دایکانی شەممە بۆ پرسینی چارەنووسی کەسوکارەکانیان کە لە پرۆسەی دەستبەرسەرکردنیاندا بێسەروشوێن کراون و بەداواکاری دادگایکردنی کریارانی ئەو کارانە بۆ هەفتەی ١٠١٥ لە گۆڕەپانی گەلەتەسەرای کۆبوونەوە.

لە چالاکی ئەم هەفتەیەدا پرسیار لەسەر چارەنووسی کەنعان کرا کە لە ١٢ی ئەیلولی ١٩٩٤دا دەستبەسەر دەکرێت و لەوکاتەوە بێسەروشوێنە.

لە چالاکیەکەدا ڕاگەیاندراوێک لە لایەن ئەندامی کۆمیسۆنی بێسەروشوێنکراوانی ئیهەدەی لقی ئەستەنبوڵ سەبلا ئارجان خوێندرایەوە و لە ڕاگەیاندراوەکەدا ئاماژەی بەوەدا؛ لە تورکیادا هەزاران کەس لە دەرنجامی سیاسەتەکانی دەوڵەتەوە بێسەروشوێن کراون.

هەر لە چالاکیەکەدا عێرفان بیلگین، برای کەنعان بیلگین قسەیکرد، لە قسەکانیدا ناڕەزایەتی بەرامبەر گەمارۆدانەکانی پۆلیس دەربڕی و وتی بە کەسوکارە بێسەروشوێنەکانیان سەربەرزن.

دواتر حەنیفە یلدز دایکی موراد یلدزی بێسەروشوێنکراو قسەیکرد و پرسیاری لەسەر چارەنووسی نارین گورانی تەمەن ٨ ساڵ کرد کە ماوەی ١٨ ڕۆژە بێسەروشوێنە.