ڕێکوستەی پارتوو یەکسانی و دیموکراسیی گەلا (دەم پارتی) وانی، چنی ٢٤ ڕێکوزیایا بۊنەو "٢١ و شوباتی ڕۊو جەهانیی زۋانی ئەڎای"وە کۆبیەیۆ و کۆنفرانسێوە ڕۆنامەوانیشا بەست. جە چالاکییەکەنە لافیتۍ "با زۋانی کوردی بۆ بە زۋانی ڕسمی و پەروەردەیی" و "کورد، کوردی، کوردسان" ،"زۋانما شکۆو ئێمەن" بەرزۍ کریێوە".

هاموتەواچوو کۆمیسیۆنوو زۋانی و چاندوو دەم پارتی، حەمید دڵبەهار ئەرەیاۋناش چنڎین زۋانۍ ئینۍ ۋەروودەم و هەڵمەتەو تاونایۊینە یۊ چانیشایچ زۋانی کوردین، جە ڕۊو جەهانیی زۋانی ئەڎایینە دماڕۊو چنڎین زۋانا ئینا چێروو تەرسێنە، واتش: "یۆ چا زۋانا ، زۋانی کوردین، کە دەیان ملوێن کوردۍ قسێش پنە کەرا. مشۊم عال بزانیۆ زۋانی کوردی یۊن جە زۋانە قەڎیمی و دۊڵەمەنڎەکا مرۆڤایەتی".

دڵبەهار ئەرەیاۋناش زۋانی کوردی بیەی و ئشناسنامە و بناغەو کوردان، هۆش و جەسڎەو کوردان، کۊڵەکۍ یۊبیەو نەتەوەیی کوردیا، بێ زۋانی کورد و کوردسان بیەیش مەبۆ، ئازاڎیی زۋانی کوردی ئازاڎیی کورد و کوردسانیا، حەرپاسە واتش: "هێزە سەردەسەکۍ حۊڵ مڎا زۋانی کوردی سنوودار کەرا، بەڵام مشۊم بزانا زۋانی کوردی و کۊشیای پۍ زۋانی کوردی، مژارێوە ستراتیجییا و پۍ کوردا خەتەی سورەنە. زۋانی کوردی پێسە زۋانی ئینگلیزی و ئەڵمانی و فەرەنسی و عەرەبی و فارسی و تورکی و گرڎوو زۋانەکا، ساحیب و مافی بنەڕەتییا و ئینەیچ حەتینەن.

بەحیچ کلوەجۍ شیاوو مشتومڕی نییا. پێویسا ملوێنان کوردۍ و گرڎوو جمیەری و پارت و ڕێکوزیا و لایەنە کوردییەکا پۍ ئازاڎیی زۋانەکەیشا یۊگێرا".

داواکاریەکۍ

دڵبەهار ئەرەیاۋناش تا زۋانی کوردی بۆ بە زۋانۍ ڕسمی درێژه بە کۊشیای مڎا و داواکاریەکۍ ۋێشا پاسە ڕیزکەردۍ:

"* جە گرڎ یاگێنە زۋانی کوردیما گەرەکا و پۍ ئینەیچە کۊشیەیمۍ. ئی کۆشیایچە چێگە بەدماوە بەردەوامە.

* بێگومان داواکێما و ئامانجەکێما پۍ زۋانی کوردی ڕۊشنۍ و کراوێنۍ.

* پێویسا زۋانی کوردی بۆ بە ساحیب و ستاتۆیۍ ڕسمی و میان نەتەوەیی.

* پێویسا بە یاسای دەستوری و میان نەتەوەیی بەشێوێوە ڕسمی دڎانش پۊرە بنریۆ.

* پێویسا کوردی بۆ بە زۋانوو پەروەردەی.

* پێویسا جە پەرلەمان و پارێزگا و شارەوانی و دادگا و خەسەخانەکانە زۋانی کوردی بەکاربۍ.

* پێویسا ڕێکوزیاو زۋانی کوردی بەشێوێوە ڕسمی جە تەرەفوو نوێنەرا گەلوو کوردیوە ئەرەمەرزیۆ و هەرمانەش پۍ کریۆ.

* ئەگەر دەرفەت پۍ تورکی بۆ، پێویسا بەهەمان ئاست دەرفەت پۍ کوردیچ بۆ".