فەرماندەیی یەبەشەی جە ٧ەمین ساڵیاڎوو هجوومەکەو خانەسۆرینە، ئەرەیاۋنێوەش وەڵاکەردۆ و ئاماژەش پانەی کەرد: " پۍ ئانەی جەنگ ڕووە نەڎۆ، فرە بەهەستیارییوە جمایمێوە. بەڵام گرڎوو ئا حۊڵا پەدەکەی بانۍ بە مایۍ ۋەرپەرچدایۆ تنی".
فەرماندەیی یەبەشەی جە ٧ەمین ساڵیاڎوو هجوومەکەو خانەسۆرینە، ئەرەیاۋنێوەش وەڵاکەردۆ. یەبەشە جە سەرەتانە گەشمەرڎا خانەسۆریش بە رێزۆ یاڎکەردێوە و وەعدوو پارێزنای گەلی و دەسکۊتەکاش واوەی کەردۍ.
ئەرەیاۋناکەی پی جۆرەنە:
"ئا هجوومە پێ سەروو خانەسۆری ئەنجامدریا بۍ، پلانەو دەوڵەتوو ئەرەگیری بۍ و ئا هجوومە سەروو دەسوو پەدەکەی ئەنجامدریا. هجوومەکەو سەروو خانەسۆری، دماو رزگارکەردەی شەنگالی ئەنجامدریا. شەنگال بە دەسوو کناچا و کوڕا ئی گەلیە و بە سەرمەشقایەتی هەپەگەی، یەژاستاری و جە تەرەفوو هێزەکاو یەبەشە-یەژەشەیۆ رزگار کریابۍ. جە ڕاو هامپەیمانی هێزەکا بەریۆ و بڕۍ لایەنا جیاوازیوە نامابۍ ئاراوە. بە تەمامەتی بە داواکاری و ئیراڎەو گەلی و بە سەرمەشقایەتی سەربەخۆ ئا سەرکۊتەیە بەدەسئامابۍ. دماو ئا سەرکۊتەیە وردە وردە هێزوو گەلی ۋێش رێکوست و سەروو ئا بنەمایۍ ۋێڕاوەبەری ۋێش وەڵۍ وست. بەڵام ئەرەگیری وەرگەو ئا گرڎ سەرکۊتاشە نەگێرت. ۋێش جە ۋێشەنە سەروو ئا بنەمایۍ هجوومەکەشا کەرد. پەدەکەیچ حەر ۋەروو ئانەی کۊت جمای. پێویسا سەروو ئا بنچینەیە جە دلێینەو هجوومەکەو ٣ۍ ئاداری بیاومێنە. بەتەمامەتی ئا هجوومە وەرگەنەگرتەی و نەفەس درێژنەبیەی بۍ ۋەرا ۋەر بە ئیرادەو گەلی. چونکی گەلێوە رێکوزیا پەنەوازش پاڎیشا مەبۆ. گەلی رێکوستەکریا بە تایبەتی جە بواری ئەمنی، کولتوری و سیاسینە سەربەخۆ بۆ. چی ڕووانگۆ توڕەیی پەدەکەی مایۍ ئەنەیاوایا. ۋەروو ئانەی چنڎین ساڵێن پەدەکە گەلی هۊرخەڵەتنۆ. ماچۆ ' من ئیراڎەو شمەانا و مەڵامەتوو پارێزنای شمەنا'، بەڵامی دمایین کۊکوشی بەرش وست کە پی جۆرە نییا. وەختۍ داعش بۍ، پەدەکە بڕەمابۍ، وەختۍ مێڎانەکەیچ ئازاڎ بی، تازە بە تازە کۊت ۋێش و ترۊمبێلە زریپۆشەکێش فاڕێوە پې مەنتیقە ئازاڎ کریایەکا. گەلەکەما جە ۋەرا ۋەروو ئاڎ خیانەتەینە هەڵوێسش بۍ. گەل و گەریلاکاو شەنگالی پێوەرە کۊتۍ جمای. وەختۍ ئینسان چا حاڵەتانەو گەشمەرڎەبیەی ٣ۍ ئاداری تەماشە کەرۆ، ئینسان موینۆ کە خەڵکوو شەنگالی بە یەک دەنگ، بە یەک دەس ۋەرشا بە ئەرەگیری گێرت. جە مێڎانوو کۆمەڵایەتی هەڤاڵ نازێنە، جە ئەرەیاۋنای ئازاڎیینە هەڤاڵ نوژیان، جە هێزە سەروازییەکا بە سەرمەشقایەتی مدرامانوو هەڤاڵ ئۆرهان، چەکداری و چیای، کۊشیۍ و بە گرڎیی ١٢ هەڤاڵێما گەشمەرڎۍ بیۍ. ئا ئەنجامە جواب و ۋەرپەرچدایۆ تن بۍ جە دژوو ئەرەگیری، کاروەدایۍ گۊرەبۍ. جە ئاکامەنە ئا جوگرافیا پۍ پەدەکەی چۆڵ نەکریا.
