شاباز مەحمود، وتەبێژی ڕێکخراوی کرێکارانی بیناسازی هەرێمى کوردستان لە لێدوانێکى ڕۆژنامەنوانیدا رایگەیاند: "لەمساڵدا ٧٣ کرێکار لە هەرێمی کوردستان و ناوچە دابڕێندراوەکانی باشووری کوردستان لەکاتی کارکردندا گیانیان لەدەستداوە و لەو ژمارەیەش ١٨ کەسیان کرێکاری بیانی بوون" .

باسى لەوەکردووە، ساڵی ڕابردوو ٥٩ کرێکار لەکاتی کارکردندا گیانیان لەدەستدابوو.

ئەوەشى خستووەتەڕوو، زۆرترین حاڵەتەکانی گیانلەدەستدانی کرێکاران لەکاتی کاردکردندا بەهۆی کەوتنەخوارەوەیان بووە لەشوێنە بەرزەکان، کە ٢٤ گیانلەدەستدان بەو هۆیەوە بووە و ١١ کرێکاریش بەهۆی تەزووی کارەباوە گیانیان لەدەستداوە.

شاباز مەحمود ئاماژەی بەوەشکرد، لەو ٧٣ کرێکارەی گیانیان لەدەستداوە، ٥٢ کەسیان لە پارێزگاکانی هەرێمی کوردستان بوون و ٢١ کەسیشیان لە کەرکووک و ناوچە دابڕێندراوەکان بوون و تەمەنیان لەنێوان ١٥ بۆ ٧٠ ساڵدابووە .

راشیگەیاندووە، بەپێی ئامارەکان ئەو کرێکارانەی لە پارێزگاکانی هەرێمی کوردستان گیانیانلەدەستداوە بەمشێوەیە لە هەولێر ٢٢ کرێکار، سلێمانى ١٩ کرێکار، دهۆک شەش کرێکار، هەڵەبجە پێنج کرێکار بووە.

هـ . ب