژەنی سەرهۊردایشا کەرڎ، مدرامانشا کەرڎ و ئینۍ کۊشیاینە. چی مدرامانەنە ژمارېوە فرە جە ژەنا ڕووبەروو ئەشکەنجەی بیېوە. بە سەڎان ژەنیشا سۊچنۍ. بەڵام جە ۋەران ۋەروو سیستمی و ئەقلیەتوو پیای دەسەلاڎدارینە کە ۋېش پېسە سەڕوەری جەهانی ۋینۊ، هەنگام بە هەنگام مدرامان و کۊشیای ژەنا وەڵېکۊت و بەردەواما جە وەڵېکۊتەی.

پا مانۍ وەختۍ تەماشەو ڕاسی کوردی کەرمۍ، تەڤگەری ئازاڎیی بە سەرمەشقی ژەنا ئازاڎیی ۋېشا بەڕیکوستەی کەرڎەن، دژوو ئەقلیەتی فاشیستی کە گلېرگەش دلۍ سیستموو کۆیلایەتینە خنیکنان، سوپاو ژەنا ئازاڎی  کە ٣١ ساڵۍ سەروو ئەرەمەرزنایشەرە ۋیەرڎەن ئی ئەقلیەتشە دلېنەبەرڎەن. بێگومان سوپاو ژەنا مەبۊ تەنیا پېسە ڕێکوستەیۍ سەروازی تەماشە کریۊ. سوپاو ژەنا ئازاڎیی دەسکۊتوو ئایدۆلۆژیا، ڕێکوستەی، فەلسەفە، ڕۆح و زانستوو ژەنان. مشۊم سوپاو ژەنا چی چوارچێوەنە هۊرسەنگنایش پۍ کریۊ. سەرمەشقی ٣١ ساڵەو یەژاستاری کاریگەری قووڵش سەروو ژەنا ۋەرکەوتوو میامینی و گرڎوو جەهانی وەش کەرڎەن. کاریگەری گەورەش سەروو ئا ژەنا وەش کەرڎ کە چېروو سیستموو کۆیلایەتی، ناحەقی و نایەکسانینە بېنۍ. واتا سوپاو ژەنا پېسە دەنگێوە بەقوەتی دژ بە ناحەقی و نایەکسانی مرڎۊ. ڕابەر ئاپۆ ئیراڎەو ئا ژەنا کە نەتاوانشا مدرامان کەرا، مافەکاشا پارېزنا، بە زوان و کلتووری ۋېشا ئیسفاڎە کەراو وەڵۍ وست و حۊڵش دا گەشە کەرۊ. ئی ڕاسیەو فەلسەفەو ڕابەر ئاپۆی پۍ گرڎوو ژەنا جەهانی بی بە میرات. ژەنا گرڎوو دنیېنە ۋېسا دلۍ ئی فەلسەفەینە مۋینا و پێناسەو ۋېشا کەرا."

یەپەژە 11 ساڵېن بە ڕۆحێوە کە جە خەتەو بێریتانېوە هورشگېرتەن کۊشیای کەرۊ

ڕۆهلات عەفرینە ئەرەیاۋناش کە ژەناو فرەو یاگا جەهانی بەشڎارۍ ڕیزەکا یەپەژەی بیېنۍ سەرمەشقی ڕۆحوو ئی مدرامانیشا جە ئەستۊ گرتەن و پی شێوە بەردەوامە بیە:

"یەپەژە کە ١١-١٢ ساڵېن ئینۍ دلۍ مدرامانۍ گۊرەینە، درێژەدەرۍ میراتێوەنۍ جە ئاکاموو میراتی سوپاو ژەنا ئازاڎین کە ٣١ ساڵېن بە ۋېڕاگری و کۊشیایۍ گۊرۊ بەردەواما و سەرش هۊردان. ساڵانێوەن دژ بە عەقڵیەتێوەن کە نکوڵی جە زوان و کولتووروو گەلا کەرۊ، شارەکا ئەرەگیر کەرۊ ، بیە و بەهاکا گەلا پاشێل کەرۊ ئینا کۊشیایۍ گۊرەنە. جە کۆبانێ تا عەفرین و سەرێکانی کۊشیایۍ گۊرەش دژوو هێزێوە پېسە داعشی کەرڎ. داعش کە پەشتەو پەردەیۊ فرېوە جە زلهێزە میان دەوڵەتییەکا و وڵاتا جەهانی پەشتیوانیش ۋنەکەرېنۍ، فرەتەرین هومش دژوو ژەنا ئەنجامدا. جە ۋەران ۋەروو ئی عەقڵیەتەینە یەپەژە کۊشیایۍ گۊرەش ڕاوەبەرکەرڎ. بێ گومان یەپەژە هێز و میراتوو ۋېش چا ژەنا هۊرگېرت کە ٣١ ساڵېن بە مدرامانشا خۊتانکەرڎەیشا جە گرڎوو ژەنا کەرڎ. فرېوە جە ژەنا جە زوان و شۊنە جیاجیاکا ۋەرنیشتی چا خەباتەنە بەشڎارۍ بېنۍ. جەمەو ژەنا جە فرەو یاگا جەهانینە بەشدارۍ دلۍ ڕیزەکا یەپەژەی بیۍ و بیۍ بە یۊ جە سەرمەشقەکا ڕۆحوو ئی مدرامانیە. جە ۋەرنیشت یەپەژە کە پېسە سوپا و جمیەرېوە تاریکتەرین دەسەڵاتوو جەهانیش دلېنەبەرڎ، بی بە ئشناسنامە و جە جەهانەنە دەنگش داوە و چنی ئی کولتوورەیە سەروو پەیاوە مەنۊوە. بێگومان کاریگەری ئی مدرامانیە جە فرەو جمیەرەکا ژەنانە ڕەنگش داوە ئارۊ ئی ژەنۍ و جمیەروو ژەنا ئینۍ وەڵېوە.

