زینڎانیێوە کورد ئێرانەنە جە قەنارە دریا
جە زینڎانوو ناوەندیی شاروو ئەردەبێلینە سزاو جە قەنارەدای زینڎانیێوە کوردی جابەجێ کریا.
بەپاو هەواڵێوە تۆڕەو مافەکا مرۆڤوو کوردسانی ڕۊو دووەشەممەی ١٩و شوباتی، زینڎانیێوە کورد بە نامۍ ئیرەج پاکی جە زینڎانوو ناوەندی ئەردەبێلینە جە قەنارە دریان.
ئانەیچ وزیان ڕووە کە ئا زینڎانیە ڕۊو یەکشەممەی فاڕیابێوە پۍ ژووری تاکەکەسی و ڕۊو دووەشەممەیچ سزاکێش جابەجێ کریێنە.
ئیرەج پاکی تەمەن ٣٨ ساڵ، خەڵکوو دەگاو ستونڕەشی سەر بە شاروو سەڵماسی جە پارێزگاو ورمێ بیەن و خێزاندار بیەن.
ماوەو چوار ساڵابۍ ئا زینڎانیە کوردە بە تۆمەتەو چۊوە گلیای جە دۆسیەکا ماددە هۆشبەرەکانە سزاو جە قەنارەدایش سەرەرە سەپیابۍ.
جە سەرەتاو ئێساڵیوە لاو کەمیۆ ٨٠ کەسۍ جە ئێرانەنە جە قەنارە دریێنۍ، کە بەشێوە فرەشا جە دووۍ نەتەوا کوردی و بەلوجینۍ.
جە دماو دەسپنەکەردەو سەرهۊرداو ژەنی، ژیۋای، ئازاڎیی جە ساڵەو ٢٠٢٢ جابەجێکەردەو جە قەنارەدای ئێرانەنە بە شێوێوە ۋەرچەم زیاڎش کەردەن. ئینەیچ بە قسۍ چالاکا مافەکا مرۆڤی ئامرازێوەن پۍ چەمتەرسنای گلێرگەی و پەشیمان کەردەیۊیشا جە هەرجۆرە مدرامانێوە جە ۋەران ۋەروو دەسەڵاتینە.
ساڵەو ٢٠٢١ واتە ساڵێوە وەڵۍ دەسپنەکەردەو سەرهۊرداکەی ٣٣٣ کەسۍ جە ئێرانەنە جە قەنارە دریێبێنۍ، بەڵام ساڵەو ٢٠٢٢ ژمارەکە پۍ ٥٨٢ کەسا و ساڵەو ٢٠٢٣ پۍ سەروو ٧٤٠ کەسا بەرزبیۆ.
نزیکەو سەڎەنە ٤٩ ئا کەسا جە قەنارە دریا بەمەڵامەتوو دۆسیەو کوشتەی بە ئەنقەسی، سەڎەنە ٤٤شا بە تۆمەتوو بازرگانی بە مادەو هۆشبەریۆ، سەڎەنە ٤ بە تۆمەتوو دەسدرێژی و سەڎەنە ٣ ێشا بە تۆمەتوو سیاسی چێروو نامۍ سیخوڕینە، جەنگ جە دژوو خوڎای و چەکهورگێرتەی جە دژوو دەوڵەتی جە قەنارە دریێنۍ.
بەپاو ئامارێوە رێکوزیاو مافەکا مرۆڤی جە ئێرانەنە جە ساڵەو ٢٠١٠یۆ ٧ هەزارۍ و ٧٠٩ کەسۍ ئێرانەنە جە قەنارە دریێنۍ، چا ژمارەیە ٧٠ کەسێشا تەمەنشا واروو ١٨ ساڵیۆ بیەن و ٢١٠ ژەنێچ چا ١٤ ساڵەنە جە قەنارە دریێنۍ.
