هامسەرۊکو کۊنگرەو گلېرگەی دیموکراتیک (کەجەدە)ی و پەرلەمانتارو پارتو چەپی سەوزی بەردان ئۆزتورک قسېش پۍ ئاژانسو هەواڵی فورات (ANF)ی کەرڎۍ و ئەنجامەکۍ هۊرچنەیش هۊرسەنگنۍ.

ئۆزتورک سەرنجش وست سەرو نەریتو مدرامانی کە چنڎین ساڵېن کورڎسانەنە وەردەواما و ئانەش وست ڕووە کە هۊرچنیەی بەشێوەن چا نەریتەو کۊشیای. ئۆزتورک سەبارەڎ بە کەمبیەیۊ دەنگەکا ۋاتش، "ئینە بەرش وزۊ کە جە هۊرچنیەینە کە کۊڵەکېوە کۊشیای ئێمەن نەیاۋېنمۍ ئامانجەکەما. کۊشیای پۍ ئازاڎیی و دیموکراسی چنڎین ساڵېن بە پا گیریۊ وەردەواما. ویستو گەلەکەیما جە ئاکامو ئا کۊشیاینە کاریگەریش کەرڎ سەرو پەرلەمانی. جە وەختو کاندیدە سەربەخۆکانە، جە سەرکۊتەی جە هۊرچنیەکا حوزەیرانو ٢٠١٥ینە چی وەختەنە ئانەی سەرەکین ئی نەریتەن جە کۊشیای. هۊرچنیەیچ پارچېوە گرنگو ئی نەریتەینە. حەرپۊکەی کەمبیەیۊ دەنگەکاما نیشانەما مڎۊ کە جە هۊرچنیەینە کە کۊڵەکېوەنە جە کۊڵەکەکا کۊشیای ئامانجەکېما نەپېکېنۍ".

هیواما گۊرەتەر مکەرمۍ

ئۆزتورک ئانەش وست ڕوۋە کە نەتاۋانشا بەشێۋېوە عال پارتو چەپی سەوزی بە گەلی بشناسا پۊکەی ژمارېوە فرە جە دەنگەکاشا پوچۍ بیېنێوە، حەرپاسە پێکئاماکۍ هامپەیمانی بە پاو رۊحو هامپەمانی نەجوڵیېۋە. ئۆزتورک ۋاتش، "جە وەران ۋەر بە هەڕەشەکا دەسەڵاڎداری ئاکەپە-مەهەپەی جە بارەو وستەیرەی هەدەپەیۊ، ئێمە جە ڕاو پارتو چەپی سەوزیوە لوایمۍ دلۍ هۊرچنیەیۊ. کەموکوڕیما بۍ چانەی کە جە ماوۍ کەمەنە نەتاۋاما پارتەکەیما بە گەلی بشناسمۍ، ئانەیچ بی بە مەڵامەتو ئانەی فرەو دەنگەکاما بە زایە بلا. فرەو مەنتیقەکانە دەنگۍ دزیۍ، پاشێلکاریۍ کریۍ. فرەو مەنتیقەکانە دەنگەکۍ ئێمە پۍ مەهەپەی و هوداپاری نۋیسیۍ. حەرپاسە قسۍ بڕۍ جە پێکئاماکا هامپەیمانی کە چنی ڕۊحو هامپەیمانیەکەی یۊ نەگېرېوە، کاریگەریش کەرڎ سەرو کەمبیەیۊ دەنگەکاما. سەرەڕاو سیاسەتو فشاری و تنوتیژی کە چنڎین ساڵېن سەرەمڕەو بۍ مرڎای وەردەواما، ئیراڎېوە پا جۊرە هەن کە بە شېۋېوە ئاشکرا وزیا وەرو چەما کە بە پاگیریۊ درێژە بە کۊشیای دریۊ. بە تایبەتی جە هۊرچنیەو سەرۆکایەتی کۆمارینە، گەلوو کورڎی نیشانەشدا کە کورڎسانەنە ڕا بە ئەردۆغانی و ئا مەغزیە مەڎریۊ کە نوێنەرایەتی ئاڎی کەرۊ. ئا ئیراڎە وەرم جە چەما رژێمی فاشیستینە زڕنۊ. زوو یا دېر سەرکۊتەی بەدەس مارۊ".