ئارۊیچەنە پەشتەو پەردەیۆ سات و سەودای فرە سەروو شەنگالی کریۆ. فرەو جاری پەدەکە هەڕەشۍ سەروو ئی جوگرافیایە وەش کەرۆ. نەک هەر هەڕەشۍ، پلانە و حۊڵدایچشا هەن. ئانەی یاگۍ تەعاجوبیا پەشت بەستەین بە دەوڵەتوو تورکی. ئا دەوڵەتە جە گرڎوو تاریخوو ۋێشەنە ۋەرپەرسا جە چنڎین کۊکوشیا دژوو شەنگالی. پەدەکە عال مزانۆ کە ئێمە پێسە خەڵکوو شەنگالی جە دژوو ئەرەگیری عوسمانییەکا چنڎە هەستیارێنمۍ. بەڵام دیسانیچ ئا هێزە دەس جە پلانە چەپەڵەکاش هۊرمەگێرۆ. دەوڵەتوو تورکیایش کەردەن بە مامۆسا پۍ ۋێش و ئارۊیچ پێسە ئاڎیی بەنامۍ ئێزدییەکاوە قەیوم کیانۆ پۍ ئەنجومەنوو پارێزگاو نەینەوای، پەرە بە سیخوڕی مڎۆ و حەرپاسە چنڎین پلانۍ چەپەڵێشا هەنۍ. بەڵام با پەدەکە عال بزانۆ کە ئا وەختە پۍ ئانەی جەنگ ڕووە نەڎۆ ئێمە تا دما نەفەس هەستیارانە جمایمێوە و بە وریاییوە مامەڵەما کەرد. بەڵام ئی جارە گرڎوو حۊڵەکا پەدەکەی بێ ئیلاو ئەولا و بێ مشتومر ۋەرپەرچدایۆ تنش شۊنیرە مۍ. ئی جارە جە گرڎ وەختۍ زیاتەر ئاماڎێنمۍ، کە هەم گەلەکەیما و هەم دەسکۊتەکا ۋێما پارێزنمۍ.
جە سەرەتاو کۊکوشیەکەیۆ تا بە ئارۆ پا بۊنۆ قوربانیۍ فرە بەقیمەتۍ پێسە؛''بەرخودان، مام زەکی، زەردەشت، ئارین، بێریڤان، سەعید، دژواری و ئازادی و چی دماییەیچەنە سەعدونما'' پێشکەش کەردەن و پاشەکەشەما نەکەردەن جە ئامانجەکەیما کە بریتیا جە ژیۋای جە وڵاتێوە ئازاڎەنە. هجوومەکۍ مەیا ئاراوە با بەیا، جە چ لێوە مەیا با بەیا، ئێمە سەروو ڕا و رێبازوو گەشمەرڎەکاما کە داستانی قارەمانانەشا نویستەنۆ تا دما نەفەس ۋێڕاگری کەرمۍ و وەرم و ئامانجوو ئاڎیسا مارمۍ دی. ئێمە ئا وەعدەما پێسە چنی جە یووەم ڕۊوە کە جە هەلومەرجۍ فرە دژوارەنە ئا وەعدەما دا، ئارۆ جە کەسایەتی گەشمەرڎا خانەسۆرینە واوەیش کەرمێوە.
سەروو ئا بنەمایێچە جە کەسایەتی گەشمەرڎا خانەسۆریمانە گرڎوو گەشمەرڎا کە پەی ژیۋایۍ ئینسانانەی، یەکسانی و ئازاڎینە گیانوو ۋێشا بەخشا، بە رێزۆ یاڎ کەرمێوە و بەژنوو باڵاو ۋێما ۋەروو دەموو یاڎەوەری ئاڎیشانە منامنمێرە. ماچمۍ سەرکۊتەی جە ڕۊشنایی ئا پاکڕەوانە، پۍ ئێمە و گەلەکەیما بۆ".
