ڕێکوزیاو مافو مرۆڤو هەرانای ئەرەیاۋناش دماو هرووژمکەردەی سەرش، هێزەکې ئیتڵاعاتو دۊڵەتو ئێرانی، مەهسا شەفیعی-ە واڵې یۆ جە قوربانییەکا شۆڕشو 'ژەنې، ژیۋای، ئازادی'ش بە بێ ئەمرەو دادوەری جە مەحالەو یاسووجی سەر بە پارێزگاو کۆهگیلویە و بۆیەر ئەحمەدی باڵبەس کەردێنە و فاڕێنەشاوە پەی گێرتەخانەو ناوچەکەی.

باس چانەیچ کریان، مەهسا پېسە بەربڕیەو ناڕەزایی مانگېرتەیش جە واردەی ئەرەیاۋنان، هەرپاسە تۆمەتو ئانەیش دریان پاڵ، كە جە کاتو جەنگو بەینو ئیسرائیل و ئێرانینە هامكاری میدیاكا جبەرو ئێرانیش کەرڎەن.

یاگې ئاماژەیەنە، مەهسا شەفیعی-ەی تەمەن ٢٢ ساڵە بەمەڵامەتوو چالاکییەکاشۊ چن جارې باڵبەسەکریێنە و هەرپاسە ژمارێوە شەکوای یاسایێش سەر تۆماركریێنې، هامكات، واڵەکێش بە نامې پارسا شەفیعی جە وەختو سەرهۊردای شۆڕشو”ژەنی ژیۋای ئازادیی”نە جە یاسووج کوشیا.