جە پەیامێوەنە ئەسعەد ئەعزەمی چالاکی سیاسی کورڎیی ئەرەنیشتەو وڵاتوو هۆڵەندای بە ئاماژەدای بەپیلانگێڵیی میان نەتەوەیی دژوو رابەروو گەلوو کورڎی عەبدوڵا ئۆجالانی و گۆشەگیری رەهای کە ماوەو  نزیک بە ٢٥ ساڵان سەرشەرە سەپیان ۋاتش: " ئی ڕەفتارەو دەوڵەتوو تورکی دژوو مافوو مرۆڤی و تەنانەڎ دژوو قانون و مافوو زینڎانیەکان جە دلېینەو تورکیایچەنە".

داوایچش کەرڎ: "ئێمەی کورڎ مشۊم خۊتانکەرڎەی جە زینڎانیا سیاسی ۋېما کەرمۍ کە ئینۍ زینڎانیەکا حکومەتە دیکتاتۆڕ و فاشیستەکا تورکی و ئێرانینە. ئا حکومەتە و ڕەفتارەکېشا جە دژوو ڕۆڵە شۆڕشگێڵەکا گەلەکەیما ڕسواکەرمۍ و بە گرڎوو هێزیماوە مەحکومشا کەرمۍ".

دەقوو پەیامەکەی

من ئەسعەد ئەعزەمی، خەڵکوو سەقزی، ئەرەنیشتەو وڵاتوو هۆڵەندای، پی بۊنۊ دەنگوو ۋېم وزوو پاڵ و دەنگوو گرڎ ئینسانۍ ئازادیوازی جە دژوو حکومەتی فاشیستی جە تورکیا و داواو ئازاڎیی  ڕێزدار ئۆجالانی، ڕابەروو جمایۊ ئازاڎیوازی گەلەکەیما جە سەرنیشتوو کوردسانی کەروو. ڕێزدار ئۆجەلان جە ١٥و شوباتوو ساڵەو ١٩٩٩ (ۋەران ۋەر بە ٢٦و ڕێبەندانوو ساڵەو ١٣٧٧)ی بە پیلانێوە هامبەشەو وەڵتەری جە لایەن و دەزگا سیخوڕییەکا سی ئای ئەی، موسادی و میتیوە بە هامکاری بڕۍ جە وڵاتا ئەوروپای بە تایبەت یۊنان ئا پیلانېشا جابەجېکەرڎە. باڵیۆزخانەو یۊنانی جە کینیا بە بەهانۍ ئانەیۊ کە ئەوروپا ڕېوەش پۍ پارېزنای ئەمنی ئا بەڕێزەیۊ ئېستەنۊ ئۆجەلانی ڕایی کەرا پۍ فرۆکەخانەو نایڕۆبی بەڵام جە ڕانە چەتەکۍ سەر بە ڕێکوزیا سیخوڕییەکا ئۆجالانی بڕفانا و ڕادەسوو ڕێکوزیاو جاسووسی میتیش کەرا. چا ڕوۊ بەڕیز ئۆجالان گنۊ ۋەر و گەورەتەرین ئەشکەنجەکا جەستەیی و  دەرونی و جە داڎگای سەروازینە کە مافوو ئانەیش نەبیەن دۆسیەکەو ۋېش بۋینۊ، مافوو ئانەیش نەبیەن جە پارێزنەرێوە سەربەخۆی ئیسفاڎە کەرۊ، داڎگایی کریۊ. بەڕێزشا جە داڎگاو بێداڎگای سەروازییەوە، سەرەتا بە جە قەنارەدای و دماتەر سزاو زینڎانی هەتاهەتایی سەرشەرە سەپیۊ. ئیسە پۍ ماوەو ٢٤ ساڵان جە زینڎانی تاکەکەسینە جە دوڕگەو ئیمڕالی بەڕێزشا جە ساڵی ۋیەرڎۊ گرڎ جۊرە پەیوەنڎیېوەش چنی بەری چنە قەڎەغە کریان تەنانەت ئەنداما خانەواڎەکەیچش نەتاوانشا چەمشا پنەش گنۊ. ئی ڕەفتارەو دەوڵەتوو تورکی دژوو مافو مرۆڤی و تەنانەت دژوو قانونوو مافوو زینڎانیەکان جە دلېینەو