پەرلەمانتاروو هەدەپەو شەرناخی، نەورۊز ئویساڵە، واتش: "بەڕێز ئۊجالان ٢٤ ساڵێن دژوو ئی سیستمەیە کۊشیۊ. پێویسا گردما وەراوەروو پەرسەو گۊشەگیریوە هۊشیارۍ بیمۍ. تا گۊشەگیری دماییش نۍ، پەرسەکاو گەلوو کوردی چارەسەرۍ مەبا".
ڤێستیڤاڵی چاندی و هونەری کە بە هامکاریی ڕێکوزیاو ساناتچای، کۊنفیدراسیۊنوو سەندیکاکاو کرێکاراو جەماوەری (کەسک)ی و کۊنفیدراسیۊنوو سەندیکاکاو کرێکارە شۊڕشگێڵنا (دیسک)ی و بە دروشموو "هونەری ئازاد، ژەنی ئازادە" ئێلحنە ملۊ ڕاوە، جە دووەم ڕۊشنە بەرڎەواما.
جە چوارچوەو ڤیستیڤاڵەکەینە، پانێڵێوە بە ناموونیشانوو "گۊشەگیری و ئەسیمیلاسیۊن"ی لوا ڕاوە. پانێڵەکێنە، پەرلەمانتاروو پارتوو یەکسانی و دیموکراسیی گەلا (هەدەپ)ی، نەورۊز ئویساڵە، تیشکەش وستە سەروو گۊشەگیریی سەروو ڕابەروو گەلوو کوردی عەبدوڵڵا ئۊجالانی و واتش: " ئادۍ پابەندۍ یاسا میاننەتەوەییەکا مەبا. تەنانەت یاساکاو وێشا پەیڕەو مەکەرا. دلۍ یاسا میاننەتەوەییەکانە دیدار چەنی پارێزنەرا بە حیچ شێوێوە قەدەغە نییا. وەلۍ ئیمراڵینە ئی دیدارۍ بەبۍ حیچ سەبەبۍ ئاستەنگ وزیۊ وەرڎەمشا. جە ڕاو گۊشەگیرییوە مافەکۍ پاشێلۍ کریا. بەڕێز ئۊجالان واتش؛ "جە ڕۊو گێریایمۊ تا ئیساتۍ گۊشەگیری هەن"، گۊشەگیری بە پیلانگێڵنی دەسش پەنە کەرد و تا ئیساتێچ بەرڎەواما. تەنانەت قەدەغەن پاسەوانەکێچ قسۍ چەنی بەڕێز ئۊجالانی کەرا. هەلومەرجوو ژوورەکەیچش فرە خراپا".
ئویساڵە درێژەنە ئاماژەش کەرد بە ئامانجوو گۊشەگیری و واتش: "جە راو گۊشەگیرییوە جڤاکی دیزاین کەرا. بەڕێز ئۊجالان ڕابەروو گەلوو کوردین. کاریگەرییوە گەورەش هەن. وەرکەوتی دلێڕاسیننە سیستمێوە تازە وەش کریۊ. چی سیستمەنە جیاتیی کوردی ئازادی، کوردی کۊیلەشا گەرەکا. پێسە درێژە بە گۊشەگیری مدا. ئۊجالان بە مدرامان جوابوو گۊشەگیرییش داوە. وەختۍ چاگە، ویرش ئینا لاو دماڕۊو گەلوو کوردیوە. هەمیشە ئینا بەرهەمئارڎەینە. زینداننە ٢٠ کتێبێش نویستێنۍ. ئانە ٢٤ ساڵێن بەڕێز ئۊجالان دژوو ئی سیستمەیە کۊشیۊ".
ئویساڵە واتشۊ، گەرەکشانە گەل ڕابەروو گەلی کوردی عەبدوڵڵا ئۊجالانی هۊش نەبەرۊوە، جە ڕاو جەنگی تایبەتیوە گەرەکشانە خەڵکش دوور چەنە وزاوە، دماتەر واتش: "وەلۍ ئیساتۍ مەتاوا ئینەیە کەرا و هزروو بەڕێز ئۊجالانی گرد لێوەنە وەڵا بیەنۊ. چی هەڵمەتۍ دماینە سەرانسەروو دنیێنە، ئی ڕاسییەما دی.پێویسا گردما وەراوەروو پەرسەو گۊشەگیریوە هۊشیارۍ بیمۍ. بەڕێز ئۊجالان ٢٤ ساڵێن مدرامان کەرۊ، تا گۊشەگیری دماییش نۍ، پەرسەکاو گەلوو کوردی چارەسەرۍ مەبا و تا مۍ ئاڵۊزتەرۍ با".
دمایی هامسەرنویسەرەی گردینەو گۊڤاروو دەستاری، ژین ئاریانە، ئاماژەش کەرد بە سیاسەتوو ئەسیمیلاسیۊنی، کە ڕابەروو گەلوو کوردی عەبدوڵڵا ئۊجالان دژوو ئی سیاسەتەینە و تیشکەش وستە سەروو گرنگیی هێزوو ژەنا و پێسە قەوەتتەرین هێزوو دژوو ئی سیاسەتەیە نرخناش، ئینجا واتش: " ئەگەر زیهنیەتوو ئێمە پەی پەرەپەنەدای و وەڵاکەرڎەیۊ چاندی و زوانەکەیما، ئانە پێویسا نزیکایەتی و کۊشیاێوە قەوەتما بۊ. دارەکاما سۊچنا، وارڎەکەیما بە شێوازی جیاواز بە نامۍ ڤێستیڤاڵیوە پێشکەش کەرا. ئا ڤیستیڤاڵۍ کە لاو دەسەڵاتیوە ڕێکۍ وزیا، بە ئامانجوو ئەسیمیلاسیۊنی ملا ڕاوە. پەی خەڵەتنای گۊرانیۍ کوردیۍ پێشکەشۍ کەرا. وەلۍ تاکە ئامانجشا ئانەنە، کورڎێوە جیاواز نیشانە بدا و دلۍ قاڵبێوەنە قەتیسش کەرا".
پانێڵەکە بە پرسیار و جواب دماییش ئاما.