ئۆزتورک ئاماژەش پانەی کەرڎ کە ورەی بەرز و دەوری یەکلاکەرەوەو گەلوو کورڎی هەم ئۆپۆزسیۆن و هەمیچ دەسەڵاتش تەرسنان، وەرو ئانەی پڕوپاگەنڎەکۍ هۊرچنیەیشا سەرو بنەماو دوژمنایەتی چنی گەلوو کورڎی ڕاوەبەرکەرڎ و جە درېژەنە ۋاتش، "یۊ جە مەڵامەتەکا هجومی پۍ سەرو سیاسەڎمەدارا، رۊنامەوانا، یاساشناسا و چالاکا مافەکا مرۊڤی ئا نیگەرانیەشا بۍ. حەرپۊکەی بانگەشەو هۊرچنیەو ۋېشا بە تەمامی سەرو دوژمنایەتی گەلوو کورڎی ڕاوەبەرکەرڎ. جە ڕاو وستەیرەی هەدەپەیۊ گەرەکشابۍ ورەو گەلەکەیما دلېنەبەرا. وەران ۋەر پینەی ڕاوشۊنما گرتەنە وەر، گەلەکەما بۍ یاگەگیر و ئەڵترناتیڤ نەکەرڎ و جە ڕاو پارتو چەپی سەوزیوە بەشڎاریما جە هۊرچنیەینە کەرڎ.

ئا ئاژە پۍ ئێمە تازە نییا، چا مەجالەنە ئەزمونما هەن، بەڵام کەموکوریما بۍ کە جە ماوۍ کەمەنە نەتاۋاما بەشێۋېوە عال پارتو چەپی سەوزی بە گەلی بشناسمۍ. ئەنجامو ئانەیما جە دەنگداینە ۋینا. جیا چانەیچ دەسەڵاڎداری ئاکەپە-مەهەپەی گرڎو توانا و دەرفەتەکۍ دەوڵەتیشا بەکارئارڎۍ. پی جۊرە هۊرچنیەیشا ڕاوەبەرکەرڎ و وەزارەتو داڎیچشا پۍ ڕاگری جە هەرمانەکاما ئەرکدار کەرڎ. وەختو کەرڎەیۊ نۋیسینگەکانە گەمارۊ دریېنمۍ و خەڵکەکەیچما کە ئېنۍ پۍ گلېرۊبیەکا بە وشکنای وردەرە ۋیەرېنۍ. ئاژېوە پا جۊرەبۍ کە ئەجۍ هۊرچنیەی بەینو ئېمەو دەوڵەتینە ئەنجام دریۊ. ئا ئەنجامەی کە ئېمە چا هەلومەرجە نا یەکسانەنە بەدەسما ئارڎ، دوور جە ئامانج و چەمەڕوانیچما بۊ، هیواو ملۋېنا ئینسانا پۍ ژیایۍ ئازاڎی و یەکسانی بە زینڎەیی ڕاگېرۊ. ئانە پۍ ئێمە گرنگتەرین سەرچەمەو ورە و ئیراڎەین. جە هامڕایمانە ئا هیوایە گۊرەتەر کەرمۍ.

ئۆزتورک ئەرەیاۋناش کە رژێمو تاکە کەسی حۊلشدا جە ڕاو دوژمنایەتی کورڎاوە فاشیزمی کەرۊنە هەمیشەیی و ئەرەیاۋناش کە پێکئاماو پەرلەمانی بەرش وزۊ کە مەغزو نکوڵی و ئەسڕیەیۊ سەڎ ساڵەی جە لایەنو ئاکەپە-مەهەپەیوە نوێنەرایەتی کریۊ، کۊشیایچ دژ پانەی وەردەوام بۊ".

هـ . ش