پارێزنەر ئەرجان کانار سەبارەت بە پاکێجو دەیەمو دادوەری کە جە لایەنو پەرلەمانیوە پەسینیان، ئەرەیاۋناش کە ئینە کېشەکا زېیاتەرې مکەرۊ و واتش: "مەبەسو ئاکەپەی ئاشتی نییا. بەڵکو پەی ئانەی جە دەسەڵاتەنە مەنۊوە، گەرەکشا بەردەوام بۊ جە ڕامیاریەکاش."
دەهەمین پاکێجو دادوەری کە جە لایەنو ئاک پارتیوە پېسە "چاکسازیی دادپەروەری" پێشکەشکریا، سەرەڕاو دژایەتی جە گلېرۊبیەو گرڎیی پەرلەمانینە پەسینیا.
وردەکارییەکۍ پاکێجو دادوەری و کاریگەرییەکێش
جە کۊو ٣٠ مژارا پاکێجەکەی ٨ مژارێشا لا دریێنۍ. پارێزنەر ئەرجان کانار ئا مژارێشە پەی ئاژانسوو هەواڵوو فوراتی (ANF) هۊرسەنگنۍ و ئەرەیاۋناش، پی پاکێجیە حیچ کەسێوە نمەمەنۆوە کە زینانی نەکریۆ.
کانار ئەرەیاۋناش کە پێناسەکەردەی پاکێجەکەی پېسە "چاکسازی" دروس نییا، جەختیچش چانەی کەرڎۆ کە پاکێجەکە بە پێچەوانۆ سزاکا زیاڎ مەرۆ. چا بارۆ نموونەش وست ڕووە و واتش: "وەڵۍ ئی پڕۆژە یاسێنە ئا کەسۍ کە سزاو کەمتەر جە ٥ساڵا زینانیشا سەرەرە سەپیا بۍ، باڵبەسۍ نەکریێنۍ، بەڵام ئیساتۍ ئانۍ کە تەنانەت ٢ ساڵۍ زینانیچشا سەرەرە سەپیا بۆ پەی ماوەو ٥ڕوا زینانی مکریا."
سەختی و ئاستەنگیەکۍ ۋەردەمو ئازادکەردەی زینانییە نەوەشەکانە
کانار ئاماژەش پانەیچ کەرڎ کە ئا پاکێجە حیچ ئاسانکاریێوە گولانەش پەی زینانیا سیاسی و سزادریایا نەکەردەن، بەپێچەوانۆ ئازادکەردەی زینانیا نەوەشیش ئاستەنگ کەردەن و ئەرەیاۋناش کە پەی ئازادکەردەی زینانیا نەوەشی مشۊم گوزرشتێوە جە ڕێکوزیێوە پزیشکی دادوەرییوە هۊرگیریۆ و ئاماژەش پانەی دا کە ئینە فرە کێشەن.
ئەرجان کەنار یاڎش ئاوردۆ کە ڕێکوزیاو پزیشکی دادوەری ئەرەمەرزیێوەن و بەتەمامی ئینا چېرو هەیمەنەو دەسەڵاتو حکومەتینە، پۊکەی محاڵا گوزارشتێوە ئەرێنیە پەی زینانیا نەوەشی ڕامېیاری بەیان بکەرۆ.
پاكێجەکە خزمەت بە ئاشتی نمەکەرۆ
کانار باسش چانەیچ کەرڎ کە پاکێجو ١٠هەمو دادوەری پاکێجێوە فشارین جە دژو ئۆپۆزسیۆنی و واتش: "بەتایبەت جە کاتێنە پڕۆسێوە سەبارەت بە (چارەسەری) پرسو کوردی ملۊڕاوە، ئی پاکێجە حیچ پەیوەندیێوەش بە چارەسەریۆ نییا. بە پێچەوانۆ پاکێجەکە کێشەو چارەسەری زیاتەر مکەرۆ. پاکێجێوە پا جۆرە نییا کە خزمەت بە ئاشتی بکەرۆ. پۊکەی محاڵا چەمەڕایی هەنگامېوە جددی بەرەو چارەسەری و ئاشتی جە حکوومەتو ئیساتێنە بکریۆ.
پەی نموونەی ئەر ئارۊیچ پەکەکە چەک بنیۆرە، هرووژمەکۍ بەردەوامۍ با. شارو وانینە ماوەو ٦ ساڵان ڕا بە ڕۆنامەنوویسا نمەڎریۆ حیچ قسێوە وەڵا بکەراوە. ژمارەو زینانیا و سزادریایا جە زینانەکانە ٤١٠ هەزار کەسێش ۋېیەرنان. جە کاتێنە کە ئاکەپە ئاما سەرو دەسەڵاتی ژمارەو زینانیەکان تەنیا ٤٩ هەزار کەسۍ بۍ. ١٠هەمین پاکێجو دادوەری کە پەرلەمان پەسینانش، بەتەمامی سزادریایا و زینانیا ئاسایی جە وێش گێرۆ. مەبەس چنەش کەمکەردەیۆ ژمارەو زینانەکان و بە "پاکێجو چاکسازی" نامۍ بریۆ بەڵام پەی هۊرخەڵەتنای خەڵکین. تەنانەت گولانەتەرین گېڵای و داواکاری پەی مافە دیموکراتیکەکا سزا مڎۆ. ئینەیچ پا مەعنێنە کە حەچ کەسێ کە شۊنەو دادپەروەریرە گێڵۆ نمەمەنۊوە کە باڵبەس و زینانی نەکریۆ."
حکومەت جە تاقیکەردەیۆ ڕاستگۆیینە سەرنەکۊت
ئەرجان کانار ئەرەیاۋناش کە ئی پاکێجە نیشانەش دا کە حکومەت جە تاقیکەردەیۆ ڕاستگۆینە بەرنەشیەن و واتش: "ئی پاکێجە بە ئاوەزیەتو زینانی ئامادە کریان. ژمارەو زینانەکا ٣٩٥ زینانێنۍ و جە ئیساتێنە نزیکەو ٧٥ زینانا تازۍ ئینۍ قۆناغو وەشکەردەینە. ئا کەسۍ کە تەنانەت سەرو چالاکیێوە گولانەیچ سزا دریێنۍ، دەسبەسەرۍ مکریا. ئینەیچ نیشاندەرۍ ئانەینۍ کە حکومەت ڕاستگۆ نییا جە چارەسەرکەردەی پرسەکانە.
هەرپاسە نیشاندەرو ئانەینە کە ئاکەپە مەبەسش ئاشتی نییا، بەڵکم پەی ئانەی بەردەوام بۆ جە دەسەڵاتی، گەرەکشا سیاسەتە کلاسیکیەکا فشاری بەردەوامی پنە بڎۆ."
