زینڎانیێوە کە ۋەروو سڵامەتی و باری ئەمنی ۋێش مەتاومۍ نامێش ئاشکرا کەرمۍ، جە ڕاو پێخامێوە هەلومەرجوو دلۍ زینڎانەکا پەدەکەیش گێڵناوە. ئا زینڎانییە ٢ ساڵۍ و ٥ مانگۍ جە زینڎانێوە پەدەکەینە زینڎانی کریان. بە پاو زانیارییەکا ئا زینڎانییە، دلۍ هەلومەرجێوە فرە قورسینە زینڎانی کریان و حیچ دەرفەتێوە چارەسەری پزیشکیشا  پۍ مەیسەر نەکریان. حەرپاسە زینڎانیەکۍ وزیا ۋەروودەم و کاربەدەسا کونسولخانەو تورکی و بە هەڕەشۍ رادەسکەردەیۆ بە تورکیای فشارشا وزیۆ سەر.

ئا زینڎانیە کە بە جۆرێوە جە جۆرەکا تاواش پێخامەکەو ۋێش بیاونۆ بە بەروو زینڎانی، بە گرڎیی جە بارەو ئاژەو ١٠ کەسا زینڎانیکریای زانیاریش ئەرەیاۋنا. بە پاو زانیارییەکا دلۍ پێخامەکەی، ٨ کەسۍ دهۆکەنە ئینۍ دلۍ ئاژێوە یەکجار دژوارینە. بە قسۍ ئاڎیی، "ئینۍ چێروو مامەڵە و هەلومەرجێوە پا جۆرەینە کە چێوی چانە ۋەران ۋەر بە ئاژەڵایچ مەکریۆ".

یۆ چا زینڎانیا وەختۍ کە ئەوەڵجار زینڎانی کریابۍ، سەرەڕاو ئانەی کە بە شش مانگۍ زینڎانی سزادریابۍ و سزاکێش ویەرنۍ بۍ، بەڵام دماتەر بە مەڵامەتوو دۆسیێوە تەریۆ سزاو ٨ مانگا تەریش سەرەرە سەپیابۍ و زینڎانەنە ئاستەنشاوە.

زینڎانیێوەتەر ٥ ساڵێن جە زینڎانەنە زینڎانین، ئینا ژوورێوە تاکەکەسی دووەمەترینە، ڕۆنە و هامنێنە فرە گەرما، زمسانیچەنە تەمام سەردا.

جە بارەو ئا زینڎانیەیۆ، کە حیچ دەرفەتێوە چارەسەرکەردەی پزیشکی و پەیوەندیکەردەیش پنەمەڎریۆ، چەمکوو "بە تەمامی چەمەڕاو گەشمەرڎە بیەو ئاڎینۍ" بەکارمارا.  

حەرپاسە ئەرەیاۋییا کە ئاژەو تەندروسی ئا زینڎانیە و کەسێوە تەریچ یەکجار خراپا.

بەپاو زانیارییەکا دلۍ پێخامەکەی، جە ماوەکا ویەردەینە بڕۍ زینڎانیۍ ڕووانەو ئا یاگۍ کریۍ کە ئەنڎاما داعشی چنەشەنە زینڎانیێنۍ.

تاوانە و جەنگی دەرونی کە دلۍ ئاسایش و زینڎانە پەنهانەکانە بەکارمۍ، کۆپی و هامشێوەو کۆمارو تورکیاو ساڵەکا ٨٠ و ٩٠کان. دوور جە چەمەڕایی نیا، کە ئینسان نەیاوۆنە و تەجرووبەو ئانەی نەکەرۆ کە شێواز و تاکتیکەکێشا یەک چێوەنۍ".

جە پێخامەکەنە جە بارەو سەرداو کاربەدەسا کونسولخانەو تورکیای جە هۊلێر پۍ زینڎانەکایچ زانیاری وزیان ڕووە.

زینڎانییەکە باسش چانەیچ کەردەن، بە تایبەتی دماو سەردای هاکان فیدانی وەزیروو جبەروو دەوڵەتوو تورکی پۍ هۊلێری، ڕا دریان کە کاربەدەسا کونسوڵخانەو تورکی چنی ئاڎیشا دیڎار ئەنجام بڎا و زینڎانیەکۍ جە دیڎارەکەنە داواو ئاڎیشاشا رەڎکەردەنۆ.