میدیاکۍ ئێرانی وەڵاشا کەردۆ، هیزی وێرەگا کیانوش سەنجەری ڕۆنامەنوویس و پەیامنێرو دەنگو ئەمریکاو ئێرانی دمایش بە ژیواو وێش ئارد.

ئاماژە بانەیەکریا، کیانووش سەنجاری پێسەو ناڕەزایەتی بەربڕییەی وەرانوەرو سزاو  زینانیا سیاسی دمایش بە ژیواو وێش ئارد.

وەڵتەر، کیانووش سەنجەری پێگەو فەرمی وێش جەتۆڕە کۆمەڵایەتیەکا ئێکسینە سەبارەت بە زینانا سیاسیی پەیامێوەش ئاڕاسەو دەسەڵاتو دادوەری ئێرانی کەردەبێ و ئەرەیاونابێش، "ئەگەر فاتیمە سپێهری، نەسرین شاکرەمی، تۆماج ساڵحی و ئارشام ڕەزایی کە زینانیۍ سیاسیێنێ تا سەعات ٧و وێرەگاو ڕۆو چوارشەممەی زینانەنە ئازادۍ نەکریا و هەواڵو ئازادکەردەیشا ماڵپەڕو هەواڵو دادوەرینە وەڵا نەکریۆوە، ئانە وەرا وەرو دیکتاتۆرییەتو خامنەیی و هامکارەکاشەنە دمای بە ژیواو وێم مارونە".

هەرپاسە، جە دماین پەیامەنە ئاماژەش پانەیەکەرد، "مەبۆ حیچ کەسێ سەرو ئازادی ڕابەربڕییەی زینانی کریۆنە، ناڕەزایی بەربڕییەی مافو گرد هاموڵاتیێن. دماو ئی پەیامەیمە دمای بە ژیواو وێم مارو، ئێمە ژیوایما بە عەشقی‌ بەخشان نەک بە مەرگی."

یاگێ ئاماژەین، مانگەو ئۆکتۆبەرو ۲۰۱٦، کیانووش سەنجەری ڕۆنامەنویس و پەیامنێرو دەنگو ئەمریکای واشنتنە دماو چن ساڵێ ژیوا کەردەی چا وڵاتەیە گێڵانۆ پەی ئێرانی و چن ڕوێ دماو گێڵایۆ دەسگیرکریا، دماتەر جە لایەنو دۆڵەتو ئێرانی سزاو ۱۱ ساڵا زینانیکەردەی و دووێ ساڵا قەدەغەکەردەو بەرشییەیش جە وڵاتینە سەرەرە سەپیا.

ئا ڕۆنامەنوویسە دماو سزاکێش، مانگەونیسانو ۲۰۲۱ ئێرانش جیا ئاست و ئەمریکانە ئەرەنیشتە بیی، بەڵام ماوێوە گێڵابێ پەی ئێرانی. چن مانگەی ویەردەنە، کیانووش سەنجەری تۆڕە کۆمەڵایەتییەکانە مژاری سیاسی و کۆمەڵایەتی وەڵا کەرێوە