ڕۆشنویرێ و مامۆسێ و کۆڵیارێ و نویسەرێ کوردێ و عەرەبێ، وۆرک شۆپێوەنە تیشکەشا وستە سەروو کێشەکاو وەرکەوتوو دلێڕاسەی و گرنگیی چەمکوو نەتەوەی دیموکراتیکوو ڕابەروو گەلوو کوردی عەبدوڵا ئۆجەلانی.
دەسوەڵیوزیی عەرەبی پەی ئازادی ڕابەروو گەلوو کوردی عەبدوڵا ئۆجالانی، بە هامکاریی ئەکادیمیاو زانستە کۆمەڵایەتییەکاو عەبدوڵا ئۆجالانی، سەروو زوومیوە وۆرک شۆپێوەشا گێڵنا، بڕێ نویسەرێ و سیاسەتمەدارێ کوردێ، عەرەباو میسری و سورییا و سعودیەی و ئیماراتی و فەڵەستینی و لوبنانی بەشدارێ وۆرک شۆپەکە بێنێ. دلێشنە ئامانجەکاو کۆشیای گەلوو فەڵەستینی و هۆکاروو ئاڵۆزییەکا تاوتۆ کریێ، هەرپاسە وەڵێنیاروو چارەسەری ئاشتییانە و دادپەروەرانەی کریا.
بەشەو یوەموو وۆرک شۆپەکەی نویسەرە و ڕۆماننویسەی میسرییە ئیلهام میلجیێ بەرد ڕاوە، ئەوەڵ کوڵە تارێخێوی دەسوەڵێوزییەکەی وزیا ڕووە، کە میسرەنە لاو ڕۆشنویرا و نویسەراو میسریوە دەسش پەنە کەرد و چندین ڕۆشنویر و سیاسەتمەدارێچ بەشدارێ بێنێ. ئەرەیاوناش کە ئەنداماو دەسوەڵیوزییەکەی گردشا سەروو دادپەروەربییەی دۆسیەکێ ڕابەروو گەلوو کوردی عەبدوڵا ئۆجالانی هامڕێنێ.
دمایی سکرتێری گردینوو پارتی سۆسیالیستوو میسری، عەندازەگیر بەهائودین شەعبان قسێش کەردێ، سەبارەت بە پڕۆژەو زایۆنیستی و ملەملێ ئیسرائیلی و فەلەستینی دوا. شەعبان واتش ئەنتی سامیزم دەوڵەتاو ئەوروپاینە و ئاخروو سەدەو نۆزدەهەمینە، بی بە مایێ سەرەوردای زایۆنیزمی.
کێشەو سیاسەتمەدارا و شناسنامەی
ئەنداموو دەسەو ڕاوەبەریی جمیەروو خاسسازیی (ڕیفۆرم)وو سوریای پرۆفیسۆر ئەمجەد عوسمان واتش، ، "پێویسا چانەیە بیاومێنە کە دۆزوو فەلەستینی بە پاو پەیلوای سیاسەتمەدارە عەرەبەکاو هەرێمەکەی شرۆڤە مکریۆ، ئی هەڵوێستە پەرسێوی دەربارەو چەمکوو شناسنامەی مارۆنە وەڵێوە، ئایا ڕەوشێوی هەمیشەییا یان ئینا پڕۆسەو فاڕیایەنە".
عوسمان ئەوەخوایش کەردۆ، بناغەو فرەو کێشەکاو هەرێمەکەی چێوی چەسپیان دەربارەو شناسنامەی. بە بڕواو عوسمانی، ئی ڕەوشە نمەبۆ بە مایێ چارەسەری و ئاڵۆزی و هەڕەشەکاو سەروو هەرێمەکەی زیاتەر مکەرۆ.
