پارێزەران ڕۆژی ١٤ی ئەیلول لە برۆکسلی بەلجیکا کۆنگرەیەکی ڕۆژنامەنووسییان ئەنجامدا و ڕایانگەیاند، دەیانەوێت بچنە ئیمرالی.

بە ناوی ٣٥٠ پارێزەر لە سەرتاسەری جیهانەوە داوای چوونە ئیمرالی کرا و ڕاگەیەندراوێک خوێندرایەوە و تیایدا، داواکرا گۆشەگیریی سەر ڕێبەری گەلی کورد عەبدوڵا ئۆجالان کۆتایی پێبێت و مافی بەرگریکردن لێی مسۆگەر بکرێت.

بن خەلیفە: قۆناغی داهاتوو ئەوەیە بڕۆین بۆ ئیمراڵی

سەلما بن خەلیفە دوای کۆبوونەوەکەی کۆمەڵەی پاریزەرانی برۆکسل و تۆڕی پارێزەرانی پێشکەوتوو ڕایگەیاند، ئەو ئەندامی کۆمەڵەی مافناسانی ئەوروپایە بۆ دیموکراسی و مافەکانی مرۆڤە و کۆمەڵەکەیان پێشەنگایەتی هەوڵەکان دەکات بۆ ڕۆیشتن بۆ ئیمراڵی.

بن خەلیفە، وتیشی: ٣٥٠ پارێزەر بەشدارییان لەو هەوڵەدا کردووە بۆ ئەوەی ببنە پارێزەری ڕێبەری گەلی کورد عەبدوڵا ئۆجالان و بچنە ئیمرالی.

بن خەلیفە ڕایگەیاند، نامەیەکیان بۆ وەزارەتی دادی تورکیا و رێکخراوەکانی پارێزەرانی جیهان نووسیوە و دەڵێت: "شکاندنی گۆشەگیری گرنگە، ئەو گۆشەگیرییە پێشتر لەلایەن دادگای مافی مرۆڤی ئەوروپا و کۆمیتەی نەهێشتنی ئەشکەنجەوە ئیدانەکرا و ئەم گۆشەگیرییە ناتوانێت بەردەوام بێت. بە داواکاریی ڕۆیشتنمان بۆ ئیمراڵی دەمانەوێت ئەو گۆشەگیرییە تێکبشکێنین، بۆیە ئاستی تری داهاتووی کارەکەمان ئەوەیە، کە بچینە ئیمرالی".

دیباتی: مافی دادگاییەکی دادپەروەرانە پێشێل دەکرێت

هێلین دێباتی سەرۆکی یەکێتیی پارێزەران بۆ دیموکراسی (SAD)، کە خۆی بە رێکخستنێک بۆ ڕێکخراوی دیموکراسی پێناسە دەکات، ڕایگەیاند، بۆ چاودێریکردنی زیندانی ئیمراڵی و چەند دۆسیەکی تر سەردانی تورکیایان کردووە.

دێباتی ڕاشیگەیاند، بەم دواییانە بەشداریی دۆسیەی کۆمەڵەى مافناسانی هاوچەرخ (چەهەدە / ÇHD) دا کردووە و وتی: "تورکیا لەو دۆزەدا بە تەواوی پێوانەی دادگاییکردنێکی دادپەروەرانە و بێلایەنانە پێشێل دەکات".

دیباتی وتیشی: "ئەو وەک پارێزەرێک خۆیشی بە بەرپرس لە دۆسیەی ئیمرالی دەزانێت و وتی: "مافی پارێزەرانە، کە بتوانن پەیوەندی بە موەکیلەکانیانەوە بکەن. ئەگەر ئێوە هیچ پەیوەندییەکتان لەگەڵ عەبدوڵا ئۆجالان و زیندانییەکانی دیکەی ئیمرالی دا نەبێت، ئەوا ناتوانن ئامادەکاری بۆ کەیسەکە بکەن، ئەوا ناشتوانن ئامادەکاری بکەن بۆ بەرگریکردن".

دێباتی ئەوەشی ڕاگەیاند، مافی بەرگریکردن لە ڕێگەی گۆشەگیرییەوە پێشێلکراوە و وتی: "پارێزەران ناتوانن ئامادەکاری بکەن. ئەمەش هەم بۆ ئێمە و هەم بۆ هەموو پارێزەران گرنگە".

ژ.ت