تورکیەیچەنە. حەر ساڵەو ٢٠٠٥ ی داڎگاو مافوو مرۆڤی جە ئەوروپا و حەرپاسە دەوڵەتا ئەوروپایی ئا داڎگایی کەرڎەیە و پڕۆسەو داڎگاییکەرڎەکەیشا دژوو مافوو مرۆڤی ئەرەیاۋنا و داواشا کەرڎ جە حکومەتوو تورکی پەنەوازەن لوایۊپۊرەکەرۊ سەروو ئا داڎگاییکەرڎەینە و مافوو مرۆڤی ۋەرچەم گېرۊ. حەرپاسە وڵاتا ئەوروپایی و ڕوسیایچ رەخنەشا چا پڕۆسەو داڎگاییکەرڎەیە گرت و داواو لوایۊپۊرەیشا کەرڎ بە پڕۆسەکەیرە. بەڵام حکومەتوو تورکی ئا داوېشە پېسە دەسوەردای جە کایەو دلېینەی جە قەڵەم دا و حیچ گرنگیېش بە ۋیر و ڕای میان نەتەوەیی نەڎا. لېشاوۍ گەورەو گەلوو کورڎیما سەبارەڎ پا ستەم و بێدادیە زەرورا و پەنەوازەن. ئێمەی کورد مشۊم خۊتانکەرڎەی جە زینڎانیا سیاسی ۋېما کەرمۍ کە ئینۍ زینڎان و حکومەتە دیکتاتۆڕ و فاشیستەکا تورکی و ئێرانینە. ئا حکومەتە و ڕەفتارەکاشا جە دژوو ڕۆڵە شۆڕشگێڵەکا گەلەکەیما ڕسوا کەرمۍ و بە گرڎوو هێزیماوە مەحکومشا کەرمۍ. ڕابەڕی شۆڕشگێڵ، فەیلەسووف و نوویسەروو گەلوو کورڎیما جە سەرنیشتوو کوردسانی؛ زینڎانی تاکە کەسی نەتاوانش گەلوو کورڎیما جە مۊچیاریەکاش بێبەش کەرۊ. تیۆروو گلېرگەی ئازاڎی و دێموکڕاتیکی گەلا پېسە ڕا چارېوە ئەرێنی پۍ دەرباس بیەی گەلوو کورڎی و گرڎوو گەلا ۋەرکەوتوو میامینی چا کۆسپەو نێئۆلیبڕالیزموو سەردەمی تووشوو ئی خەڵکەیشە کەرڎەن، پېسە ڕا چارېوە عەینی جە لایەن و هۆگرا داڎپەروەری کۆمەڵایەتییوە و پېوەرە ژیۋای ئاشتیانەو گەلا پېسە ئاڵتێرناتیڤېوە بە جدی کۊتەن ۋەروو سەرنجوو گرڎوو ئازاڎیوازا. گلېرگەی داڎپەەروەر، پلۆڕالیسمی سیاسی، پېوەرە ژیۋای ئاشتیانەو گەلا یەرۍ کۆڵەکۍ ئا ئاڵتێڕناتیڤەینۍ. تیۆروو ژنۆلۆژی کە پیاسالاری وزۊ ۋەروو ڕەخنېوە تاریخی بە دروشمەو "ژەنۍ، ژیای، ئازاڎیی" تاوانش نەک حەر وڵاتا ئێرانی و تورکیای لەرنۊوە بەڵکم سەرنجوو گرڎوو ئازادیوازا جەهانیش پۍ لاو ۋېش کېشتەن. پۊکەی ئێمەی کورڎ مشۊم سەبارەڎ پا زوڵم و زۆرەی کە جە زینڎانیا سیاسی ئێمە کریۊ بە تنی دەنگ هوربڕمۍ و پۍ ئازاڎیی ڕێزدار ئۆجالانی و حەرپاسە هەزاران زینڎانیۍ سیاسی کورڎی جە تورکیا و ئێران کە تاوانەشا نییەنە بېجگە چانەی کە داواو مافوو مرۆڤی کە ئا وڵاتۍ پۍ ۋېشا جاڕنامەو مافوو مرۆڤیشا ئیمزاکەرڎەن کەرا و حەرپاسە ئا وڵاتۍ بێشەرمانە ئا جاڕنامەی کە ۋېشا ئیمزاشا کەرڎەن پاشېلېش کەرا".