پەیوەس بە هرووژمەکەو دەوڵەتو تورکی پەی سەرو کۊششکارا چاپەمەنی شەنگالی کە بی بە مەڵامەتوو زامڎاربیەو شش کەسا، کە هەریۆ جە پەیامنێراو چرا تیڤی و چرا ئێف ئێمیشا دلێنەبێنۍ. تەڤگەرو ئازاڎی ژەنا ئێزیدی (تاژێ) بە بەشداری جەمێوە جە ئەڎایا شەنگالی جە مەنتیقەو دوگرێنە ئەرەیاۋنێوە ڕۆنامەوانیشا ۋەناوە.

بەنامۍ تاژێوە، ئەڼامەو تاژێی ئەنجومەنوو سەردەشتی، ئەڎا کنێ خدرە قسېش کەرڎۍ. جە سەرەتاو ۋەنایۆ ئەرەیاۋناکەینە هرووژمەکەش شەرمەزارکەرد و واتش: "ئەرەیاۋنکارا چرا تیڤی کریۍ مەرام. پۊکەی ماچمېشۆ تەنانەت گرڎوو دوژمنایچما یۆبگێرا نمەتاوا چراوەو ئێمە کوشناوە، چرا تیڤی هەر پرشنگدار مبۆ."

جە بەردەوامی ۋەنایۆ  ئەرەیاۋناکەینە ئەڎا کنێ ئاماژەش پانەی دا مەراموو ئی هرووژما ئاستەنگ وەشکەردەین پەی گېڵایۆ شەنگالییەکا پەی سەرو خاکو ۋێشا و پی جۆرە بەردەوامە بیە: "بە هەر جۆرۍ هرووژم ئەنجام بڎا، شەنگالییەکۍ هەر مگێڵاوە پەی خاکو شەنگالی. گەر تەنیایچ مەناوە، ئانە هەر مڎراماینە بیمۍ."

جە دمادماینە ئەڎا کنێ هیواو خاسبیەیۆیش پەی زامڎارەکا واست و واتش: "ئیراڎەما قەوەتا و دژشا مردمێوە. چونکی ئیراڎەو ئێمە یەبەشە، یەژەشە، ئاسایشوو ئێزیدخانی و مڎرامانوو ژەنا ئێزیدییا. نزیکۍ بیمێوە جە ساڵوەگەڕو ڕۊی سیاوو قڕکاریەکەی، بەڵام دژمن تەنانەت جە یاڎکەردەیۆ قڕکەردەکەیچ متەرسۆ. هەرکەسێ دەسش چی خیانەتەینە بۆ دادگای و ۋنەپەرسایۆش چنە مکریۆ، پەی ئانەی چنەما بتەرسا."

کۆنگرە ڕۆنامەوانییەکە بە دروشمەو "بژیۋۆ مڎرامانوو شەنگالی" دمایش پنە ئاما.