جە ئەرەیاۋناکەو پەژاکی سەبارەت بە جەنگو ئێرانی و ئیسرائیلی، سەرەڕاو دژایەتی سەپنای جەنگی سەرو گەلو ئێرانیرە، ئامان: "ئانەی ئازادی وزۊنە ئاسۆو ئایندەو گەلو ئێرانیوە، کۊششی دیموکراسییانە و شۆڕشو ناوازەو ژەنی، ژیۋای ئازادییا."
ئەنجوومەنو پارتو ژیۋای ئازادی کوردەسانی (پەژاک) سەبارەت بە جەنگو ئی دماییەو بەینو ئێرانی و ئیسرائیلی ئەرەیاۋنێوە نویسیاش وەڵاکەرڎۆ.
جە ئەرەیاۋناکەینە، پەژاک سەرەڕاو جەختکەردەیۆ سەرو یەکدەنگی هێزە کوردییەکا و بەرشیەی جە دیدگاو دەسەڵاتو پارتی بەرەو گێڵایۆ پەی خەڵکی جە ئانوساتێوە چامنەنە ئەرەیاۋنانش: " ئانەی ئازادی وزۊنە ئاسۆو ئایندەو گەلو ئێرانیوە، کۊششی دیموکراسییانە و شۆڕشو ناوازەو ژەنی، ژیۋای ئازادییا. بێ گومان بە بەئەنجام یاونای شۆڕشو دیموکراسی گەلەکەیما، نیاز بە جە یۆنزیکبیەیۆ و هامکاریی گرڎو هێزە ئازادیوازەکا و دیموکراسیەکا، کۊششکارا گەلا و ژەنا و گرڎو شوناسەکان."
دەقو ئەرەیاۋناکەو پەژاکی ئینەن:
"پەی ڕای گرڎیی
جە هێزیۊن ١٣و حوزەیرانو ٢٠٢٥ ئیسرائیل هرووژمی قورسش پەی سەرو مېیانو ئەتۆمی، سەروازی و فەرماندەییەکا ئێرانی دەسپنەکەردەن، بەتایبەتی پەی سەرو مېیان و کەسایەتییەکا سەر بە سوپاو پاسدارا. هرووژمە پێچەوانەکۍ ئێرانی پەی سەرو ئیسرائیلی جە ئاستێوەنە نیەنۍ بتاوۆ دەورو ۋەربەسی بوینۆ جە ۋەرا ۋەرو گورزە کوشندەکا ئیسرائیلینە. ئی جەنگە دما گورزەو سیستەمو دەسەڵاتی جەهانییا دژو دەسەڵاتو ئێرانی و بەردەوام بۆ تا ئا کاتەی بەتەمامی مەترسی و کاریگەرییە ئەگەرییەکۍ ڕژێمەکەی دمایشا پنەمۍ. بێ گومان ئینە پرۆسێوە کوڵ مەودا نییا و بەشێوە سەرەکییا جە جابەجێکەردەی پرۆژەو ۋەرکۊتوو مېیامینی تازەی، کە دەرەنجامو سیاسەتەکا قەنارەی، سەرکوتکەردەی، جیاکاری، گەندەڵی و ڕوتنایۆ، بێهیوایی و قینە و گلېرگە و خەڵکو ئێرانین پەی ئا سیستمەیە کە ئاڎێش ناچار بە دژایەتیکەردەیۍ تەمام ڕادیکاڵی و ڕەڎکەردەیۆ ڕژێمەکەی کەردەن.
بەربڕیەی وەشحاڵی گەلو ئێرانی پەی لاوازبیەی ئا جۆرە دەسەڵاتەیە پا مەعنۍ نییا کە گلېرگەو ئێرانی گرڎو هیواکاشا سەرو ئەنجامو جەنگێوە پا جۊریە هۊرچنیەن. ئی جەنگە جەنگو دەسەڵاتی و ملەملانێ بەرژەوەندییەکا بەینو هێزەکان نەک جەنگو ڕزگاریوازی پەی گلېرگەی و گەلا. ئی جەنگە جەنگو دەسەڵاتی و ملەملانێ بەرژەوەندییە ناکۆکەکا هێزەکان نەک جەنگو ئازادی گلېرگەی و نەتەوەکا. ئی جەنگە جە ئەنجامو سیاسەتو جەنگەرانی و فراوانوازانەو کۆمارو ئیسلامی سەرشهۊردا، بەبێ گۆشدای بە ئێشو ئەزیەتەکا گەلو ئێرانی. باجو جەنگەرانی فەرمانڕەواکا کۆمارو ئیسلامی ئینا ئەستۆو ئا کەسانە کە جە قەیرانی کۆمەڵایەتی و ئابووریینە پۊوە بیێنۍ ژمارەی فرەو قوربانیا مەدەنی بەتایبەتی ژەنی و زاوڵا جە ئێران و ئیسرائیلەنە چا هرووژمانە ئا حەقەتینەیە بەروزۆ کە ژیۋای خەڵکی جە ڕوانگەو حکومەتیوە بایەخش پنەنمەڎریۆ. گەلا و گلېرگەکۍ ئێرانی ناچارۍ نیەنۍ جە ما بەینو دوۍ هۊرچنیا جەنگی و قبوڵکەردەی دەسەڵاتو دیکتاتۆری.