بێریتانە دژوو خەتەو خیانەتی چالاکی ئازاڎیش ئەنجامدا

مدرامانوو هەڤاڵ بێریتانۍ ۋەران ۋەر بە زیهنییەت و دەسەڵاتوو خیانەتکاری تا ئارۊیچ کاریگەریش هەن. هەڤاڵ بێریتانە جە دژوو تەسلیم بیەی و زیهنییەتوو خیانەتی چالاکی ئازاڎیش بەرڎ ڕاوە. ئێمە جە چالاکییەکەو هەڤاڵ بێریتانېوە چانەی یاوایمېنە. هەڤاڵ بێریتانە پی چالاکییەیشە پەیامێوە پاسەش بە هێزەکا پەدەکەی خیانەتکاری یاۋنا 'شمە تەسلیمۍ بیدۍ نەک ئێمە'. خەتەو هەڤاڵ بێریتانۍ بیېنە بە خەتېوە کە جە ڕوو ئایدیۆلۆژی، ڕێکوستەی، سەروازی و جە گرڎ بوارێوە متاومۍ سەرش قووڵۍ بیمېوە. ئی ڕێبازە گرڎوو ژەنا کۆکەرۊوە، دژوو حەقیقەتوو خیانەتی بەرگنە و حەجگیز تەسلیموو خەتەو خیانەتی مەبە.

حەرپېسە چنی بەسێ و زاریفە جە تارریخوو کوردسانینە جە ۋەران ۋەروو هێزە ئەرەگیرەکانە تەسلیمۍ نەبیۍ، هەڤاڵ بێریتانەیچ چنی کولتووروو بەسێ و زاریفەی گەورۍ بیە و ۋېڕاگریش کەرڎ و ئی ڕاسییەشە بە ئاشکرا کەرڎەن؛ جە حەر کۊ سەپنای تەسلیم بیەی و خیانەت بۊ، مشۊم کولتوورێوە کە مدرامان و تەسلیمیەت ڕەڎ کەرۊوە بۊنە. یەپەژە ئارۊ ۋەرنیشتەنە مدرامانېوە گەورەش دژوو گرڎوو هێزە ئەرەگیرەکا نیشانە دان، پی میراتۊ مدرامانش کەرڎەن و جە کۊشیای ۋېشەنە بەردەواما. سەروو ڕاو ئی میراتەینە جەکولتوور و ۋیر و فەلسەفەنە فاڕیایش دەس پنەکەرڎ و چیولایچ بەردەوام بۊ.

جە ۋەران ۋەروو خەتەو مدرامانینە،  پەدەکە سەروو خەتەو تەسلیم بیەی و خیانەتی پاگیری کەرۊ وبەردەواما. دەوڵەتوو تورکی ئەرەگیری سەرەمڕە هجوم کەرۊ سەروو خاکی و شارەکاما. هەزاران گەشمەرڎېما هەنۍ و گرڎ ڕووۍ گەشمەرڎە دریۊ. پەدەکەیچ پېسە هامکاروو ئی هێزە ئەرەگیرەیە بەشدارا جە تاوانەکانە. گەرەکشا خەتەو تەسلیمبیەی دلۍ گەلی و هێزەکامانە پەرە پنەبڎۊ. دژوو ئا دەسکۊتا بە مدرامانوو گەلوو ۋەرنیشتی بەدەسئامېنۍ هجومېوە ۋەربڵاو هەن. بێگومان پێویسا گرڎوو ژەنا و گەلەکەما جە ۋەرنیشت ۋەران ۋەر پی خەتەو خیانەتیە هەڵوێسشا بۊ. ئا تەسلیمبیەیە کە دوژمن سەرمارە سەپنۊش، بە ماناو دلېنەبەرڎەی خاکی، کولتووری و بەهاکا گەلەکەیمانە. کاروەدای و هەڵوێس ۋەران ۋەر پی خەتەو خیانەتیە؛ بە کۊشیای، مدرامان و نوێنەرایەتی ڕای ڕاسۍ بۊ. حەرپېسە چنی جە تاریخوو مدرامانوو ئېمەنە بێریتانە نوێنەری گەورەو ئی ڕێبازەیە بۍ و پېسە یەپەژەی ١١ ساڵېن مدرامان و کۊشیایما نیشانە دا، ئارۊیچ خەتەو مدرامانی پۍ ئێمە ئەرکی یوۋەم بۊ. بە پەیلواو ئېمە گەلەکەما پی باوەڕ و ئیراڎۊ سەروو خەتەو مدرامانی بەردەوام بۊ".