جەنگو بەینو ئیسرائیلی و ئێرانی، بە هرووژمەکا هەردووە وڵاتیی پەی سەرو ناوجەرگەو شارەکا مەترسییەکێش زیاڎۍ کەردێنۍ. بەپاو زانیارییەکا، جە باتیام هرووژمېوە موشەکی ئێرانینە پەی سەرو باڵەخانێوە ١٠ نهۆمی، لاوکەمیۆ شش کەسۍ گیانشا جە دەسدان، حۊت کەسۍ تەریچ چېرو دارووپەردووینە مەنێنۍ. جە هەمان کاتەنە، جە بەشو سەرنیشتو ۋەرنیشتو تارانی، سەرویۆ سەرو یۆی دەنگو ئەوەتەقای مژنەویۆ. میدیاو ئێرانی ئەرەیاۋناش کە سیستمەکۍ وەرگیری ئاسمانیی جە پایتەختەنە، وزیێنۍ ئامادەباشیۆ.

ئیسرائیل جە هرووژمە ئاسمانییەکاش بەردەواما

ئیسرائیل بەدرێژایی شەوەی ۋېیەردۍ هرووژمەکېش پەی سەرو ئێرانی بەردەوامیشا بۍ. سوپاو ئیسرائیلی دێپۆی نەوتەو شەهرانیش جە تاران و وێستگێوە سەر بە وەزارەتو وەرگیریش جە ئیسفەهان بە ئامانج گێرت. بەپاو زانیارییەکا جە هرووژمەکەو سەرو تارانینە ٦٠ کەسۍ گیانشا جە دەسدان کە ٢٠ـشا زاوڵێنۍ. نوێنەرو نەتەوە یۊگێرتەکا ئەرەیاۋناش کە بەگرڎیی ژمارەو ئانیشا گیانشا جەدەسدان ٧٨ کەسێنې.

ئیسرائیل پەیامو 'چۆڵکەردەیش' دا بە هاموڵاتییا ئێرانی

یۆڤ گاڵانت وەزیرو وەرگیری ئیسرائیلی و ئاڤچای ئادرای واتەواچو سوپای جە پەیامێوەنە بە زوانی فارسی بانگەوازشا پەی خەڵکو ئێرانی کەردەن. جە پەیامەکەنە داواشا کەرڎە کە ناوچەکا دەوروبەرو کارگەکا هۊرگێرتەی چەکی، چۆڵۍ بکریا و زانیاری نەڎریۆ بە دەسەڵاتدارا.

هۆشدارییەکەو ئادرای، پېسە چنی وەڵتەر جە جەهانی عەرەبینە پېسە غەززەی و لوبنانی بەهەند هۊرگیریۍ، جە ئێرانیچ بە وردی چەمڎاری مەکریۆ.

حۊت فەرماندۍ پلەدارۍ کوشیې

سوپاو پاسدارا ئێرانی ئەرەیاۋناش، جە هرووژمەکا ئیسرائیلینە حۊت فەرماندۍ تەرۍ پلەدارۍ سەر بە هێزە ئاسمانییەکا ئێرانی کوشیێنۍ. بەپاو بەیاننامێوە ئا فەرماندۍ کوشیێنۍ ئینێنۍ: مەحمود باقری،داود شێخیان،محمد تاهیرپور،مەنسور سەفەرپور، مەسعود تەییب، خەسرەو حەسەنی و جەواد جەرسرا.

ئێران ناڕەزایی تنش ۋەرا ۋەر بە ئەمریکای نیشانەدا

عەباس عێراقچی وەزیرو جبەرو ئێرانی ئەمریکاش بە پەشتیوانیکەردەی ئیسرائیلی تۆمەتبار کەرڎ. جە پەیامێوەنە سەرو تەلەگرامیۆ واتش،"بەبێ ئاگاڎاریی و ڕاپنەدای ئەمریکای ئی هرووژمۍ ئەنجام نەدریێنۍ." عێراقچی ئاماژەش پانەی دا کە ئی هرووژمۍ گفتوگۆ تازەکۍ پېوەس بە ئەتۆمی کە پلانەش پەی نریابێرە جە مابەینو ئێرانی و ئەمریکاینە دەسپنەبکەرا، شێونا.