پارتو ژیۋای ئازادی کوردەسانی سەرەڕاو دژایەتی سەپنای جەنگی سەرو گەلو ئێرانیرە، جەخت سەرو کۊششی دیموکراتیکی ئا گەلا مکەرۊوە. ئانەی ئازادی وزۊنە ئاسۆو ئایندەو گەلو ئێرانیوە، کۊششی دیموکراسییانە و شۆڕشو ناوازەو ژەنی، ژیۋای ئازادییا. بێگومان پەی بەدیئاوردەی شۆڕشو دیموکراسی گەلەکەیما یۊگێرتەی و هامکاری گرڎو تاکەکا ئازادیوازی و هێزە دێموکراتییەکا و کۊششکارا گەلا و ژەنا و شناسنامەکۍ پەنەوازێنۍ. فرە گرنگا هامکاری حزبە کوردییەکا و فاڕایۆ جە چەمکو حوکمڕانی حیزبییوە پەی ڕاوەبەردەی جەماوەرو کوردەسانی، بەئەرکێوە تاریخی مزانمۍ چی قۆناغە هەستیار و یەکلاکەرەوێنە، ئێمە داواو هامکاری گرڎو هێز و پارت و ڕێکوزیا مەدەنییەکا مکەرمۍ بە سەرکردایەتی ژەنا ئێرانی پەی دەسپنەکەردەی قۆناغێوە تازۍ شۆڕشو "ژەنی، ژیۋای، ئازادی" و چی روانگەیچۆ ئامادەیی ۋێما پەی ئی دەسپنەکەردەیۍ ئەرەیاۋنمۍ.
ئێمە پەیلوایما چامنەن فاڕایۆ پەی کۆمارو دیموکراتی ئێرانی جە ئەنجامو فاڕای سەرنجی و دوورکۊتەیۆ جە دەسەڵاتوازی و ناسیۆنالیزمی و پیاسالاریی و مېیانی گونجیۆنە و تەنیا هۊرچنیێەوەن پەی ئایندێوە سەقامگیر ی و دیموکراسی پەی وڵاتو ئێرانی. هەرپاسە ئەرەیاۋنمێش کە وەرگیریکەردەی جە گەلەکەیما و گەلا تەرو ئێرانی جە ۋەرا ۋەرو هەر جۆرە سەرکوتکەردەی و هەڕەشۍ کۆمکوژینە بە ئەرکو ۋێما مزانمۍ و جە چوارچێوەو ۋەرگیری ڕەواینە ۋەرگیری جە ماف و بیەو ۋێما مەکەرمې.
داوا جە گرڎو گەلا ئێرانی و بەتایبەتی گەلو کوردەسانی مەکەرمۍ کە ۋێشا جە شێوەی ڕێکوزیای جەماوەری دیموکراتیکینە ڕێکوزا و کاریگەرییە کاولکەرەکا جەنگی سەرو یۆترینی کەم بکەراوە و هامپەشتی تەمامشا بۆ. پێکئاوردەی گروپو پەشتیوانی پەی قوربانیا جەنگی، کۆمیتەو دلېینەی پەی یاردیدای زەرەرمەندا، کۆمیتەو هامکاری دارایی و هەرپاسە بە ئەرەمەرزنای ئیدارەو دلېینەی و دووروستەیۆ بەکرێگرتا دۊڵەتی جە کاریگەریش سەرو مەردمی متاوۆ هەنگامېوە گرنگە بۆ پەی بنیاڎنیای گلېرگێوە ۋێڕاوەبەردەی و دیموکراسی. چی ڕووەیچۆ داوا جە تەمامو وڵاتپارێزنا، ئازادیوازا و ئەنداماو پارتەکەیما مەکەرمۍ هامکاری بکەرا."