فاڕیایەکا دماو ٧ی تشرینوو یوەمی
ڕاوەبەریی فەڵەستینی، د. ئەیمەن ئەلڕەقیب باسوو سامی و پێناسەکەیش کەرد و واتش، سامیێ جوولەکێ نییەنێ و تەنیا ئی چەمکەیە بەکار مارا. لاو ئەلرەقیبیوە ڕووەدایەکاو ٧و تشرینوو یوەمی بی بایسوو ئانەیە واوەی دۆزوو فەڵەستینی بۆ بە پەرسەو جیهانی ئیتر جیهان یاوان ئا باوڕەیە کە مشۆم ئی ئاڵۆزییە چارەسەر بکریۆ.
ئەرەمەنەیەکاو ڕابەروو گەلوو کوردی و دۆزوو فەڵەستینی
دمایی ئەندامەو کۆمیتەو پەیوەندییە دیپلۆماسییەکاو کۆنگرەو ستارو سوریای، ڕیحان تەمۆوە واتش: "متاومێ ئیسفادە جە ئەرەمەنەیەکاو عەبدوڵا ئۆجالانی وربگێرمێ پەی چارەسەروو ئاڵۆزییەکا. بە پاو ئینەیچە مشۆم باسوو دیموکراسی و ئاشتی و ئا خاڵا بکەرمێ کە خزمەت بە گەلی مکەرا".
تەمۆوە واتش دەوڵەت-نەتەوە سەبەبوو فرەو کێشە و ئاڵۆزییەکانێ و ئەوەخوایش کەردۆ متاویۆ بە ئیسفادەکەردەی جە ئەزموونوو نەتەوەی دیموکراتیکی، ئاشتی بەدی بێ.
پێویسا ڕەوشوو ئیساتێ بەکارباریۆ
دمایی باڵیۆزی وەڵینوو میسری و ئەنداموو دەسوەڵیوزییەکەی، شەریف شاهین واتش، ڕاو ئەرەمەنەیەکاو ڕابەروو گەلوو کوردی عەبدوڵا ئۆجالانی دەربارەو نەتەوەی دیموکراتیکی متاویۆ ئاڵۆزییەکاو فەلەستینی چارسەرێ بکریا، ئەوەخوایش کەردۆ دۆزوو فەلەستینی و کوردی هامشیوەنێ، دۆزوو کۆشیای گەلان پەی ئازادی و ژیوای شکۆمەندی.
هەرپاسە سەرنویسەروو گۆڤاروو "الشرق الدیموقراطی" و مامۆسا سەڵاحەدین موسلم؛ دکتۆر و ئەوەکٶڵەرو سیاسەتەکاو شناسنامەی و هەرمانوکارو وەرکەوتوو دلێڕاسەی، تەها عەلی سەرنویسەروو پەلیانەو "الجنوبیە"و لوبنانی و مامۆستا، عەلی ئەلئەمین؛ دکتۆر و ئەوەکۆڵەروو تاریخوو ئیسلامی میسری، عەلی ئەبوئەلخێر؛ ئەنداموو دەسەو ڕاوەبەردەی ناوەندوو وەرنیشتی پەی ئەوەکۆڵیای ستراتیژی، مامۆسا کوردیار دڕەیی؛ مامۆسا و سیاسەتمەدار و چالاکوو مافپارێزنی سودانی نیعمەت کوکو محمەد؛ مامۆسا وئەوەکۆڵەروو هەرمانوکاروو وەرکەوتوو دلێڕاسەی، هانی ئەلجەمەل؛ ئەوەکۆڵەرەو هەرمانەو ئیسرائیلی، دکتۆر فەریناز عەتیە؛ وۆرک شۆپەکەنە قسێشا کەردێ، کێشەو شناسنامەی و کۆشیای ماف و جەنگەکاو وەرکەوتوو دلێڕاسەیشا ورسەنگنێ، تیشکەشا وستە سەروو گرنگیی چەمکوو نەتەوەی دیموکراتیکوو ڕابەروو گەلوو کوردی عەبدوڵا ئۆجالانی.
