چالاکی و خۆپیشاندانەکان لەدوای کوشتنی ژینا ئەمینی لەلایەن پۆلیسی بەناو ئەخلاقی رژێمی داگیرکەری ئێران، لەگەڵ هەموو فشار و بڕینی ئەنتەرنێت لە شارەکانی ئێران و رۆژهەڵاتی کوردستان بەردەوامە.

رێخراوی مافەکانی مرۆڤی ئێران (ئێران هۆمان رایتش) لە ١٦ی ئەیلولەوە تاوەکو ئێستا کە ژینا ئەمینی لەو رۆژەدا کوژرا، لە هەموو وڵات خۆپیشاندانەکان دەستیپێکرد و لە خۆپیشاندانەکاندا ٨٣ کەس لەلایەن هێزەکانی رژێمەوە کوژراون.

بەپێی راگەیەنراوەکە: لە مازەندران ٢٦، گیلان ١١، ئازەربایجانی رۆژئاوا ١١، کرمانشان ٦، سنە ٦، ئەلبورز ٥، تاران ٤، کوهگیلویێ و بویەر ئەحمەد ٢، ئەسفەهان ٢، خۆراسانی رەزەوی ٢، سەنجان ٢، قەزوین ٢، سێمنان  کەسێک، قەزوێن کەسێک، ئیلام کەسێک، ئازەربایجانی رۆژهەڵات کەسێک.

رێکخراوەکە دەڵێت، تاوەکو ئێستا بە هەزران کەس دەستگیرکراون و شەپۆڵی دەستگیرکردن بەردەوامە.

رێکخراوی مافەکانی مرۆڤی ئێران زوڵم و زۆردەستی و فشارەکانی شەرمەزار کرد و داوای لە کۆمەڵگەی نێودەوڵەتی کرد کە بۆ رێگریکردن لە کوشتنی خۆپیشاندەران هەول بدەن.

مەحمود ئەمیری مەقەدەم سەرۆکی ریکخراوەکە گوتی، " تەقەی راستەوخۆ بە گولەی راستی لەدژی خۆپیشاندەران تاوانێکی نێودەوڵەتی تاوانە و ئەرکی کۆمەلگەی نێودەوڵەتیە کە لەدژی بوەستێتەوە."

ف.ق