چەمپەنەکەوتێوە تایبەتەنە چەنی ئاژانسوو هەواڵوو فورات (ANF)ی شێخ مەریوان هەمەوەندی، شێخوو عەشرەتوو هەمەوەندی کەرکووکنە، سەبارەت پا هجووم و کوشتارەو دەوڵەتی ئەرەگیروو تورکیای کەرۊش دژ بە گەلوو کوردی بەگردی و پانیشتوو کوردستانی بەتایبەتی قسێش کەرڎێ.

 'تورکیا سەدان ساڵێن دژایەتیی کوردی کەرۊ'

 شێخ مەریوان هەمەوەندی سەرۊکوو عەشرەتوو هەمەوەندی کەرکووکنە، سەبارەت بە بەرڎەوامیی هجوومەکاو دەوڵەتوو ئەرەگیروو تورکیای پەی سەروو خاکوو پانیشتوو کوردستانی، واتش: "ئێمە ئیدانەو هجووم و دژایەتییەکاو دەوڵەتوو تورکیای کەرمۍ، کە سەدان ساڵین تورک دژایەتیی کوردی کەرۊ و گرد لاێوە هجووم کەرۊ سەروو گەلوو کوردی، ئی هجوومۍ دەوڵەتوو تورکیایە پەی سەروو گەلوو کوردی تازۍ نییەنۍ سەرڎەموو عوسمانییەکاوە پەیش مەنێنێوە، کە موینمۍ تورکیا ڕوانە هجووم کەرۊ سەروو گەلوو کوردی ئازادیوازای، کە هجووم کەرۊ سەروو گەریلای و جەنگەوانا و تەنانەت ئەنداماو دژە تیرۊروو یەکێتی، کە ساڵانێوەن جیای گردوو دنیۍ جەنگوو تیرۊرساو داعشیشا کەرڎەن و یارڎەی کورڎاو پارچەکای تەریشا دێنە".

 'پێویسا جوابوو ئەرەگیرا بدریۊوە و جە ونەو گەشمەرڎاما وەشۍ نەبیمێ'

واوەی سەبارەت بە بەرڎەوامیی هجوومەکاو دەوڵەتی ئەرەگیروو تورکیای پەی سەروو خاکوو پانیشتوو کوردستانی بەگردی و مەنتێقەکاو چێروو دەسەڵاتوو یەنەکەی بەتایبەتی، شێخ مەریوان هەمەوەندی واتش: "موینمۍ بەرڎەوام یاگەکاو پانیشتوو کوردستانی دەوڵەتوو تورکی بۊردومانێشا کەرۊ و داواکارییچم جە بافڵ تاڵەبانی ئانەنە، کە بێدەنگ نەبۊ جە هجووم و دەسدرێژییەکاو دەوڵەتوو تورکیاینە پەی سەروو خاکوو کوردستانی و جوابوو ئەرەگیرا بدۊوە و جە ونەو گەشمەرڎاما وەش نەبۊ".

 'بەبۍ جیاوازی و جە حەرویروباوڕێوەنە بۊئانەش کورد بۊ تورکیا لاشۊ ڕەوان کوشۊش'

 پەی جوابدایۊ و ڕاگێری جە هجووم و دەسدرێژییەکاو ئەرەگیرا پەی سەروو گەلوو کوردی، سەرۊک عەشرەتە کورڎەکە واتش: "پێویسا گەل و تەماموو لایەنە سیاسییەکا و کورڎۍ یۊگێرتۍ با وەراوەروو هجوومەکاو دوژمنینە و ئەرەگیراو کوردستانینە، چونکوم ئەرەگیرۍ حیچ وەختۍ مەواچا ئی کورڎە سەربە چە حزب و لایەنێوەن بەڵکوم ئانە نامێش کورد بۊ، پەنەشا ڕەوا و سەرکەوتەین کە بداش وەنە و کوشاش".

'مشۊم یۊی گێرمۍ دژوو ئەرەگیرا'

واوەی ئا شێخوو عەشرەتی جە ڕا ئاژانسوو هەواڵوو فوراتی (ANF)یوە داواو یەکڕیزییش جە سەرکرڎەکاو کوردی کەرڎە و واتش: "ئێمە وێما شاروو کەرکووکیوە ئەرەیاونمێش، کە حیچ وەخت جە ونەو گەشمەرڎاو گەلەکەیما وەشۍ مەبیمۍ، داوا جە تەماموو سەرکرڎەکاو کوردی کەرمۍ کە یۊی گێرا دژوو ئەرەگیرا دەوروپەشتیما، کە ئێران و تورکیا و حەر وەڵاتێوە تەرۍ با، وەلۍ بەتایبەتی تورکیا کە سەدان ساڵێن گەلوو کوردی چەوسنۊوە".

 'ئەگەر دەسوو ناپاکی نەبۊ دوژمن مەتاوۊ بەئاسانی گەلەکەیما بکەرۊ ئامانج'

ئاخرۊ شێخ مەریوان هەمەوەندی سەرۊکوو عەشرەتوو هەمەوەندی کەرکووکنە، باسوو تەرسەو دەسوو خیانەتیش کەرد جە هامکاریکەرڎەی دوژمنینە دژوو ئازادیوازا و واتش: "ئانە کە هامکاریی ئەرەگیرا کەرۊ، پەی هجووموو سەروو گەلەکەیش ئانە ناپاک(خاین)ا و ئەگەر دەسوو ناپاکی نەبۊ یت دوژمن نمەتاوۊنە بەئاسانی گەلەکەیما کەرۊ ئامانج، چونکوم بەبۍ سیخوڕی ئەرەگیر نمەزانۊ، کە چە هێزێوە کوردی ئینا چە مەنتێقێوەنە، ڕوۍ مۍ ئا سیخوڕۍ، کە هامکاریی ئەرەگیرا کەرا لاو میللەتیوە ڕووسیاوۍ با".