جە هەلومەرجێوەنە کە گەلوو پانیشتوو کورڎەسانی ئینا قەیرانەو ئابووری و کۆمەڵایەتینە و جە لایەنو دۆڵەتو ئەرەگیرو تورکیوە بیەن مەرام، بنەیانەو بارزانی بە مەیلو ۋێشا بە ملیۆنان دۆلارۍ زانشتگۍ پەی زاوڵاکاشا وەشۍ مکەرا و ڕاوەبەریشا ،مکەرا.
بنەیانەو بارزانی و پەدەکە، ئا دەسکۆتۍ کە جە ئەنجامو شۆڕشی و ئەرەکۊشای دەیان ساڵەو گەلوو پانیشتوو کورڎەسانینە بەدەس ئامێنۍ، سەرەنجام بۆنەو دەسەڵاتی و بەرژەوەندییەکاشاوە پێشکەش بە هرووژم و ئەرەگیریەکا سوپاو ئەرەگیرو تورکیش مکەرا و بیێنۍ بە مەڵامەتوو ئانەی سوپاو تورکی و چەتەکێش جە بادینانەنە بنە وزا، جە لێوەتەرۆ بارزانی و پەدەکە دەسشا سەرو مافەکا گلېرگەی و گەلوو هۆلێرینە گېرتەن و دەرفەت و دەسکۊتەکا تایبە پەی بنەیانەکەیشا بەکار بەرا.
هەڵای حکومەتو هەرێمو کورڎەسانی مەعاشو مانگەکا تەمموز و ئابیش نەڎان. هەرپاسە ڕۆشن نیا کە ئایا مەعاش و مانگەو ئەیلولیچ مڎریۆ یان نا.
جە بوارو ئاو و کارەبێنە جە هەرێمو دەسەلاتداری حکومەتینە گرفتی جددیی هەن. کارەبای نیشتمانیە ٨ پەی ١٢سەعاتا جە شەو ڕوێنە مڎریۆ بە خەڵکی، ئاویچ فرەو گەڕەکەکانە دەسە نمەگنۆ، جە بڕۍ گەرەکانە چن ڕوۍ جارۍ و دوۍ سەعاتۍ هەنە. حکومەتەکەو مەسرور بارزانی بە مەڵامەتوو سیاسەتەکاشۆ جە لایەنو حکومەتو بەغڎایۆ بە حکومەتێوە ناکارامە مشناسیۆ.
جە هەلومەرجێوە چامنەنە، کە گەلوو پانیشتوو کورڎەسانی ڕووبەڕوو گرفتی ئابووری و کۆمەڵایەتیی جددی بیێنێوە، ئەنداماو بنەیانەو بارزانی بە پڕۆژە ملیۆنان دۆلارییەکاشاوە بیێنۍ بە ڕۆژەڤو گەلوو پانیشتی.
زانشتگەی ئینگلیزی مېیان دۆڵەتی
مەسرور بارزانی، سەردارو حکومەتو هەرێمو کورڎەسانی، ڕۊو شەممەی جە شلۆقیێوە گۆرەنە زانشتگەی مېیاندەوڵەتی ئینگلیزیش جە شارو هەولێرینە کەرڎۆ. زانشتگەکە ١٠٠ملیۆن دۆلارۍ خەرجش بیەن. زانشتگەو کوڕەکەو مەسرور بارزانی، ئارین بارزانییا. ئارین بارزانی هەڵای تەمەنش ٢٠ساڵێن. ئارین بارزانی مانگەی ۋییەرڎۍ جە ئەکادیمیای سەروازی ڕۆیاڵینە جە بەریتانیا بەنامۍ ناجیح بی، هەرپاسە مەعاشۍ خیاڵیش جە حکومەتو هەرێمو کورڎەسانینە پەی بڕیانۆ.
زانشتگەو کورڎەسانی -هەولێر
زانشتگەو کورڎەسانی جە هەولێر بە سەرداری کوڕو نێچیرڤان بارزانی، میر ئیدریس نێچیرڤان بارزانی ملۆڕاوە. بەپاو یاسای مشۆم کەسێوە لاوکەمیۆ ١٠ساڵۍ جە ئاکادیمیێوەنە هەرمانەش کەردێبۆ هەتا بتاوۆ بۆ بە سەردارو زانشتگێوە، بەڵام ئیدریس بارزانی بەبێ ئانەی هیچ شارەزایی و ئەزموونێوەش بۆ کە هەڵای تەمەنش ٢٠ساڵێن، بی بە سەردارو زانشتگەی. هەرپاسە ئیدریس بارزانی زانشتگێوە بە مەیلو ۋێش جە عێراقەنە ڕاوەبەر مکەرۆ کە سەڎان خۆنکارۍ و دەیان ئاکادیمیێش ئینۍ چنە.
ئیدریس بارزانی کە پېسە ۋەرپەرسو ئا زانشتگەیە جە لایەنو حکومەتو هەرێمو کورڎەسانیوە پەشتیوانی و هامکاری مکریۆ و زەڕش پەی خەرج مکریۆ، هامکات پېسە فەرمانبەرێوە حکومەتیچ جە لایەنو بەغڎایۆ مەعاش هۊرمگێرۆ.
