١٣ەمین ساڵیاڎو شۆڕشو ١٩ـو تەممووزی قامیشلۆنە بە جۆشوخرۆشێوە گۊرۆ پیرۆز کریا. دلې ئاماڎەبیانە خەرما عەلی-ە، حەسەن شەرۆ و جەوهەر عوسمان-ە واتشا، جە ژیۋگێوە پەڕ جە قەیرانەنە، شۆڕشو ۋەرنیشتی پەی ۋەرکۊتوو مېیامینی و جەهانی خاوەن پێگێوە تاریخیا.
گلېرۊبیەو گەلی قامیشلۆنە بە مەبەسو مبارەکبایی و سڵامکەردەی، بۊنەو ساڵیاڎو شۆڕشو ١٩و تەممووزیوە لواڕاوە. جە مبارەکباییەکەنە ئەرەیاۋېیا کە ئا شۆڕشە نەک تەنیا پەی ۋەرنیشتی، بەڵکم پەی گرڎو گەلا ۋەرکۊتوو مېیامینی و جەهانی تاریخی بې.
جە ڕاوەبەرا بنەیانەو گەشمەرڎا تربە سپی خەرمان عەلی-ە، پەی ئاژانسو هەواڵو فوراتی قسێش کەرڎې و واتش: "ئارۊ پەی ئێمە ڕوێوە فرە تایبەت و ماناڎارا. گۊرەتەرین هیواما ئانەنە کە چوار پارچەو کورڎەسانی ئازاڎ بۆ و گرڎ ڕوې گەلەکەیما جەژنەو شاڎیی بۆ."
هامسەرۆکو ئەنجوومەنو ڕاوەبەری ئیدارەو ۋێڕاوەبەری دیموکراتیکو کانتۆنو جزیرەی حەسەن شەرۆ ئەرەیاۋناش: شۆڕشو ١٩و تەممووزی پەی ئاواکەردەی سوریایې دیموکراتیکی هەنگامېوە بنەڕەتییەنە. ١٩و تەممووزی نەک تەنیا پەی گەلو ۋەرنیشتی بەڵکم پەی تەمامو گەلا سەرنیشت و ۋەرکۊتوو سوریای بیەن بە خاڵێوە تاریخیە. ئارۆ ۋەرکۊتوو مېیامینی بیەن بە نموونێوە گرنگو مۆدێلو نەتەوەی دیموکراتیکی. پەنەوازا سوریا پېوەرە سیستەمەکەیش ئەرەمەرزنۆرە، بە ناسنامە، باوەڕی و دەنگو ۋێش چنەشەنە یاگەگیر بۆ. ئارۆ ئا سیستەمەی سەرنیشتوو ۋەرکۊتوو سوریاینە ئەرەمەرزیان، نموونەو ئی ژیۋایە هامبەشەینە. گرڎ کەسې ئی ڕووەیە بە جۆشوخرۆشۆ پیرۆز مکەرا."
ئەندامۊو ئەنجوومەنو ژەنا ڕێکوزیاو بنەیانە گەشمەرڎەکا جەوهەر عوسمان-ە: "ئی شۆڕشە بە سەرمەشقایەتی ژەنا و جوانا ڕاوەبەر کریا، شۆڕشو ١٩و تەممووزی بە سەرمەشقایەتی گەلو کوردی دەسشپنەکەرڎ، بەڵام بە ماوێوە کەم فاڕیا پەی شۆڕشێوە هامبەشو گەلا ناوچەکەی. ژەنی سەرمەشقې ئی شۆڕشەیشا کەرڎ و جوانێچ بەفراوانی بەشدارې دلې ڕیزەکاو ئەوەکۊشای بیې. ئی ڕووەدایې کە ئارۊ قۆمیانە جە دژو هێزە تاریک پەرسەکا، بەفیداکاری زاوڵا ئێمە بەردەوامیشا هەن. ۋەرو ئانەی شۆڕشو ١٩و تەممووزی پېسە پڕۆژێوە تاریخی موینمې و پی ڕۊحیانەتۆ جە ئەوەکۊشاکەیما بەردەوامې بیمې."
