هامسەرۆکەی گردینەو پارتوو یەکسانی و دیموکراسیی گەلا (دەم پارتی) تولای حاتەم ئۆغۆللارییە  کۆبییەیوەی حەفتانەو پارتەکەیشنە پەرسە گەرمەکێش ورسەنگنێ.

حاتەم ئۆغۆللارییە تیشکەش وستە سەروو کودەتاو ١٥و تەمموزو ٢٠١٦ و واتش گرد کودەتاێوەنە کرێکارێ  و هەژارێ و چەپەکێ و سۆسیالیستەکێ و ئۆپۆزیسیۆنەکێ باجی هەرە گەورەشا دان، ئەوەخوایش کەردۆ ئاکەپە ئیسفادە جە هەوڵێ کودەتای ورگێرت و ڕژێمەکەشا سەروو ونەو ئینسانەکاوە ئەرەمەرزنا.

حاتەم ئۆغۆللارییە واتش ١٥و تەمموزی کودەتا نییەن، پرۆسەو وەڵێ و دماو ١٥ و تەمموزی سیناریۆن، واتش: "زەرەروەنەکەوتەو ١٥و تەمموزی گلێرگە بێ. چا ڕووەوە ئابووری شکسش ئاردەن، سیاسەت شکسش ئاردەن، چێویو نەمەنەن بە نامێ دیموکراسییوە".

حاتەم ئۆغۆللارییە تیشکەش وستە سەروو دۆزوو کۆبانێ و گەزی، ئەوەخوایش کەردۆ، ئینە کودەتای هەقەتینا.

دمایی ئاماژەش کەرد بە دەسملەرەگێرتەی شارەوانیی جولەمێرگی و واتش ئی کودەتا جە کودەتاو ١٢و ئەیلولی خراپتەرا، واتش: "تا قەیوم نەکێشیۆوە و ڤیان تەکچە پێسەو سەرۆکەو شارەوانی نەنریۆرە، مدرامانما بەردەوام مبۆنە".

هەرپاسە تیشکەش وستە سەروو دەسبەسەرکەردەی و فشاروو سەروو ڕۆنامەوانا، واتش تورکیا ئینا ڕیزوو ئەوەڵوو ئا وەڵاتانەیە کە ڕۆنامەوانا موزۆنە زیندان، واتش: "بەگردیوە ٢٠٤ ئەرەمەرزیێ میدیاییێ، ٦ ئاژانسێ هەواڵی، ٧٠ ڕۆنامێ، ٢٠ گۆڤارێ، ٤١ ڕادوێنێ، ٣٨ تەلەفزوێنێ، ٢٩ چاپخانێ و کۆمپانییێ وەڵاکەرەیوە وزیێنێرە. سەدان کارتێ چاپەمەنی ورشنیێنێوە و ڕۆنامەوانەکێشا گیریێنێ".

حاتەم ئۆغۆللارییە مانشێتوو ڕۆنامەو ئۆزگور گوندەمیش نیشانە دا، کە ١٩و  تەموزو ٢٠١٦ وەڵا کریانۆ، مانشێتەکە ماچۆ: " کۆشکەو ئاکەپەی هەوڵێ کودەتاکەیشا بە دەرفەتێو زانا و کودەتاو وێشا کەرد. چەتەکێ جە جادەکانە وەڵێ بیێنیوە و هێزە دیموکراتیکەکا مکەرانە ئامانج". حاتەم ئۆغۆللارییە واتش: "ئۆزگور گوندەم ڕستێونە گردوو ڕووەدایەکاش گێڵنێنێوە".

حاتەم ئۆغۆللارییە واتش، ئێمە نەریتوو مدرامانیوە ئامێنمێ و سەرێمگنمێ، بە هومێدۆ مکۆشیەیمێ، هەرپاسە واتش: "ئێمە نەبیێنمێ بە بەشێوە جە کودەتای و کودەتاچییەکا. ئێمە پەشتەو پەردەو کودەتاکەیما ئاشکرا کەرد و بەڕۆشنی بە ڕای گردینیما ئەرەیاونا. ئێمە ئامادێ نەبێنمێ بیمێ بە فیگەرێ ڕۆحوو یەنیکاپی. پاڵوو گەلینە مدرایمێ. چی ئینەیە ماچانە؟ وەروو ئانەیە ئۆپۆزسیۆن جە یەنیکاپی ڕاش پەی ئەرەمەرزنای ڕژێمی تازەی وەشە کەردە".

هەرپاسە جەختش کەردۆ ئا ڕژێمە دوژمنایەتیی گەلی مکەرۆ و ئا ئۆپۆزیسیۆنە باسوو تازەکەردەیوە مکەرۆ، ئیسفادەش پەی گەلی نییەن، واتش: "پەوکای ماچمێ، چارەسەر ڕای یەرەمەنە. گێڵیاروو ڕای یەرەمێچ دەم پارتییەن. متاومێ شکسشا پنە بارمێ. چونکوم فرێنێ، ئێمە پەی ڕەنج و دادپەروەری مکۆشییەیمێ. کۆشیایما پەی ئانەیا ٨٥ ملوێن هاموەڵاتێ ئێمە بە یەکسانی و ئازادیی چی وەڵاتەنە بژیوانە".