دماو 'بانگەوازو ئاشتی و گلێرگە دیموکراتیک'ی ٢٧و شوبات و ڕابەر ئاپۆی و بەستە و کۆنگرەو ١٢ـەمینو پەکەکەی، کە دلێشنە چنین قەرارێ گرنگێ و تاریخییە دریێنێ، پرۆسەی چارەسەری ئینا ڕاوە بڕی هەنگامێ پراکتیکێ، ئینەیچ سەر و ئاستو دلینەی و چبەریچ کاروەدای و پێشوازی ئەرێنیش ونە کریا.

ئەندامو وەڵینو سی پی تی جیان-پیرەر ڕیستیلینی کە وەڵتەر یەرێ جارێ سەردانو ئیمراڵیش کەردەن و جە ئیمراڵی چەمش بە ڕابەر ئاپۆی کەوتەن، باسش چانەیە کەرد گەلوو کوردی ڕابەر ئاپۆش پێسە و ڕابەر و وێش نیانەرە و واتش: "مشۆم عەبدوڵا ئۆجالان ئازد بۆنە."

ڕیستیلینی کە زیاڏ جە یەرێ ساڵا ئەندامو سی پی تی بییەن، هامکاتەنە ماوێوە سەرۆکایەتی کۆمسیۆنو نەتەوەیی ڕاگیری جە ئەشکەنجەو سویسرایچ بییەن. جیان-پیرەر ڕیستیلینی قەرارەکا کۆنگرەو ١٢ـەمینو پەکەکەی پەی چارەسەرو دیموکراتیکانەو پەرسە و کوردی پێسەو خوڵقێوە ئازایانە و ئاشتیانە هورسەنگیا کە پێشکەشو دۆلەتو تورکی کریابی و باسش چانەیە کەرد پەی سەرکەوتە و پرۆسەکەی مشۆم ڕابەر ئاپۆ ئازاد بۆنە. ڕیستیلینی دەسنیشانش کەرد مشۆم دۆڵەتو تورکیچ هەنگامە کۆنکرێتی گێرۆنە وەر و واتش: "هیواڏارەنا دۆڵەتو تورکی پەیوەس پی دۆخەیە هەنگامەیە ئەنجامگیرە و کۆنکرێتی بنیۆنە."

'مشۆم عەبدوڵا ئۆجالان ئازاد بۆنە'

ڕیستیلینی ئاماژەش پانەیەدا گرڏ ئا هەنگامێ کە ڕابەر ئاپۆ منیۆشا ئەرێنییێنێ و واتش هیواڏارەنا وەرپرسێ تورکیچ لاو وێشاوە ئانەی پەنەواز کەرانەش و ئینەش وات: "بەڕاسی مشۆم عەبدوڵا ئۆجالان ئازاد بۆنە. هەرپاسە سەر و ئاستو یاسایی و دەسووری مشۆم تورکیا فاڕییای بکەرۆ. چونکە بڕێ بابەتێ هەنێ پەنەوازا بە هەموارو یاسایی چارەسەر کریانە."

'عەبدوڵا ئۆجالان ڕابەر و گەلوو کوردیا'

ڕیستیلینی سەرنجش وست سەرو بانگەوازییە تاریخییەکە و ڕابەر ئاپۆی و پاسە هورش سەنگنا: "ئۆجالان بانگەوازێوە تاریخیش کەرد، ئینە هەنگامێوە گرنگەنە و ئینا بەرژەوەندی تورکیاشەنە. ئانە پەنەوازا حکومەتو تورکیای بکەرۆش ئازادی عەبدوڵا ئۆجالانین. دۆخەکە و پەنەوازییەکێ فرە ڕۆشنێنێ. عەبدوڵا ئۆجالان ڕابەر و گەلوو کوردین. ئازادی ئاڏی خزمەتو چارەسەرو پەرسەکا مکەرۆ. ئاشناو کوردانا و بەڕاسی کوردێ عەبدوڵا ئۆجالانی پێسەو و ڕابەر و وێشا وینا."

'مشۆم پەکەکەچ جە لیستو تیرۆرینە بەر کریۆنە'

ڕێستیلینی دەستنیشانش کەرد جە چارەسەرو دیموکراتیکانەینە پەرسە و کوردی گلێرگە مییاننەتەوەییەکش تاوانە دەورو وێشا گێڵنا و ئاڏێ بەردەوامێ بێنێ جە قسەکاشا: "کێشەکە ئانەن جە ئیسەنە ڕۆژەڤەکێ جەهانی گەرم و گوڕێنێ، ڕەنگە بابەتی جیاواز بۆنە کە ئانێ وەڵێ گرڏ و بابەتەکاوە باوە. پی جۆرە ویر مکەروە. هەڵبەتە ئینەیچ هەن؛ پێسە گرڏما مزانمێ پەکەکە پێسەو ڕێکخراوێوە 'تیرۆریستی' ئەرەیاویان کە ئینانی جا بڕوێنە قەرارێ فرە نا عەقڵانییا. پەکەکە بە ئاشکرا دەستبەردارو ئەوەکۆشای چەکداریش بییەن، پۆکەی مشۆم دەموودەس جە لیستی تیرۆرەنە بەر کریۆنە."

'گەرەکما عەبدوڵا ئۆجالانی وینو'

جیان-پیرەر ڕیستیلینی کە پێسەو شاندو کۆمیتەو ڕاگیری کەردەی جە ئەشکەنجەو ئەرووپای (سی پی تی) وەڵتەر یەرێ جارێ جە ئیمراڵیینە چەمش بە ڕابەر ئاپۆی کەوتەن، باسش چانەیە کەرد گەرەکشا جە بارودۆخێوە ئازادەنە ڕابەر ئاپۆی وینۆنە و واتش: "گەرەکما هەستەکام چنی عەبدوڵا ئۆجالانی هامبەش بکەرو. هەرجارێوە دیداریم کەردەبۆ ئاڏم پێسەو ئینسانێ بێ وێنە وینان."